ᠪᠦᠬᠦ ᠤᠯᠤᠰ ᠵᠢᠱᠢᠶᠡᠴᠢ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ — ᠫᠠᠨ ᡁᠢ ᠷᠦᠩ

    3 ᠰᠠᠷ᠎ᠠ 31᠎ ᠡᠳᠦᠷ᠂ ᠠᠷᠠᠳ ᠲᠡᠭᠡᠳᠦ ᠪᠠᠶᠢᠴᠠᠭᠠᠬᠤ ᠬᠤᠷᠢᠶ᠎ᠠ ᠪᠤᠯᠤᠨ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨ  ᠨᠠᠮ ᠬᠤᠷᠢᠶ᠎ᠠ ᠶᠡᠭᠡ ᠬᠤᠷᠠᠯ ᠬᠤᠷᠠᠯᠳᠤᠭᠤᠯᠵᠤ᠂ ᠫᠠᠨ ᡁᠢ ᠷᠦᠩ ᠨᠦᠬᠦᠷ ᠲᠤ ︽ᠪᠦᠬᠦ ᠤᠯᠤᠰ ᠵᠢᠱᠢᠶᠡᠴᠢ ᠪᠠᠶᠢᠴᠠᠭᠠᠬᠤ  ᠲᠤᠰᠢᠶᠠᠯᠳᠠᠨ︾ ᠪᠤᠯᠤᠨ ︽ᠪᠦᠬᠦ ᠤᠷᠤᠨ ᠰᠢᠯᠢᠳᠡᠭ ᠨᠠᠮ ᠬᠡᠰᠢᠬᠦᠨ︾᠎ ᠢᠷᠠᠭᠤ ᠠᠯᠳᠠᠷ ᠴᠤᠯᠠ ᠤᠯᠭᠤᠬᠰᠠᠨ ᠶᠤᠮ᠃  ᠲᠤᠮᠳᠠ ᠪᠡᠶ᠎ᠡ ᠲᠠᠢ᠂ ᠲᠤᠷᠠᠩᠬᠠᠢ ᠴᠢᠷᠠᠢ ᠲᠠᠢ ᠫᠠᠨ ᡁᠢ ᠷᠦᠩ ᠲᠠᠶᠢᠰᠠᠨ ᠳᠤ ᠭᠠᠷᠴᠤ᠂ ᠠᠷᠠᠳ ᠲᠡᠭᠡᠳᠦ ᠪᠠᠶᠢᠴᠠᠭᠠᠬᠤ  ᠬᠤᠷᠢᠶ᠎ᠠ ᠨᠠᠮ ᠤᠳᠤᠷᠢᠳᠬᠤ ᠲᠤᠭᠤᠢᠢᠯᠠᠩ ᠱᠦᠵᠢ᠂ ᠪᠠᠶᠢᠴᠠᠭᠠᠬᠤ ᠲᠠᠷᠤᠭ᠎ᠠ ᠼᠤᠤ ᠵᠢᠶᠠᠨ ᠮᠢᠩ ᠭᠠᠷ ᠠᠴᠠ ︽ ᠪᠦᠬᠦ ᠤᠯᠤᠰ ᠵᠢᠱᠢᠶᠡᠴᠢ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ︾᠎ ᠢᠷᠠᠭᠤ ᠠᠯᠳᠠᠷ ᠦᠨᠡᠮᠯᠡᠯ᠂ ᠱᠠᠩᠨᠠᠯ ᠲᠡᠮᠳᠡᠭ ᠢ ᠲᠤᠰᠤᠨ  ᠠᠪᠤᠬᠰᠠᠨ ᠶᠠᠪᠤᠳᠠᠯ ᠪᠤᠯ ᠠᠷᠢᠭᠤᠨ ᠲᠠᠷᠬᠠᠨ᠂ ᠳᠤᠷᠠᠳᠬᠠᠯ ᠲᠠᠢ ᠮᠦᠴᠡ ᠪᠤᠯᠬᠤ ᠶᠤᠮ᠃ ᠡᠨᠡ ᠪᠤᠯ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ  ᠬᠠᠯᠠᠭᠤᠨ ᠬᠦᠷᠦᠰᠦᠨ ᠳᠤ 30 ᠬᠠᠪᠤᠷ ᠨᠠᠮᠤᠷ ᠢ ᠡᠯᠡᠭᠡᠭᠰᠡᠨ ᠡᠬᠡᠯ ᠵᠢᠷ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠬᠠᠮᠤᠬ ᠲᠡᠭᠡᠳᠦ  ᠢᠷᠠᠭᠤ ᠠᠯᠳᠠᠷ ᠪᠤᠯᠤᠨ᠎ᠠ᠃      
    

    ᠮᠠᠯᠵᠢᠬᠤ ᠤᠷᠤᠨ ᠳᠤ ᠦᠰᠦᠭᠰᠡᠨ ᠬᠢᠳᠠᠳ ᠬᠡᠦᠬᠡᠳ      
    ᠫᠠᠨ ᡁᠢ ᠷᠦᠩ ᠬᠡᠳᠦ᠋ᠢᠪᠡᠷ ᠬᠢᠳᠠᠳ ᠬᠦᠮᠦᠨ ᠪᠤᠯᠪᠠᠴᠦ ᠪᠠᠯᠴᠢᠷ ᠪᠠᠭ᠎ᠠ ᠨᠠᠰᠤ ᠪᠠᠨ ᠬᠠᠷᠢᠨ ᠮᠠᠯᠵᠢᠬᠤ ᠤᠷᠤᠨ ᠳᠤ  ᠦᠩᠬᠡᠷᠡᠬᠦᠯᠦᠭᠰᠡᠨ ᠪᠠᠶᠢᠵᠠᠢ᠃ ᠲᠡᠷᠡ ᠮᠤᠩᠭᠤᠯ ᠬᠡᠤᠬᠡᠳᠳ ᠲᠠᠢ ᠬᠠᠮᠳᠤ ᠪᠤᠷᠭᠠᠰᠤᠨ ᠮᠤᠷᠢ ᠵᠠᠶᠢᠳᠠᠯᠠᠨ ᠪᠠᠭ᠎ᠠ ᠨᠠᠰᠤᠨ ᠬᠠᠪᠤ  ᠴᠡᠩᠬᠡᠯ ᠬᠠᠨᠤᠳᠠᠯ᠎ᠠ ᠡᠳ᠋ᠯᠡᠵᠦ ᠶᠠᠪᠤᠵᠠᠢ᠃ ᠤᠳᠠᠯ ᠦᠬᠡᠢ ᠫᠠᠨ ᡁᠢ ᠷᠦᠩ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠳᠤ ᠤᠷᠤᠪᠠ᠂ ᠬᠡᠪᠡᠴᠦ  ᠲᠡᠬᠦᠨ ᠢ ᠪᠠᠭ᠎ᠠ ᠰᠤᠷᠭᠠᠭᠤᠯᠢ ᠭᠤᠷᠪᠠᠳᠤᠭᠠᠷ ᠤᠨ ᠳᠤ ᠤᠷᠤᠬᠤ ᠳᠤ ᠡᠵᠢ ᠨᠢ ᠬᠦᠨᠳᠦ ᠡᠪᠡᠳᠴᠢᠯᠡᠬᠡᠳ ᠬᠡᠪᠳᠡᠷᠢ ᠳᠤ ᠤᠷᠤᠪᠠ᠃  ᠫᠠᠨ ᡁᠢ ᠷᠦᠩ ᠠᠬ᠎ᠠ ᠡᠬᠡᠴᠢ ᠲᠡᠬᠦᠦ ᠵᠢᠷᠭᠤᠭᠤᠯᠠ ᠲᠡᠭᠡᠷ᠎ᠡ ᠪᠠᠨ ᠠᠮᠢᠳᠤᠷᠠᠯ ᠭᠠᠭᠴᠠ ᠲᠦᠰᠢᠭ ᠲᠤᠯᠭᠠᠭᠤᠷᠢ  ᠪᠤᠯᠤᠬᠰᠠᠨ  ᠡᠵᠢ ᠨᠢ ᠡᠪᠡᠳᠴᠢᠯᠡᠭᠰᠡᠨ ᠠᠴᠠ ᠰᠤᠷᠤᠯᠭ᠎ᠠ ᠰᠦᠢᠳᠬᠡᠯ ᠦᠭᠴᠦ ᠲᠡᠶᠢᠯᠬᠦ ᠦᠬᠡᠢ ᠪᠤᠯᠪᠠ᠃ ᠫᠠᠨ ᡁᠢ ᠷᠦᠩ ᠠᠷᠭ᠎ᠠ  ᠦᠬᠡᠢ ᠬᠡᠷ ᠲᠡᠭᠡᠨ ᠬᠠᠷᠢᠵᠤ ᠰᠢᠯᠪᠢᠬᠦᠷ ᠪᠠᠷᠢᠨ ᠵᠢᠭᠠᠯ ᠬᠤᠨᠢᠴᠢᠨ ᠪᠤᠯᠤᠯ᠎ᠠ᠃ ᠫᠠᠨ ᡁᠢ ᠷᠦᠩ ᠤᠳᠠᠭ᠎ᠠ ᠪᠤᠯᠭᠠᠨ ᠰᠤᠷᠭᠠᠭᠤᠯᠢ  ᠡᠬᠦᠳᠡ ᠪᠠᠷ ᠭᠠᠷᠬᠤ ᠳᠠᠭᠠᠨ ᠬᠡᠦᠬᠡᠳᠳ ᠤᠷᠠᠨ ᠲᠤᠳᠤ ᠤᠩᠰᠢᠯᠭ᠎ᠠ ᠲᠠᠭᠤᠨ ᠳᠤᠨᠢ ᠰᠤᠬᠳᠤᠭᠤᠷᠠᠨ ᠰᠡᠳᠬᠢᠯ ᠵᠤᠪᠠᠨ᠎ᠠ᠃  ᠲᠠᠷᠠᠭ᠎ᠠ ᠵᠢᠯ ᠨᠢ ᠰᠢᠨ᠎ᠡ ᠰᠤᠷᠤᠯᠭ᠎ᠠ ᠬᠤᠭᠤᠴᠠᠭ᠎ᠠ ᠡᠬᠢᠯᠡᠬᠦ ᠪᠤᠯᠬᠤ ᠳᠤ᠂ ᠤᠢᠢᠷ᠎ᠠ ᠬᠠᠪᠢ ᠬᠢᠨᠢ ᠮᠠᠯᠴᠢᠳ ᠨᠢᠬᠡ ᠬᠤᠶᠠᠷ  ᠮᠦᠩᠬᠦ ᠲᠤᠰᠠᠯᠠᠬᠰᠠᠭᠠᠷ ᠪᠠᠶᠢᠵᠦ ᠬᠠᠷᠢᠨ ᠲᠡᠭᠦᠨ ᠰᠤᠷᠤᠯᠭ᠎ᠠ ᠰᠦᠢᠳᠬᠡᠯ ᠢ ᠨᠢ ᠪᠦᠷᠢᠯᠳᠦᠬᠦᠯᠵᠦ ᠦᠭᠴᠡᠢ᠃ ᠮᠤᠩᠭᠤᠯ  ᠬᠦᠮᠦᠨ ᠥᠷᠦᠪᠴᠢ ᠴᠠᠶᠢᠯᠭᠠᠨ ᠰᠡᠳᠬᠢᠯ ᠫᠠᠨ ᡁᠢ ᠷᠦᠩ ᠨᠢᠬᠡ ᠬᠡᠷ ᠬᠢᠨ ᠢ ᠶᠠᠭᠤ ᠬᠡᠯᠡᠬᠦ ᠪᠠᠨ ᠤᠯᠬᠤ ᠦᠬᠡᠢ  ᠪᠤᠯᠳᠠᠯ᠎ᠠ ᠲᠤᠬᠳᠤᠯᠤᠭᠤᠯᠵᠤ ᠤᠷᠬᠢᠵᠠᠢ᠃ ᠨᠢᠬᠡᠨ ᠮᠤᠩᠭᠤᠯ ᠠᠪᠤ ᠫᠠᠨ ᡁᠢ ᠷᠦᠩ ᠲᠤᠯᠤᠭᠠᠢ ᠢᠯᠪᠢᠬᠡᠳ᠄ ︽ᠮᠢᠨᠤ ᠬᠦᠦ᠂  ᠰᠠᠶᠢᠨ ᠰᠤᠷᠤᠭᠠᠷᠠᠢ︾ ᠬᠡᠵᠠᠢ᠃ ᠫᠠᠨ ᡁᠢ ᠷᠦᠩ ᠬᠤᠵᠢᠮ ᠨᠢ ᠡᠨᠡ ᠲᠤᠬᠠᠢ ᠲᠤᠷᠠᠳᠬᠠᠬᠤ ᠳᠠᠭᠠᠨ᠄ ︽ᠪᠢ ᠲᠡᠳᠡᠬᠡᠷ ᠬᠦᠳᠦᠰᠦᠨ  ᠲᠡᠪᠡᠯ ᠲᠠᠢ ᠬᠦᠳᠡᠭᠡ ᠬᠦᠮᠦᠰ ᠠᠪᠴᠢᠷᠠᠵᠤ ᠦᠭᠬᠦᠭᠰᠡᠨ ᠨᠢᠬᠡ ᠬᠤᠶᠠᠷ ᠮᠦᠩᠬᠦ ᠠᠴᠢ ᠪᠠᠷ ᠦᠨᠦᠳᠦᠷ ᠬᠦᠷᠦᠭᠰᠡᠨ᠂  ᠪᠢ ᠲᠡᠳᠡᠨ ᠠᠴᠢ ᠬᠡᠵᠢᠶ᠎ᠡ ᠴᠤ ᠮᠠᠷᠳᠠᠬᠤ ᠦᠬᠡᠢ︾ ᠬᠡᠰᠡᠨ ᠪᠠᠶᠢᠳᠠᠬ᠃ ᠫᠠᠨ ᡁᠢ ᠷᠦᠩ ᠡᠵᠢ ᠨᠢ ᠪᠠᠰᠠ ᠲᠡᠬᠦᠨ ᠳᠤ ︽ ᠡᠳᠡᠬᠡᠷ ᠬᠦᠮᠦᠰ ᠠᠴᠢ ᠬᠡᠵᠢᠶ᠎ᠡ ᠴᠤ ᠪᠢᠳᠡᠬᠡᠢ ᠮᠠᠷᠳᠠ᠂ ᠲᠤᠮᠤ ᠪᠤᠯᠤᠭᠠᠳ ᠡᠳᠡᠬᠡᠷ ᠰᠠᠶᠢᠬᠠᠨ ᠰᠡᠳᠬᠢᠯᠳᠡᠨ ᠠᠴᠢ ᠨᠢ  ᠬᠠᠷᠢᠭᠤᠯᠤᠭᠠᠷᠠᠢ︾ ᠬᠡᠵᠦ ᠰᠤᠷᠭᠠᠵᠠᠢ᠃ ᠡᠶᠢᠨᠬᠦ ᠮᠤᠩᠭᠤᠯ ᠮᠠᠯᠴᠢᠳ ᠠᠴᠢ ᠪᠠᠷ ᠪᠢᠴᠢᠭ ᠡᠷᠳᠡᠮ ᠰᠤᠷᠬᠤ ᠲᠤᠬᠢᠶᠠᠯ ᠤᠯᠤᠬᠰᠠᠨ  ᠫᠠᠨ ᡁᠢ ᠷᠦᠩ ᠲᠡᠷᠡ ᠦᠶ᠎ᠡ ᠠᠴᠠ ᠠᠷᠠᠳ ᠲᠦᠯᠦᠬᠡ ᠰᠠᠶᠢᠨ ᠶᠠᠪᠤᠳᠠᠯ ᠬᠢᠨ᠎ᠡ ᠬᠡᠵᠦ ᠲᠤᠳᠤᠷ᠎ᠡ ᠪᠠᠨ ᠰᠡᠮᠡᠬᠡᠨ ᠵᠤᠷᠢᠬ  ᠰᠢᠭᠤᠳᠴᠦ ᠶᠠᠪᠤᠬᠰᠠᠠ ᠪᠠᠶᠢᠵᠠᠢ᠃ ᠪᠠᠭ᠎ᠠ ᠦᠶ᠎ᠡ ᠬᠢᠨᠢ ᠦᠩᠬᠡᠷᠡᠯᠳᠡ ᠫᠠᠨ ᡁᠢ ᠷᠦᠩ ᠳᠤ ᠲᠠᠯ᠎ᠠ ᠨᠤᠳᠤᠬ᠂ ᠠᠷᠠᠳ  ᠲᠦᠮᠡᠨ ᠲᠦᠯᠦᠬᠡ ᠠᠯᠢᠪᠠ ᠪᠠᠨ ᠵᠤᠷᠢᠭᠤᠯᠬᠤ ᠬᠦᠰᠡᠯ ᠤᠷᠭᠤᠭᠤᠯᠵᠠᠢ᠃ ᠲᠡᠭᠡᠭᠡᠳ ᠲᠡᠭᠦᠨ ᠡᠨᠡᠬᠦ ᠬᠦᠰᠡᠯ ᠲᠡᠮᠡᠤᠯᠤᠯ  ᠪᠤᠭᠤᠳᠤ ᠬᠤᠶᠢᠳᠤ ᠪᠡᠶ᠎ᠠ ᠳᠤ ᠤᠷᠤᠰᠢᠵᠦ ᠪᠦᠬᠦᠢ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠠᠯᠠᠭᠤᠨ ᠬᠦᠷᠦᠰᠦᠨ᠎ᠡ ᠪᠡᠶᠡᠯᠡᠭᠳᠡᠭᠰᠡᠨ ᠶᠤᠮ᠃       
    

    ᠮᠤᠩᠭᠤᠯ ᠬᠢᠳᠠᠳ ᠬᠡᠯᠡᠨ ᠳᠤ ᠲᠡᠭᠰᠢ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ       
    ᠰᠤᠷᠪᠤᠯᠵᠢᠯᠠᠬᠴᠢ 3 ᠰᠠᠷ᠎ᠠ 30᠎ ᠡᠳᠦᠷ᠂ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨ ᠠᠷᠠᠳ ᠪᠠᠶᠢᠴᠠᠭᠠᠬᠤ ᠬᠤᠷᠢᠶᠠᠨ ᠳᠤ  ᠫᠠᠨ ᡁᠢ ᠷᠦᠩ ᠲᠠᠢ ᠠᠭᠤᠯᠵᠠᠨ ᠮᠤᠩᠭᠤᠯ  ᠶᠠᠷᠢᠯᠴᠠᠵᠦ ᠪᠢᠯᠠ᠃ ᠦᠨᠡᠨ ᠢ ᠬᠡᠯᠡᠪᠡᠯ ᠮᠤᠩᠭᠤᠯ ᠬᠡᠯᠡ ᠨᠢ ᠮᠠᠯᠵᠢᠬᠤ ᠤᠷᠤᠨ ᠳᠤ  ᠲᠦᠷᠦᠵᠦ ᠦᠰᠦᠭᠰᠡᠨ ᠫᠠᠨ ᡁᠢ ᠷᠦᠩ ᠳᠤ ᠲᠡᠶᠢᠮᠦ ᠯᠡ ᠲᠠᠨᠢᠯ ᠪᠤᠰᠤ ᠵᠦᠢᠯ ᠪᠢᠰᠢ᠂ ᠲᠡᠷᠡ ᠶᠡᠷᠦᠨᠢ ᠮᠤᠩᠭᠤᠯ  ᠶᠠᠷᠢᠵᠤ  ᠴᠢᠳᠠᠳᠠᠬ᠃ ᠬᠡᠪᠡᠴᠦ ᠪᠠᠶᠢᠴᠠᠭᠠᠬᠤ ᠬᠤᠷᠢᠶᠠᠨ ᠳᠤ ᠬᠦᠷᠴᠦ ᠠᠵᠢᠯᠯᠠᠬᠰᠠᠨ ᠬᠤᠶᠢᠨ᠎ᠠ᠂ ᠫᠠᠨ ᡁᠢ ᠷᠦᠩ ᠮᠡᠳᠡᠳᠡᠭ ᠮᠤᠩᠭᠤᠯ  ᠬᠡᠯᠡ ᠨᠢ ᠪᠠᠶᠢᠴᠠᠭᠠᠬᠤ ᠠᠵᠢᠯ ᠬᠢᠬᠦ ᠳᠤ ᠪᠡᠷᠬᠡᠳᠡᠵᠡᠢ᠃ ᠫᠠᠨ ᡁᠢ ᠷᠦᠩ ᠮᠠᠯᠴᠢᠳ ᠲᠤ ᠮᠤᠩᠭᠤᠯ ᠬᠡᠯᠡ ᠪᠠᠷ ᠬᠠᠤᠯᠢ ᠴᠠᠭᠠᠵᠠ  ᠲᠤᠬᠠᠢ ᠮᠡᠳᠡᠯᠬᠡ ᠶᠠᠷᠢᠵᠤ ᠲᠠᠶᠢᠯᠪᠤᠷᠢᠯᠠᠬᠤ ᠳᠤ ᠲᠡᠳᠡ ᠶᠡᠷᠦᠨᠢ ᠤᠢᠢᠯᠠᠭᠠᠬᠤ ᠦᠬᠡᠢ᠃ ︽ᠬᠡᠯᠡ ᠲᠠᠢ ᠪᠤᠯ ᠬᠦᠯ ᠲᠠᠢ︾ ᠬᠡᠳᠡᠭ᠃  ᠫᠠᠨ ᡁᠢ ᠷᠦᠩ ᠴᠤ ᠪᠠᠶᠢᠴᠠᠭᠠᠬᠤ ᠠᠵᠢᠯ ᠳᠤ ᠮᠤᠩᠭᠤᠯ ᠬᠡᠯᠡ ᠨᠢ ᠤᠮᠳᠤᠭᠠᠢᠢᠯᠠᠵᠤ ᠪᠤᠯᠤᠰᠢ ᠦᠬᠡᠢ ᠴᠢᠬᠤᠯᠠ ᠦᠢᠯᠡᠳᠦᠯ ᠲᠠᠢ  ᠬᠡᠳᠡᠭ ᠢ ᠵᠢᠷᠦᠬᠡ ᠰᠡᠳᠬᠢᠯ  ᠮᠡᠳᠡᠷᠡᠯ᠎ᠡ᠃ ᠲᠡᠷᠡ ᠨᠢᠬᠡᠨ ᠨᠠᠶᠢᠵᠢ ᠠᠴᠠ ᠪᠠᠨ ︽ᠮᠤᠩᠭᠤᠯ ᠬᠢᠳᠠᠳ ᠲᠤᠯᠢ︾ ᠵᠢᠬᠡᠯᠡᠨ  ᠠᠪᠴᠢᠷᠠᠭᠠᠳ ᠮᠠᠰᠢ ᠤᠯᠠᠨ ᠮᠤᠩᠭᠤᠯ ᠬᠢᠳᠠᠳ ᠬᠠᠤᠯᠢ ᠴᠠᠭᠠᠵᠠ ᠨᠤᠮ ᠪᠢᠴᠢᠭ ᠢ ᠦᠪᠡᠷ ᠲᠡᠭᠡᠨ ᠤᠩᠰᠢᠨ ᠰᠤᠷᠤᠯᠴᠠᠵᠤ᠂  ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠤᠭᠠᠳᠤ ᠬᠤᠰᠢᠭᠤᠨ ᠪᠠᠶᠢᠴᠠᠭᠠᠬᠤ ᠬᠤᠷᠢᠶᠠᠨ ᠳᠤ ᠨᠢᠬᠡᠨ ᠮᠤᠩᠭᠤᠯ ᠬᠢᠳᠠᠳ ᠬᠡᠯᠡᠨ ᠳᠡᠭᠡᠨ ᠲᠡᠭᠰᠢ  ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠨᠡᠮᠡᠭᠳᠡᠵᠡᠢ᠃ ᠫᠠᠨ ᡁᠢ ᠷᠦᠩ ᠦᠪᠡᠷ ᠲᠡᠭᠡᠨ ᠮᠤᠩᠭᠤᠯ ᠬᠢᠳᠠᠳ ᠬᠡᠯᠡᠨ ᠳᠤ ᠴᠠᠭᠠᠷᠠᠬᠰᠠᠨ  ᠪᠠᠷᠠᠬᠤ  ᠦᠬᠡᠢ ᠪᠠᠰᠠ ᠪᠦᠬᠦ ᠤᠷᠤᠨ ᠪᠠᠶᠢᠴᠠᠭᠠᠬᠤ ᠰᠢᠰᠲᠧᠮ ᠮᠤᠩᠭᠤᠯ ᠬᠢᠳᠠᠳ ᠬᠡᠯᠡᠨ ᠳᠤ ᠴᠠᠭᠠᠷᠠᠬᠰᠠᠨ ᠪᠠᠶᠢᠴᠠᠭᠠᠬᠤ ᠠᠵᠢᠯ  ᠲᠤᠰᠬᠠᠢ ᠮᠡᠷᠬᠡᠵᠢᠯᠳᠡᠨ ᠪᠤᠯᠤᠯ᠎ᠠ᠃ ᠲᠡᠷᠡ 2015 ᠤᠨ ᠳᠤ ᠤᠯᠤᠰ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠲᠡᠭᠡᠳᠦ ᠰᠤᠷᠭᠠᠭᠤᠯᠢ  ᠦᠪᠦᠷ ᠮᠤᠩᠭᠤᠯ ᠬᠤᠪᠢᠶᠠᠷᠢ ᠰᠤᠷᠭᠠᠭᠤᠯᠢ᠂ ᠰᠢᠨᠵᠢᠶᠠᠩ ᠬᠤᠪᠢᠶᠠᠷᠢ ᠰᠤᠷᠭᠠᠭᠤᠯᠢ ᠤᠷᠢᠯᠭ᠎ᠠ ᠪᠠᠷ ᠬᠠᠮᠢᠶ᠎ᠠ ᠪᠦᠬᠦᠢ  ᠮᠤᠵᠢ ᠤᠷᠤᠨ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠳᠤ ᠬᠢᠴᠢᠶᠡᠯ ᠤᠷᠤᠵᠤ᠂ ᠮᠤᠩᠭᠤᠯ ᠬᠢᠳᠠᠳ ᠬᠡᠯᠡ ᠪᠠᠷ ᠪᠠᠶᠢᠴᠠᠭᠠᠬᠤ ᠠᠵᠢᠯ ᠬᠢᠭᠰᠡᠨ  ᠲᠤᠷᠰᠢᠯᠭ᠎ᠠ ᠰᠤᠷᠭᠠᠮᠵᠢ ᠪᠤᠯᠤᠨ ᠤᠯᠤᠯᠳᠠ ᠪᠠᠨ ᠰᠤᠯᠢᠯᠴᠠᠨ᠂ ᠤᠯᠠᠨ ᠨᠡᠶᠢᠳᠡᠮ ᠰᠠᠶᠢᠨ ᠦᠨᠡᠯᠡᠯᠳᠡ ᠤᠯᠤᠬᠰᠠᠨ ᠪᠠᠶᠢᠯ᠎ᠠ᠃  ᠫᠠᠨ ᡁᠢ ᠷᠦᠩ ᠪᠠᠶᠢᠴᠠᠭᠠᠬᠤ ᠠᠵᠢᠯ  ᠬᠦᠳᠡᠭᠡ ᠨᠤᠳᠤᠬ  ᠶᠠᠪᠤᠬᠤ ᠳᠠᠭᠠᠨ᠂ ᠮᠠᠯᠴᠢᠳ ᠬᠠᠤᠯᠢ ᠮᠡᠳᠡᠬᠦ ᠦᠬᠡᠢ ᠠᠴᠠ  ᠪᠤᠯᠵᠤ ᠪᠡᠯᠴᠢᠬᠡᠷ ᠡᠪᠳᠡᠵᠦ ᠪᠠᠶᠢᠭ᠎ᠠ ᠦᠵᠡᠬᠡᠳ ᠰᠡᠳᠬᠢᠯ ᠰᠢᠨᠠᠯᠵᠠᠢ᠃ ᠡᠬᠦᠨ ᠳᠤ ᠲᠡᠷᠡ ᠲᠤᠰᠬᠠᠢᠢᠯᠠᠨ ᠮᠤᠩᠭᠤᠯ ᠬᠢᠳᠠᠳ  ᠬᠡᠯᠡᠨ ᠬᠠᠤᠯᠢ ᠲᠦᠬᠡᠮᠡᠯᠵᠢᠬᠦᠯᠬᠦ ᠲᠡᠪᠳᠡᠷ ᠬᠢᠵᠦ ᠠᠪᠤᠭᠠᠳ᠂ ᠮᠠᠯᠴᠢᠳ ᠲᠠᠢ ᠤᠴᠠᠷᠠᠬᠤ ᠪᠤᠯᠭᠠᠨ ᠳᠡᠳᠡᠨ ᠳᠤ ᠲᠠᠷᠬᠠᠭᠠᠨ ᠦᠭᠴᠦ᠂  ᠲᠡᠳᠡᠨ ᠳᠤ ᠬᠠᠤᠯᠢ ᠴᠠᠭᠠᠵᠠ ᠮᠡᠳᠡᠯᠬᠡ ᠶᠠᠷᠢᠵᠤ ᠲᠠᠶᠢᠯᠪᠤᠷᠢᠯᠠᠳᠠᠬ ᠪᠠᠶᠢᠪᠠ᠃ ᠶᠠᠬ ᠨᠢᠬᠡᠨ ᠵᠠᠭᠤᠴᠢᠯᠠᠭᠤᠷ  ᠰᠤᠷᠪᠤᠯᠵᠢᠯᠠᠬᠴᠢ ᠬᠡᠯᠡᠭᠰᠡᠨ ᠮᠡᠳᠦ ᠪᠠᠷ ︽ᠮᠤᠩᠭᠤᠯ ᠬᠡᠯᠡ ᠨᠢ ᠫᠠᠨ ᡁᠢ ᠷᠦᠩ ᠮᠠᠯᠴᠢᠳ ᠲᠠᠢ ᠤᠢᠢᠯᠠᠭᠠᠯᠴᠠᠬᠤ ᠬᠦᠬᠦᠷᠬᠡ  ᠪᠤᠯᠵᠠᠢ︾᠃

    ᠫᠠᠨ ᡁᠢ ᠷᠦᠩ 2014 ᠤᠨ ᠳᠤ ᠬᠠᠤᠯᠢ ᠪᠤᠰᠤ ᠪᠠᠷ ᠪᠡᠯᠴᠢᠬᠡᠷ ᠢ ᠡᠪᠳᠡᠭᠰᠡᠨ ᠬᠡᠷᠡᠭ ᠢ ᠲᠤᠰᠴᠠᠢ᠃ ᠬᠤᠶᠠᠷ ᠮᠠᠯᠴᠢᠨ  ᠲᠤᠷ᠎ᠠ ᠪᠠᠷ ᠦᠪᠡᠷ ᠲᠠᠭᠠᠭᠠᠴᠢᠯᠠᠬᠰᠠᠨ 150 ᠭᠠᠷᠤᠢ ᠮᠦ ᠪᠡᠯᠴᠢᠬᠡᠷ ᠲᠡᠭᠡᠨ ᠨᠠᠷᠠᠨ ᠬᠤᠸᠠᠷ ᠪᠤᠯᠤᠨ ᠡᠷᠳᠡᠨᠢ ᠰᠢᠰᠢ  ᠲᠠᠷᠢᠬᠰᠠᠨ ᠪᠠᠶᠢᠵᠠᠢ᠃ ᠫᠠᠨ ᡁᠢ ᠷᠦᠩ ᠲᠤᠬᠠᠢ ᠲᠠᠯᠠᠪᠠᠢ ᠳᠤ ᠬᠦᠷᠴᠦ ᠪᠠᠶᠢᠳᠠᠯ ᠢ ᠤᠢᠢᠯᠠᠭᠠᠭᠠᠳ᠂ ᠲᠤᠬᠠᠢ ᠭᠠᠵᠠᠷ ᠲᠤᠨᠢ  ᠲᠢᠩᠬᠢᠮ ᠰᠢᠬᠦᠯᠳᠡ ᠬᠢᠬᠦ ᠪᠠᠷ ᠪᠤᠯᠪᠠ᠃ 30 ᠭᠠᠷᠤᠢ ᠮᠠᠯᠴᠢᠳ ᠲᠦᠯᠦᠬᠡᠯᠡᠭᠴᠢ ᠪᠤᠯᠤᠨ ᠠᠷᠠᠳ ᠲᠦᠯᠦᠬᠡᠯᠡᠭᠴᠢ  ᠤᠷᠤᠯᠴᠠᠬᠰᠠᠨ ︽ᠲᠠᠯ᠎ᠠ ᠨᠤᠳᠤᠬ ᠰᠢᠬᠦᠬᠦ ᠲᠢᠩᠬᠢᠮ︾ ᠨᠡᠬᠡᠬᠡᠭᠳᠡᠯ᠎ᠡ᠃ ᠮᠠᠯᠴᠢᠳ ᠲᠦᠷᠪᠡᠨ ᠵᠦᠭ ᠠᠴᠠ ᠮᠤᠷᠢ ᠮᠠᠰᠢᠨ   ᠬᠦᠷᠦᠯᠴᠡᠨ ᠢᠷᠡᠵᠦ ᠰᠤᠨᠤᠰᠴᠠᠢ᠃ ᠫᠠᠨ ᡁᠢ ᠷᠦᠩ ᠮᠠᠯᠴᠢᠳ ᠲᠤ ᠤᠷᠤᠰᠤᠮ᠎ᠠ ᠰᠠᠶᠢᠬᠠᠨ ᠮᠤᠩᠭᠤᠯ ᠬᠡᠯᠡ ᠪᠠᠷ ᠡᠨᠡᠬᠦ ᠬᠡᠷᠡᠭ ᠢ  ᠲᠤᠭᠤᠷᠠᠳᠠᠯ᠎ᠠ ᠶᠠᠷᠢᠵᠤ ᠦᠭᠴᠡᠢ᠃ ᠮᠠᠯᠴᠢᠳ ᠡᠬᠦᠨ ᠢ ᠰᠤᠨᠤᠰᠤᠭᠠᠳ᠄ ︽ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠡᠶᠢᠮᠦ ᠶᠠᠷᠢᠶ᠎ᠠ ᠰᠠᠶ᠋ᠢ  ᠰᠤᠨᠤᠰᠴᠤ ᠪᠠᠶᠢᠨ᠎ᠠ᠂ ᠪᠡᠯᠴᠢᠬᠡᠷ ᠢ ᠡᠪᠳᠡᠬᠦ ᠨᠢ ᠪᠠᠰᠠ ᠬᠠᠤᠯᠢ ᠵᠦᠷᠢᠴᠡᠨ᠎ᠡ ᠬᠡᠳᠡᠭ ᠢ ᠤᠳᠤ ᠮᠡᠳᠡᠭᠰᠡᠨ︾ ᠬᠡᠵᠡᠬᠡᠵᠦ ᠪᠠᠶᠢᠯ᠎ᠠ᠃      

    ᠫᠠᠨ ᡁᠢ ᠷᠦᠩ 2011 ᠤᠨ ᠳᠤ ᠨᠢᠬᠡᠨ ᠪᠤᠯᠢᠶᠠᠨ ᠲᠡᠭᠡᠷᠡᠮᠳᠡᠭᠰᠡᠨ ᠬᠡᠷᠡᠭ ᠢ ᠰᠢᠢᠳᠪᠦᠷᠢᠯᠡᠵᠡᠢ᠃ ᠨᠠᠰᠤᠨ ᠳᠤ ᠦᠯᠦ  ᠬᠦᠷᠦᠭᠰᠡᠨ ᠭᠤᠷᠪᠠᠨ ᠬᠡᠷᠡᠭ ᠰᠡᠵᠢᠭᠳᠡᠨ ᠨᠢ ᠴᠦᠮ ᠮᠤᠩᠭᠤᠯ ᠬᠦᠮᠦᠨ ᠪᠠᠶᠢᠵᠤ ᠬᠢᠳᠠᠳ ᠬᠡᠯᠡᠨ ᠳᠡᠭᠡᠨ ᠠᠨᠠᠢ ᠪᠠᠶᠢᠯ᠎ᠠ᠃ ᠲᠠᠩᠨᠠᠨ  ᠪᠠᠶᠢᠴᠠᠭᠠᠬᠤ ᠶᠠᠪᠤᠴᠠ ᠳᠤ᠂ ᠡᠨᠡ ᠭᠤᠷᠪᠠᠨ ᠬᠦᠮᠦᠨ ᠲᠤᠳᠤᠭᠠᠳᠤ ᠬᠠᠮᠠᠭᠠᠯᠠᠬᠤ ᠪᠠᠶᠢᠭᠤᠯᠤᠯᠭ᠎ᠠ ᠠᠰᠠᠭᠤᠯᠳᠠ ᠤᠯᠢᠬᠳᠠᠢ  ᠬᠠᠷᠢᠭᠤᠯᠤᠬᠰᠨᠨ ᠦᠬᠡᠢ᠃ ᠪᠠᠷᠢᠪᠴᠢᠯᠠᠬᠤ ᠵᠦᠪᠰᠢᠶᠡᠷᠡᠬᠦ ᠬᠢᠨᠠᠨ ᠪᠠᠶᠢᠴᠠᠭᠠᠯᠳᠠ ᠶᠠᠪᠤᠴᠠ ᠬᠦᠷᠬᠦ ᠳᠤ ᠫᠠᠨ ᡁᠢ ᠷᠦᠩ  ᠤᠷᠤᠰᠤᠮ᠎ᠠ ᠰᠠᠶᠢᠬᠠᠨ ᠮᠤᠩᠭᠤᠯ ᠬᠡᠯᠡ ᠪᠠᠷ ᠦᠪᠡᠷ ᠢ ᠪᠠᠨ ᠲᠠᠨᠢᠯᠴᠠᠭᠤᠯᠪᠠ᠃ ᠪᠠᠶᠢᠴᠠᠭᠠᠬᠤ ᠠᠵᠢᠯ ᠲᠦᠷᠢᠮᠳᠦ ᠬᠤᠪᠴᠠᠰᠤᠳᠠᠢ  ᠡᠨᠡᠬᠦ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠮᠤᠩᠭᠤᠯ  ᠶᠠᠷᠢᠬᠤ ᠰᠤᠨᠤᠰᠤᠭᠠᠳ ᠳᠡᠳᠡ ᠭᠤᠷᠪᠠᠭᠤᠯᠠ ᠮᠡᠳᠡᠭᠳᠡᠮ᠎ᠡ ᠲᠠᠶᠢᠪᠤᠰᠢᠷᠠᠵᠠᠢ᠃  ︽ᠬᠡᠷ ᠲᠡᠭᠡᠨ ᠬᠡᠳᠦᠬᠦᠯᠡ ᠪᠤᠢ︖ ᠠᠮᠢᠳᠤᠷᠠᠯ ᠵᠦᠬᠡᠷ ᠦᠦ︖ ᠬᠦᠴᠢᠷ ᠪᠠᠶᠢᠪᠠᠯ ᠶᠠᠷᠢᠵᠤ ᠪᠤᠯᠤᠨ᠎ᠠ᠂ ᠪᠢ ᠴᠢᠳᠠᠯ   ᠬᠠᠪᠰᠤᠷᠤᠶ᠎ᠠ᠃ ᠲᠠᠨᠠᠷ ᠨᠠᠰᠤ ᠴᠢᠨᠢ ᠪᠠᠭ᠎ᠠ ᠪᠠᠶᠢᠬᠰᠠᠭᠠᠷ᠂ ᠵᠦᠪᠬᠡᠨ ᠦᠨᠡᠨ ᠰᠡᠳᠬᠢᠯ ᠠᠴᠠ ᠪᠠᠨ ᠬᠡᠮᠰᠢᠨ ᠬᠠᠯᠠᠬᠤ ᠳᠤ ᠯᠡ  ᠬᠦᠷᠪᠡᠯ ᠵᠠᠮ ᠬᠦᠵᠦᠬᠦᠦ ᠴᠢᠨᠢ  ᠤᠷᠳᠤ ᠪᠠᠶᠢᠨ᠎ᠠ︾ ᠬᠡᠵᠦ ᠫᠠᠨ ᡁᠢ ᠷᠦᠩ ᠢ ᠶᠠᠷᠢᠵᠤ ᠲᠠᠭᠤᠰᠬᠤ ᠳᠤ᠂ ᠭᠤᠷᠪᠠᠨ ᠬᠦᠮᠦᠨ ᠪᠦᠬᠦ  ᠬᠡᠷᠡᠭ ᠪᠠᠶᠢᠳᠠᠯ ᠲᠤᠰᠢᠶᠠᠬᠰᠠᠨ ᠪᠦᠬᠡᠳ ᠪᠠᠰᠠ ᠨᠢᠬᠡᠨ ᠬᠠᠤᠯᠢ ᠴᠠᠭᠠᠵᠠ ᠪᠠᠶᠢᠭᠤᠯᠤᠯᠭ᠎ᠠ ᠡᠵᠡᠮᠰᠢᠬᠡᠳᠦᠢ ᠪᠠᠶᠢᠬᠰᠠᠨ  ᠪᠤᠯᠢᠶᠠᠨ ᠲᠡᠭᠡᠷᠡᠮᠳᠡᠭᠰᠡᠨ ᠬᠡᠷᠡᠭ ᠲᠤᠰᠢᠶᠠᠬᠰᠠᠨ ᠪᠠᠶᠢᠯ᠎ᠠ᠃ ᠡᠬᠦᠨ ᠠᠴᠠ ᠲᠠᠷᠠᠭ᠎ᠠ ᠶᠠᠯ᠎ᠠ ᠬᠢᠭᠰᠡᠨ ᠭᠤᠷᠪᠠᠨ ᠰᠡᠵᠢᠭᠳᠡᠨ᠄ ︽ᠫᠠᠨ  ᠲᠠᠷᠤᠭ᠎ᠠ ᠶᠠᠷᠢᠶ᠎ᠠ ᠰᠤᠨᠤᠰᠬᠤ ᠳᠤ ᠲᠤᠩ ᠬᠠᠯᠠᠭᠤᠬᠠᠨ ᠰᠠᠨᠠᠬᠳᠠᠬᠰᠠᠨ᠂ ᠲᠡᠷᠡ ᠪᠢᠳᠡᠨ ᠢ ᠠᠯᠳᠠᠭ᠎ᠠ ᠭᠠᠷᠭᠠᠬᠰᠠᠨ ᠬᠡᠵᠦ  ᠲᠤᠤᠷ᠎ᠠ ᠦᠵᠡᠭᠰᠡᠨ ᠦᠬᠡᠢ᠂ ᠬᠠᠷᠢᠨ ᠮᠠᠨᠤᠰ ᠲᠦᠯᠦᠬᠡ ᠪᠤᠳᠤᠵᠤ ᠪᠠᠶᠢᠬᠰᠠᠨ᠂ ᠪᠢᠳᠡ ᠬᠤᠵᠢᠮ ᠰᠠᠶᠢᠨ ᠬᠦᠮᠦᠨ ᠪᠤᠯᠵᠤ ᠳᠠᠬᠢᠵᠤ ᠬᠠᠤᠯᠢ ᠵᠦᠷᠢᠴᠡᠬᠦ ᠦᠬᠡᠢ︾ ᠬᠡᠰᠡᠨ ᠪᠠᠶᠢᠯ᠎ᠠ ᠁       

    ᠮᠠᠯᠴᠢᠳ ᠰᠠᠶᠢᠨ ᠠᠨᠳᠠ        
    ᠫᠠᠨ ᡁᠢ ᠷᠦᠩ ᠢ ᠠᠬᠠᠮᠠᠳ ᠬᠦᠮᠦᠰ ︽ᠬᠦᠦ ᠮᠢᠨᠢ︾ ᠬᠡᠵᠦ ᠲᠤᠳᠤᠨᠤᠴᠢᠯᠠᠨ ᠲᠠᠭᠤᠳᠠᠬᠤ ᠳᠤ ᠵᠠᠯᠠᠭᠤᠰ ︽ᠫᠠᠨ ᠭᠤᠸᠠᠢ︾  ᠬᠡᠵᠦ ᠬᠦᠨᠳᠦᠳᠬᠡᠨ ᠲᠠᠭᠤᠳᠠᠳᠠᠬ᠃ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠤᠭᠠᠳᠤ ᠬᠤᠰᠢᠭᠤᠨ ᠪᠠᠶᠠᠠᠬᠤᠸᠠ ᠪᠠᠯᠭᠠᠰᠤᠨ ᠳᠤ ᠰᠠᠭᠤᠳᠠᠬ  ᠲᠦᠪᠴᠢᠨ ᠪᠤᠯ ᠲᠦᠷᠬᠡᠨ ᠠᠭᠤᠷ ᠲᠠᠢ ᠬᠦᠮᠦᠨ᠂ ᠨᠡᠩ ᠴᠤ ᠬᠡᠳᠦᠨ ᠬᠤᠨᠳᠠᠭ᠎ᠠ ᠪᠠᠯᠭᠤᠴᠢᠬᠠᠪᠠᠯ ᠬᠡᠨ ᠢ ᠴᠤ ᠬᠠᠪᠢᠳᠠᠭᠤᠯᠬᠤ ᠦᠬᠡᠢ᠃  ᠬᠡᠳᠡᠯ᠎ᠡ ᠲᠦᠪᠴᠢᠨ ᠫᠠᠨ ᡁᠢ ᠷᠦᠩ ᠦᠬᠡᠨ ᠳᠤ ᠤᠷᠤᠳᠠᠬ᠃ ︽ᠤᠴᠢᠷ ᠨᠢ ᠪᠢᠳᠡ ᠪᠤᠯ ᠠᠨᠳᠠ ᠶᠤᠮ︾ ᠬᠡᠵᠦ ᠲᠦᠪᠴᠢᠨ  ᠦᠪᠡᠷ ᠶᠠᠷᠢᠳᠠᠬ ᠪᠠᠶᠢᠵᠠᠢ᠃ ᠲᠦᠪᠴᠢᠨ 1996 ᠤᠨ ᠳᠤ ᠵᠡᠷᠬᠡᠯᠡᠳᠡᠭᠡ ᠬᠡᠷ ᠡᠷᠳᠡᠨᠢ ᠲᠠᠢ ᠠᠷᠢᠬᠢ ᠤᠤᠭᠤᠵᠤ ᠠᠮᠠ  ᠵᠦᠷᠢᠬᠡᠳ ᠵᠤᠳᠤᠯᠳᠤᠵᠤ ᠡᠷᠳᠡᠨᠢ ᠰᠢᠷᠠᠬᠳᠤᠵᠤ ᠨᠢᠬᠡ ᠴᠠᠬ ᠠᠭᠤᠷ  ᠴᠠᠬᠳᠠᠭ᠎ᠠ ᠳᠤ ᠮᠡᠳᠡᠬᠦᠯᠪᠠ᠃ ᠰᠡᠬᠦᠯ ᠳᠤᠨᠢ ᠲᠤᠰ  ᠬᠡᠷᠡᠭ ᠢ ᠪᠠᠶᠢᠴᠠᠭᠠᠬᠤ ᠬᠤᠷᠢᠶᠠᠨ ᠳᠤ ᠰᠢᠯᠵᠢᠬᠦᠯᠦᠨ ᠦᠭᠴᠦ ᠫᠠᠨ ᡁᠢ ᠷᠦᠩ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠪᠤᠯᠤᠬᠰᠠᠨ ᠪᠠᠶᠢᠯ᠎ᠠ᠃  ᠲᠦᠪᠴᠢᠨ ᠠᠷᠢᠬᠢ ᠤᠤᠭᠤᠵᠤ ᠵᠤᠳᠤᠯᠳᠤᠬᠰᠠᠨ ᠵᠢᠭᠠᠬᠠᠨ ᠤᠴᠢᠷ ᠢ ᠶᠡᠬᠡᠰᠬᠡᠨ ᠬᠠᠤᠯᠢ ᠪᠠᠷ ᠬᠡᠯᠡᠯᠴᠡᠬᠦ ᠪᠤᠯᠤᠬᠰᠠᠨ ᠳᠤ ᠮᠠᠰᠢ ᠲᠤᠷ᠎ᠠ  ᠦᠬᠡᠶᠢᠴᠡᠵᠦ ᠪᠠᠶᠢᠪᠡ᠃ ᠫᠠᠨ ᡁᠢ ᠷᠦᠩ ᠲᠡᠭᠦᠨ ᠢ ᠬᠠᠯᠠᠰᠢᠷᠠᠯ ᠦᠬᠡᠢ ᠢᠳᠬᠠᠨ᠄ ︽ᠲᠠ ᠬᠤᠶᠠᠭᠤᠯᠠ ᠪᠤᠯ ᠰᠠᠶᠢᠨ ᠠᠬ᠎ᠠ ᠲᠡᠬᠦᠦ  ᠪᠤᠯᠬᠤᠷ ᠨᠢᠬᠡ ᠴᠠᠬ ᠠᠭᠤᠷ  ᠡᠪ ᠨᠠᠶᠢᠷ ᠡᠪᠳᠡᠵᠦ ᠪᠤᠯᠬᠤ ᠦᠬᠡᠢ᠂ ᠶᠠᠭᠤ ᠴᠤ ᠬᠡᠰᠡᠨ ᠲᠠ ᠬᠦᠮᠦᠨ ᠢ  ᠰᠢᠷᠠᠬᠳᠤᠭᠤᠯᠤᠬᠰᠠᠨ ᠶᠤᠮ ᠴᠢᠨᠢ ᠡᠬᠦᠷᠬᠡᠯᠡᠪᠡᠰᠦ ᠵᠤᠬᠢᠬᠤ ᠬᠠᠤᠯᠢ ᠬᠠᠷᠢᠭᠤᠴᠠᠯᠭ᠎ᠠ ᠡᠬᠦᠷᠬᠡᠯᠡᠪᠡᠯ ᠵᠤᠬᠢᠨ᠎ᠠ︾ ᠬᠡᠰᠡᠨ ᠪᠠᠶᠢᠯ᠎ᠠ  ᠃ ᠬᠠᠮᠤᠬ ᠰᠡᠬᠦᠯ ᠳᠤᠨᠢ᠂ ᠲᠦᠪᠴᠢᠨ ᠶᠠᠯ᠎ᠠ ᠪᠠᠨ ᠮᠡᠳᠡᠷᠡᠵᠦ ᠲᠦᠯᠦᠪᠦᠷᠢ ᠮᠦᠩᠬᠦ ᠲᠦᠯᠦᠭᠰᠡᠨ ᠴᠤ ᠠᠭᠤᠷ ᠨᠢ  ᠲᠠᠶᠢᠳᠬᠤᠷᠠᠬᠰᠠᠨ ᠦᠬᠡᠢ᠂ ᠬᠠᠷᠢᠨ ᠬᠤᠶᠠᠷ ᠬᠡᠷ ᠵᠦᠷᠢᠴᠡᠯ ᠤᠯᠠᠮ  ᠬᠤᠷᠴᠠᠳᠤᠨ ᠴᠢᠨᠠᠬᠰᠢᠯᠠᠨ ᠶᠠᠪᠤᠯᠴᠠᠬᠤ ᠪᠠᠨ ᠪᠤᠯᠢᠵᠠᠢ᠃  ᠡᠳᠡᠬᠡᠷ ᠤᠴᠢᠷ ᠢ ᠭᠠᠳᠠᠷᠯᠠᠬᠰᠠᠨ ᠫᠠᠨ ᡁᠢ ᠷᠦᠩ ᠲᠦᠪᠴᠢᠨ ᠬᠡᠷ ᠲᠤ ᠬᠦᠷᠴᠦ᠄ ︽ᠲᠠ ᠴᠢᠨᠢ ᠪᠤᠰᠤᠭ᠎ᠠ ᠡᠷ᠎ᠡ ᠬᠦᠮᠦᠨ  ᠪᠠᠶᠢᠭᠠᠳ ᠡᠨᠡ ᠵᠢᠭᠠᠬᠠᠨ ᠤᠴᠢᠷ ᠲᠤ ᠠᠭᠤᠷᠯᠠᠨ᠎ᠠ ᠬᠡᠵᠢ ᠦᠦ᠂ ᠬᠤᠵᠢᠮ ᠵᠢᠭᠠᠬᠠᠨ ᠤᠴᠢᠷ ᠲᠤ ᠪᠢᠳᠡᠬᠡᠢ ᠵᠤᠳᠤᠯᠳᠤ᠂ ᠰᠠᠶᠢᠬᠠᠨ  ᠠᠮᠢᠳᠤᠷᠠ︾ ᠬᠡᠵᠦ ᠢᠳᠬᠠᠨ ᠰᠠᠨᠠᠭᠤᠯᠵᠠᠢ᠃ ᠫᠠᠨ ᡁᠢ ᠷᠦᠩ ᠡᠷᠳᠡᠨᠢ ᠬᠡᠷ ᠲᠤ ᠬᠦᠷᠦᠭᠡᠳ ᠪᠠᠰᠠ ᠡᠪᠳᠡᠢ ᠦᠬᠡ ᠪᠠᠷ  ᠢᠳᠬᠠᠵᠤ᠄ ︽ᠡᠷ᠎ᠡ ᠬᠦᠮᠦᠨ ᠴᠡᠬᠡᠵᠢᠨ ᠳᠤ ᠡᠮᠡᠬᠡᠯ ᠬᠠᠵᠠᠭᠠᠷ ᠲᠠᠢ ᠮᠤᠷᠢ ᠡᠷᠬᠢᠯᠳᠦᠨ᠎ᠡ ᠬᠡᠳᠡᠭ᠂ ᠡᠳᠦ᠋ᠢᠴᠢᠨᠡᠬᠡᠨ ᠵᠢᠯ ᠠᠶᠢᠯ  ᠵᠡᠷᠬᠡᠯᠡᠳᠡᠭᠡ ᠰᠠᠭᠤᠴᠢᠬᠠᠭᠠᠳ ᠵᠢᠭᠠᠬᠠᠨ ᠤᠴᠢᠷ ᠠᠴᠠ ᠪᠤᠯᠵᠤ ᠡᠪ ᠨᠠᠶᠢᠷ ᠪᠦᠦ ᠬᠡᠮᠳᠦᠬᠡ︾ ᠬᠡᠵᠠᠢ᠃ ᠢᠩᠬᠢᠬᠡᠳ ᠲᠡᠮᠡᠢ ᠤᠳᠠᠯ  ᠦᠬᠡᠢ ᠲᠦᠪᠴᠢᠨ ᠪᠤᠯᠤᠨ ᠡᠷᠳᠡᠨᠢ ᠤᠤᠯ ᠰᠢᠬ ᠡᠶ᠎ᠡ ᠡᠪ ᠲᠠᠢ ᠪᠤᠯᠤᠬᠰᠠᠨ ᠪᠠᠶᠢᠯ᠎ᠠ᠃ ᠨᠢᠬᠡᠨ ᠤᠳᠠᠭ᠎ᠠ ᠲᠦᠪᠴᠢᠨ  ᠬᠡᠦᠬᠡᠳ ᠰᠤᠷᠤᠯᠭ᠎ᠠ ᠰᠦᠢᠳᠬᠡᠯ ᠢ ᠦᠭᠴᠦ ᠲᠡᠶᠢᠯᠬᠦ ᠦᠬᠡᠢ ᠪᠤᠯᠵᠤ ᠫᠠᠨ ᡁᠢ ᠷᠦᠩ ᠳᠤ ᠤᠳᠠᠰᠤᠳᠠᠬᠰᠠᠨ ᠳᠤ ᠲᠡᠷᠡ  ᠬᠡᠷ ᠠᠴᠠ ᠪᠠᠨ 3000 ᠲᠦᠬᠦᠷᠢᠭ ᠠᠪᠴᠤ ᠲᠦᠪᠴᠢᠨ ᠬᠡᠷ ᠲᠤ ᠬᠦᠷᠴᠦ ᠭᠠᠷᠳᠠᠭᠤᠯᠵᠠᠢ᠃ 2006 ᠤᠨ ᠳᠤ ᠪᠠᠶᠠᠨᠬᠤᠸᠠ  ᠪᠠᠯᠭᠠᠰᠤᠨ ᠳᠤ ᠶᠡᠭᠡ ᠴᠠᠰᠤ ᠤᠷᠤᠵᠤ ᠮᠠᠯᠴᠢᠳ ᠡᠪᠡᠰᠦ ᠪᠤᠷᠳᠤᠭ᠎ᠠ ᠠᠪᠴᠤ ᠬᠤᠨᠢ ᠪᠠᠨ ᠡᠪᠡᠰᠦᠯᠡᠬᠦ ᠬᠡᠷᠡᠭ ᠲᠠᠢ ᠪᠤᠯᠪᠠ᠃  ᠲᠦᠪᠴᠢᠨ ᠭᠠᠷ ᠲᠤᠨᠢ ᠮᠦᠩᠬᠦ ᠦᠬᠡᠢ ᠪᠤᠯᠬᠤᠷ ᠭᠠᠷ ᠨᠤᠬᠤᠯᠡᠨ ᠭᠠᠴᠢᠬᠳᠠᠬᠤ ᠳᠠᠭᠠᠨ ᠮᠦᠨ ᠯᠡ ᠫᠠᠨ ᡁᠢ ᠷᠦᠩ ᠢ ᠡᠷᠢᠯ᠎ᠡ᠃  ᠫᠠᠨ ᡁᠢ ᠷᠦᠩ ᠲᠦᠪᠴᠢᠨ ᠢ ᠲᠠᠭᠠᠭᠤᠯᠤᠨ ᠪᠠᠩᠬᠢ ᠠᠴᠠ ᠵᠢᠬᠡᠯᠡᠯᠬᠡ ᠡᠷᠡᠮᠡᠯᠵᠡᠯᠡᠨ ᠦᠪᠡᠷ ᠲᠡᠭᠡᠨ ᠪᠠᠳᠤᠯᠠᠬᠴᠢ ᠬᠦᠮᠦᠨ ᠪᠤᠯᠵᠤ  ᠲᠦᠪᠴᠢᠨ ᠬᠦᠴᠢᠷᠳᠡᠯ ᠢ ᠰᠢᠢᠳᠪᠦᠷᠢᠯᠡᠵᠦ ᠦᠭᠴᠡᠢ᠃ ᠡᠨᠡ ᠮᠡᠳᠦ ᠪᠠᠷ ᠫᠠᠨ ᡁᠢ ᠷᠦᠩ ᠲᠦᠪᠴᠢᠨ ᠳᠤ 6 ᠵᠢᠯ ᠪᠠᠳᠤᠯᠠᠬᠴᠢ  ᠪᠤᠯᠤᠬᠰᠠᠨ ᠬᠡᠳᠡᠭ᠃ ᠬᠡᠳᠦᠨ ᠵᠢᠯ ᠲᠠᠷᠠᠭᠠᠯᠠᠨ ᠬᠠᠪᠤᠷ ᠪᠤᠯᠬᠤ ᠪᠦᠷᠢ ᠳᠤ ᠲᠦᠪᠴᠢᠨ ᠬᠢ ᠡᠪᠡᠰᠦ ᠪᠤᠷᠳᠤᠭ᠎ᠠ ᠠᠪᠬᠤ ᠪᠤᠯᠬᠤ ᠳᠤ᠂  ᠬᠡᠷ ᠨᠢ ᠪᠠᠯᠭᠠᠰᠤᠨ ᠠᠴᠠ ᠬᠤᠯᠠ ᠪᠤᠯᠬᠤᠷ ᠡᠪᠡᠰᠦ ᠪᠤᠷᠳᠤᠭᠠᠨ ᠲᠡᠷᠬᠡ ᠬᠦᠷᠬᠡᠵᠦ ᠦᠭᠳᠡᠭ ᠦᠬᠡᠢ᠃ ᠡᠬᠦᠨ ᠳᠤ ᠫᠠᠨ ᡁᠢ ᠷᠦᠩ  ᠤᠳᠠᠭ᠎ᠠ ᠪᠤᠯᠭᠠᠨ ᠲᠡᠷᠬᠡ ᠬᠠᠷᠢᠯᠴᠠᠵᠦ᠂ ᠲᠦᠪᠴᠢᠨ ᠪᠤᠯᠤᠨ ᠲᠡᠳᠡᠨ ᠠᠶᠢᠯ ᠰᠠᠭᠠᠬᠠᠯᠳᠠ ᠮᠠᠯᠴᠢᠳ ᠲᠤ ᠡᠪᠡᠰᠦ ᠪᠤᠷᠳᠤᠭ᠎ᠠ  ᠬᠦᠷᠬᠡᠵᠦ ᠦᠭᠳᠡᠭ ᠪᠠᠶᠢᠯ᠎ᠠ᠃ ᠫᠠᠨ ᡁᠢ ᠷᠦᠩ ᠬᠠᠪᠰᠤᠷᠤᠯᠭ᠎ᠠ ᠪᠠᠷ᠂ ᠶᠠᠳᠠᠭᠤ ᠵᠦᠳᠡᠬᠦᠦ ᠠᠮᠢᠳᠤᠷᠠᠯ ᠲᠠᠢ ᠪᠠᠶᠢᠬᠰᠠᠨ  ᠲᠦᠪᠴᠢᠨ ᠬᠢ ᠪᠠᠶᠠᠵᠢᠨ ᠴᠢᠨᠡᠬᠡᠯᠢᠭᠵᠢᠵᠡᠢ᠃ ᠲᠦᠪᠴᠢᠨ ᠬᠡᠳᠦ᠋ᠢᠪᠡᠷ ᠠᠮᠠᠨ ᠲᠡᠭᠡᠷ᠎ᠡ ᠪᠠᠨ ᠶᠠᠷᠢᠬᠤ ᠦᠬᠡᠢ ᠪᠤᠯᠪᠠᠴᠤ ᠠᠷᠢᠬᠢ  ᠤᠤᠭᠤᠵᠤ ᠬᠠᠯᠠᠰᠤᠮᠠᠬᠴᠠ᠄ ︽ᠠᠷᠪᠠᠨ ᠬᠡᠳᠦᠨ ᠵᠢᠯ ᠪᠤᠯᠴᠢᠬᠠᠯ᠎ᠠ᠂ ᠫᠠᠨ ᡁᠢ ᠷᠦᠩ ᠨᠠᠮᠠᠶᠢ ᠬᠡᠴᠢᠨᠡᠨ ᠬᠠᠪᠰᠤᠷᠴᠤ ᠦᠩᠬᠡᠷᠡᠭᠰᠡᠨ ᠢ  ᠪᠢ ᠨᠢᠬᠡᠨᠳᠡ ᠮᠡᠳᠡᠬᠦ ᠪᠠᠨ ᠪᠠᠶᠢᠬᠰᠨᠨ᠃ ᠦᠨᠡᠨ ᠢ ᠬᠡᠯᠡᠪᠡᠯ ᠲᠡᠷᠡ ᠪᠤᠯ ᠬᠡᠷᠡᠭ ᠰᠢᠢᠳᠪᠦᠷᠢᠯᠡᠳᠡᠭ ᠬᠦᠮᠦᠨ᠃ ᠬᠡᠳᠡᠯ᠎ᠡ ᠲᠡᠷᠡ  ᠬᠡᠷᠡᠭ ᠰᠢᠢᠳᠪᠦᠷᠢᠯᠡᠵᠦ ᠪᠠᠷᠠᠭᠠᠳ ᠪᠠᠰᠠ ᠨᠠᠮᠠᠶᠢ ᠬᠠᠪᠰᠤᠷᠤᠬᠰᠠᠨ᠃ ᠫᠠᠨ ᡁᠢ ᠷᠦᠩ ᠪᠤᠯ ᠮᠢᠨᠤ ᠡᠨᠡ ᠨᠠᠰᠤᠨ ᠰᠠᠶᠢᠨ ᠠᠨᠳᠠ  ᠰᠢᠦ︕︾ ᠬᠡᠵᠦ ᠦᠨᠡᠨ ᠵᠢᠷᠦᠬᠡᠨ ᠦᠬᠡ ᠪᠠᠨ ᠠᠭᠤᠳᠠᠯᠳᠠᠬ᠃ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠲᠠᠯ᠎ᠠ ᠳᠤ᠂ ᠴᠤᠬᠤᠮ ᠬᠡᠴᠢᠨᠡᠨ  ᠬᠦᠮᠦᠨ ᠲᠦᠪᠴᠢᠨ ᠲᠠᠢ ᠠᠳᠠᠯᠢ ᠪᠠᠷ ᠫᠠᠨ ᡁᠢ ᠷᠦᠩ ᠲᠡᠮᠵᠢᠯᠬᠡ ᠤᠯᠤᠬᠰᠠᠨ ᠢ ᠪᠦᠦ ᠮᠡᠳᠡ᠃       

    ᠪᠠᠶᠢᠴᠠᠭᠠᠬᠤ ᠲᠠᠰᠤᠬ  ᠬᠡᠷ ᠪᠤᠯᠭᠠᠬᠰᠠᠨ ᠨᠢ       
    ᠫᠠᠨ ᡁᠢ ᠷᠦᠩ ᠪᠡᠶ᠎ᠡ ᠵᠡᠷᠬᠡ ᠳᠤ ᠬᠦᠷᠦᠬᠡᠳ ᠶᠠᠩ ᠱᠦ ᠮᠸᠢ ᠬᠡᠳᠡᠭ ᠬᠡᠤᠬᠡᠨ ᠲᠠᠢ ᠬᠡᠷᠯᠡᠵᠦ ᠠᠮᠢᠳᠤᠷᠠᠵᠠᠢ᠃ ᠫᠠᠨ ᡁᠢ ᠷᠦᠩ  ᠠᠬ᠎ᠠ ᠡᠬᠡᠴᠢ ᠲᠡᠬᠦᠦ ᠵᠢᠷᠭᠤᠭᠤᠯᠠ ᠪᠤᠯᠬᠤᠷ ᠠᠪᠤ ᠡᠵᠢ ᠲᠠᠷᠤᠭᠠᠰᠤ ᠬᠦᠩᠬᠡᠯᠡᠬᠦ ᠪᠤᠳᠤᠵᠤ᠂ ᠨᠢᠬᠡᠨ ᠦᠬᠢᠨ  ᠲᠡᠬᠦᠦ ᠪᠠᠨ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠨ ᠠᠶᠢᠯ ᠳᠤ ᠮᠤᠷᠳᠠᠬᠤ ᠪᠤᠯᠳᠠᠯ᠎ᠠ ᠨᠢ ᠬᠠᠮᠢᠶᠠᠷᠴᠤ ᠬᠠᠷᠠᠭᠠᠯᠵᠠᠯ᠎ᠠ᠃ ᠫᠠᠨ ᡁᠢ ᠷᠦᠩ  ᠠᠬ᠎ᠠ ᠬᠢ ᠬᠡᠦᠬᠡᠳ ᠤᠯᠠᠨᠳᠠᠢ ᠪᠠᠶᠢᠵᠤ᠂ ᠰᠢᠨ᠎ᠡ ᠰᠤᠷᠤᠯᠭ᠎ᠠ ᠬᠤᠭᠤᠴᠠᠭ᠎ᠠ ᠡᠬᠢᠯᠡᠬᠦ ᠪᠤᠯᠭᠠᠨ ᠫᠠᠨ ᡁᠢ ᠷᠦᠩ  ᠠᠴᠢ ᠰᠤᠷᠤᠯᠭ᠎ᠠ ᠰᠦᠢᠳᠬᠡᠯ ᠢ ᠨᠢ ᠪᠡᠯᠡᠳᠬᠡᠵᠦ ᠦᠭᠳᠡᠭ᠃ ᠫᠠᠨ ᡁᠢ ᠷᠦᠩ ᠶᠠᠩ ᠱᠦ ᠮᠸᠢ ᠬᠤᠶᠠᠭᠤᠯᠠ  ᠬᠤᠷᠢᠮᠯᠠᠬᠤ ᠦᠶ᠎ᠡ ᠬᠡᠷ ᠨᠢ ᠫᠠᠨ ᡁᠢ ᠷᠦᠩ ᠪᠠᠶᠢᠭᠤᠯᠤᠯᠭ᠎ᠠ ᠡᠬᠦᠳᠡᠨ ᠬᠡᠷ ᠪᠠᠶᠢᠵᠤ᠂ ᠲᠠᠷᠠᠭ᠎ᠠ ᠨᠢ ᠬᠤᠰᠢᠭᠤᠨ ᠠᠴᠠ  ᠠᠷᠪᠠᠨ ᠬᠡᠳᠦᠨ ᠭᠠᠵᠠᠷ ᠵᠠᠶᠢᠳᠠᠢ ᠨᠢᠬᠡᠨ ᠪᠠᠶᠢᠰᠢᠩ ᠬᠡᠷ ᠠᠪᠴᠤ ᠰᠠᠭᠤᠯ᠎ᠠ᠃ ᠫᠠᠨ ᡁᠢ ᠷᠦᠩ ᠬᠡᠷ ᠨᠢ ᠠᠵᠢᠯᠯᠠᠬᠤ ᠭᠠᠵᠠᠷ ᠠᠴᠠ  ᠬᠡᠳᠦᠷᠬᠡᠢ ᠬᠤᠯᠠ ᠪᠤᠯᠬᠤᠷ ᠮᠦᠩᠬᠦ ᠴᠤᠬᠯᠠᠭᠤᠯᠤᠨ ᠮᠤᠲ᠋ᠤᠷ ᠠᠪᠬᠤ ᠪᠠᠷ ᠵᠡᠬᠡᠵᠡᠢ᠃ ᠬᠡᠳᠡᠯ᠎ᠡ ᠫᠠᠨ ᡁᠢ ᠷᠦᠩ ᠵᠢᠭᠠᠬᠠᠨ ᠮᠦᠩᠬᠦ ᠲᠠᠢ  ᠪᠤᠯᠤᠮᠠᠬᠴᠠ ᠬᠦᠳᠡᠭᠡ ᠳᠤ ᠪᠠᠶᠢᠭ᠎ᠠ ᠠᠪᠤ ᠡᠵᠢ ᠪᠠᠨ ᠲᠤᠰᠴᠤ ᠠᠪᠴᠢᠷᠠᠨ᠂ ᠲᠡᠮᠡᠢ ᠤᠳᠠᠯ ᠦᠬᠡᠢ ᠪᠠᠰᠠ ᠠᠬ᠎ᠠ ᠡᠬᠡᠴᠢ  ᠲᠡᠬᠦᠦᠨᠠᠷ ᠲᠡᠮᠵᠢᠭᠰᠡᠨ ᠪᠤᠯᠬᠤᠷ ᠮᠦᠩᠬᠦ ᠴᠤᠬᠯᠠᠭᠤᠯᠵᠤ ᠲᠡᠶᠢᠯᠦᠭᠰᠡᠨ ᠦᠬᠡᠢ ᠪᠠᠶᠢᠯ᠎ᠠ᠃ ᠬᠡᠳᠡᠯ᠎ᠡ ᠠᠷᠭᠠᠯᠠᠵᠦ ᠪᠠᠶᠢᠭᠠᠳ ᠮᠤᠲ᠋ᠤᠷ  ᠠᠪᠴᠤ ᠤᠨᠤᠭᠠᠳ ᠬᠡᠷ  ᠬᠠᠭᠠᠷᠠᠳᠠᠯ᠎ᠠ ᠪᠠᠶᠠᠷᠯᠠᠵᠠᠢ᠃ ᠫᠠᠨ ᡁᠢ ᠷᠦᠩ ᠡᠷ᠎ᠡ ᠡᠮ᠎ᠡ ᠬᠤᠶᠠᠭᠤᠯᠠ ᠬᠦᠦ ᠪᠠᠨ ᠮᠤᠲ᠋ᠤᠷ   ᠰᠤᠷᠭᠠᠭᠤᠯᠢ ᠳᠤᠨᠢ ᠬᠦᠷᠭᠡᠵᠦ ᠠᠵᠢᠯ ᠳᠠᠭᠠᠨ ᠶᠠᠪᠤᠵᠤ ᠪᠠᠶᠢᠵᠠᠢ᠃ ᠨᠢᠬᠡ ᠮᠡᠳᠡᠬᠦ ᠳᠤ ᠡᠨᠡ ᠮᠤᠲ᠋ᠤᠷ ᠢ ᠤᠨᠤᠭᠠᠳ ᠪᠦᠬᠦᠯᠢ ᠠᠷᠪᠠᠨ  ᠵᠢᠯ ᠨᠢᠭᠤᠷ ᠦᠵᠡᠵᠡᠢ᠃ ᠫᠠᠨ ᡁᠢ ᠷᠦᠩ ᠬᠠᠵᠠᠭᠤᠳᠡᠬᠢ ᠬᠦᠮᠦᠰ ᠬᠤᠶᠢᠨ᠎ᠠ ᠬᠤᠶᠢᠨ᠎ᠡ ᠠᠴᠠ ᠪᠠᠨ ᠠᠰᠠᠷ ᠲᠤ ᠨᠡᠬᠦᠨ  ᠤᠷᠤᠯ᠎ᠠ᠃ ᠫᠠᠨ ᡁᠢ ᠷᠦᠩ ᠵᠤᠷᠢᠬ ᠭᠠᠷᠭᠠᠨ ᠠᠳᠡ ᠲᠡᠨᠳᠡ ᠠᠴᠠ ᠵᠤᠭᠤᠰ ᠴᠤᠬᠯᠠᠭᠤᠯᠤᠨ ᠵᠢᠬᠡᠯᠡᠯᠬᠡ ᠠᠪᠤᠭᠠᠳ ᠠᠰᠠᠷ ᠬᠠᠮᠤᠭ  ᠳᠡᠭᠡᠳᠦ ᠲᠠᠪᠬᠤᠷᠯᠢᠬ ᠠᠴᠠ ᠬᠡᠷ ᠠᠪᠤᠯ᠎ᠠ᠃ ᠡᠳᠡᠬᠡᠷ ᠵᠢᠬᠡᠯᠡᠯᠬᠡ ᠪᠠᠨ ᠪᠤᠴᠠᠭᠠᠬᠤ ᠲᠦᠯᠦᠬᠡ ᠫᠠᠨ ᡁᠢ ᠷᠦᠩ ᠬᠢ ᠨᠡᠩ  ᠶᠡᠬᠡᠪᠡᠷ ᠠᠷᠪᠢᠯᠠᠨ ᠭᠠᠮᠨᠠᠬᠤ ᠪᠤᠯᠵᠠᠢ᠃ ᠰᠢᠨᠡᠬᠡᠨ ᠠᠪᠤᠬᠰᠠᠨ ᠬᠡᠷ ᠲᠦᠬᠦᠮᠬᠡᠨ ᠴᠤᠬᠤᠢᠢᠳᠠᠭᠠᠳ ᠨᠢᠬᠡ ᠪᠦᠯᠦᠭ ᠬᠠᠭᠤᠴᠢᠨ  ᠬᠡᠷ ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠠᠪᠴᠠᠢ᠃ ᠲᠡᠳᠡᠨ ᠬᠡᠷ ᠲᠤ ᠠᠮᠢᠳᠤᠷᠠᠯ ᠵᠠᠪᠠᠯ ᠱᠠᠭᠠᠷᠳᠠᠬᠳᠠᠬᠤ ᠵᠦᠢᠯᠡᠰ ᠠᠴᠠ ᠦᠬᠡᠷ᠎ᠡ ᠤᠨᠴᠠᠭᠠᠢ  ᠶᠠᠭᠤᠮ᠎ᠠ ᠪᠠᠶᠢᠭ᠎ᠠ ᠦᠬᠡᠢ᠃ ᠫᠠᠨ ᡁᠢ ᠷᠦᠩ ᠬᠦᠦ ᠳᠡᠭᠡᠨ ᠱᠠᠬᠠᠢ ᠠᠪᠬᠤ ᠳᠠᠭᠠᠨ ᠢᠯᠡᠬᠦᠦ ᠨᠢᠬᠡ ᠵᠢᠯ ᠡᠮᠦᠰᠬᠦ ᠪᠤᠳᠤᠵᠤ ᠢᠯᠡᠬᠦᠦ  ᠨᠢᠬᠡ ᠨᠤᠮᠧᠷ ᠱᠠᠬᠠᠢ ᠠᠪᠴᠤ ᠡᠮᠦᠰᠦᠬᠦᠯᠦᠨ᠎ᠡ᠃ ᠬᠦᠦ ᠨᠢ ᠪᠠᠰᠠ ᠬᠡᠳᠦᠨ ᠲᠠᠪᠬᠤᠷ ᠤᠯᠠᠪᠴᠢ ᠲᠡᠪᠢᠰᠦᠬᠡᠳ ᠡᠮᠦᠰᠳᠡᠭ ᠪᠠᠶᠢᠯ᠎ᠠ  ᠃ ᠡᠨᠡ ᠭᠤᠴᠢᠨ ᠵᠢᠯ ᠲᠤᠷᠰᠢ᠂ ᠫᠠᠨ ᡁᠢ ᠷᠦᠩ ᠮᠠᠰᠢ ᠤᠯᠠᠨ ᠴᠢᠬᠤᠯᠠ ᠠᠵᠢᠯ ᠪᠠᠶᠢᠷᠢᠨ ᠳᠤ ᠠᠵᠢᠯᠯᠠᠨ ᠨᠡᠯᠢᠶᠡᠳ  ᠡᠷᠬᠡ ᠲᠠᠢ ᠪᠤᠯᠤᠬᠰᠠᠨ ᠴᠤ ᠲᠡᠳᠡᠨ ᠬᠡᠷ ᠨᠢ ᠮᠦᠨ ᠯᠡ ᠶᠠᠳᠠᠭᠤ ᠪᠠᠶᠢᠯ᠎ᠠ᠃ ᠨᠢᠬᠡᠨ ᠤᠳᠠᠭ᠎ᠠ᠂ ᠬᠡᠷᠡᠭ ᠲᠤᠬᠠᠢ ᠬᠦᠮᠦᠨ  ᠫᠠᠨ ᡁᠢ ᠷᠦᠩ ᠬᠡᠷ ᠲᠤᠨᠢ ᠢᠷᠡᠬᠡᠳ ᠲᠡᠬᠦᠨ ᠳᠤ ᠵᠠᠬᠢᠳᠠᠯ ᠤᠭᠤᠳᠠ ᠲᠠᠢ ᠮᠦᠩᠬᠦ ᠠᠪᠴᠢᠷᠠᠵᠤ ᠦᠭᠴᠡᠢ᠃ ᠵᠦᠳᠡᠬᠦᠬᠡᠨ  ᠠᠮᠢᠳᠤᠷᠠᠯ ᠲᠠᠢ ᠪᠠᠶᠢᠭ᠎ᠠ ᠫᠠᠨ ᡁᠢ ᠷᠦᠩ ᠡᠬᠦᠨ ᠳᠤᠨᠢ ᠰᠡᠳᠬᠢᠯ ᠬᠦᠳᠡᠯᠦᠭᠰᠡᠨ ᠦᠬᠡᠢ᠂ ᠬᠠᠷᠢᠨ ᠲᠡᠷᠡ ᠬᠦᠮᠦᠨ ᠢ ᠰᠢᠭᠤᠳ  ᠬᠡᠷ ᠠᠴᠠ ᠪᠠᠨ ᠲᠦᠯᠬᠢᠵᠦ ᠭᠠᠷᠭᠠᠬᠰᠠᠨ ᠬᠡᠳᠡᠭ᠃ ︽ᠲᠡᠬᠦᠨ ᠲᠠᠢ ᠠᠮᠢᠳᠤᠷᠠᠬᠰᠠᠨ 30 ᠵᠢᠯ ᠲᠤᠷᠰᠢ ᠲᠡᠷᠡ ᠬᠡᠷ ᠲᠡᠭᠡᠨ ᠲᠡᠮᠡᠢ  ᠰᠠᠭᠤᠬᠰᠠᠨ ᠦᠬᠡᠢ︾ ᠬᠡᠵᠦ ᠬᠡᠷᠬᠡᠢ ᠶᠠᠩ ᠱᠦ ᠮᠸᠢ ᠨᠢ ᠶᠠᠷᠢᠨ᠎ᠠ᠃ ᠨᠡᠬᠡᠷᠡᠨ ᠫᠠᠨ ᡁᠢ ᠷᠦᠩ ᠦᠷᠯᠦᠬᠡ ᠲᠠᠪᠤ ᠵᠢᠷᠭᠤᠭᠠᠨ ᠴᠠᠬ  ᠪᠤᠯᠤᠮᠠᠬᠴᠠ ᠪᠠᠶᠢᠭᠤᠯᠤᠯᠭ᠎ᠠ ᠤᠷᠤᠭᠤ ᠪᠠᠨ ᠶᠠᠪᠤᠨ᠎ᠠ᠂ ᠤᠷᠤᠢ ᠬᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠬᠡᠳ ᠵᠢᠭᠠᠬᠠᠨ ᠬᠤᠭᠤᠯᠠ ᠢᠳᠡᠮᠡᠭᠴᠡ  ᠲᠠᠬᠢᠭᠠᠳ ᠭᠠᠷᠴᠤ ᠶᠠᠪᠤᠨ᠎ᠠ᠃ ᠨᠡᠩ ᠴᠤ ᠬᠦᠳᠡᠭᠡ ᠪᠠᠭᠤᠪᠠᠯ ᠬᠡᠳᠦᠨ ᠡᠳᠦᠷ  ᠬᠡᠷ ᠲᠡᠭᠡᠨ ᠬᠠᠷᠢᠳᠠᠬ ᠦᠬᠡᠢ᠃ ᠬᠤᠵᠢᠮ ᠨᠢ ᠫᠠᠨ  ᡁᠢ ᠷᠦᠩ ᠪᠠᠶᠢᠴᠠᠭᠠᠬᠤ ᠲᠠᠰᠤᠬ ᠲᠤ ᠬᠦᠷᠴᠦ ᠠᠵᠢᠯᠯᠠᠯ᠎ᠠ᠃ ᠨᠢᠬᠡᠨ ᠭᠠᠷᠠᠬ ᠡᠳᠦᠷ ᠲᠡᠷᠡ ᠬᠡᠷᠬᠡᠢ ᠶᠠᠩ ᠱᠦ ᠮᠸᠢ ᠪᠠᠨ ᠲᠠᠯ᠎ᠠ  ᠨᠤᠳᠤᠬ ᠦᠵᠡᠬᠦᠯᠦᠶ᠎ᠡ ᠬᠡᠵᠦ ᠲᠠᠭᠠᠭᠤᠯᠵᠤ ᠶᠠᠪᠤᠵᠠᠢ᠃ ᠡᠴᠢᠨᠡᠬᠡᠨ ᠵᠢᠯ ᠲᠤᠷᠰᠢ ᠶᠡᠷᠦᠨᠢ ᠵᠤᠭᠠᠯᠠᠬᠤ ᠪᠠᠷ ᠭᠠᠷᠤᠬᠰᠠᠨ ᠦᠬᠡᠢ  ᠳᠤᠯᠠ ᠶᠠᠩ ᠱᠦ ᠮᠸᠢ ᠶᠡᠬᠡᠳᠡ ᠭᠠᠶᠢᠬᠠᠨ ᠪᠠᠶᠠᠷᠯᠠᠵᠠᠢ᠃ ᠬᠡᠳᠡᠯ᠎ᠡ ᠫᠠᠨ ᡁᠢ ᠷᠦᠩ ᠬᠠᠷᠢᠨ ᠬᠡᠷᠬᠡᠢ ᠶᠠᠩ ᠱᠦ ᠮᠸᠢ ᠪᠠᠷ  ᠪᠠᠶᠢᠴᠠᠭᠠᠬᠤ ᠲᠠᠰᠤᠬ ᠰᠢᠯ ᠢ ᠵᠦᠯᠬᠦᠬᠦᠯᠬᠦ ᠬᠡᠰᠡᠨ ᠪᠠᠶᠢᠯ᠎ᠠ᠃ ᠶᠠᠩ ᠱᠦ ᠮᠸᠢ ᠪᠠᠰᠠ ᠨᠢᠬᠡᠨ ᠤᠳᠠᠭ᠎ᠠ ᠫᠠᠨ ᡁᠢ ᠷᠦᠩ ᠢ  ᠡᠷᠢᠵᠦ ᠬᠦᠷᠬᠦᠯᠡᠷ ᠲᠡᠷᠡ ᠬᠠᠷᠢᠨ ᠪᠠᠶᠢᠴᠠᠭᠠᠬᠤ ᠲᠠᠰᠤᠬ ᠴᠤᠩᠬᠤᠨ ᠬᠦᠰᠢᠬᠡ ᠪᠤᠯᠤᠨ ᠱᠠᠹᠠ ᠪᠦᠳᠡᠬᠡᠯᠬᠡ ᠪᠠᠨ  ᠦᠭᠴᠦ ᠤᠬᠢᠶᠠᠯᠭᠠᠬᠤ ᠬᠡᠰᠡᠨ ᠬᠡᠳᠡᠭ᠃ ᠨᠢᠬᠡᠯᠡ ᠰᠡᠳᠬᠢᠯ  ᠠᠵᠢᠯ ᠲᠦᠯᠦᠬᠡ ᠵᠢᠳᠬᠦᠳᠡᠭ ᠫᠠᠨ ᡁᠢ ᠷᠦᠩ ᠳᠤ  ᠠᠪᠴᠤ ᠬᠡᠯᠡᠪᠡᠯ ᠪᠠᠶᠢᠴᠠᠭᠠᠬᠤ ᠲᠠᠰᠤᠬ ᠨᠢ ᠲᠡᠬᠦᠨ ᠬᠡᠷ ᠪᠤᠯᠵᠠᠢ ᠭᠡᠵᠦ ᠭᠡᠯᠡᠬᠦ ᠳᠤ ᠢᠯᠡᠬᠦᠳᠡᠬᠦ ᠪᠠᠷ ᠦᠭᠡᠢ᠃
    

    ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠤᠭᠠᠳᠤ ᠬᠤᠰᠢᠭᠤ ᠪᠤᠯ ᠦᠶ᠎ᠡ ᠦᠶ᠎ᠡ ᠪᠠᠭᠠᠳᠤᠷ ᠢ ᠲᠦᠷᠦᠬᠦᠯᠳᠡᠭ ᠲᠤᠯᠠᠭᠠᠨ ᠦᠯᠦᠬᠡᠢ  ᠶᠤᠮᠰᠠᠨ᠃ ᠬᠦᠯᠳᠡᠵᠦ ᠪᠡᠬᠡᠷᠡᠬᠦ ᠪᠠᠨ ᠬᠠᠶᠢᠬᠤᠷᠤᠯ ᠦᠬᠡᠢ ᠨᠡᠶᠢᠳᠡ ᠬᠤᠨᠢᠨ ᠰᠦᠷᠦᠭ ᠢ ᠬᠠᠮᠠᠭᠠᠯᠠᠬᠰᠠᠨ ᠲᠠᠯ᠎ᠠ ᠨᠤᠳᠤᠬ  ᠪᠠᠭᠠᠳᠤᠷ ᠡᠬᠡᠴᠢ ᠦᠬᠢᠨ ᠲᠡᠬᠦᠦ ᠬᠤᠶᠠᠭᠤᠯᠠ ᠪᠤᠯᠤᠨ ᠬᠠᠨᠢ ᠨᠦᠬᠦᠳ ᠠᠪᠤᠷᠠᠬᠤ ᠲᠦᠯᠦᠬᠡ ᠠᠮᠢ ᠪᠡᠶ᠎ᠡ ᠪᠠᠨ  ᠦᠷᠡᠭᠳᠡᠬᠦᠯᠦᠭᠰᠡᠨ ᠬᠤᠪᠢᠰᠬᠠᠯ ᠪᠠᠭᠠᠳᠤᠷ᠂ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠤᠭᠠᠳᠤ ᠬᠤᠰᠢᠭᠤᠨ ᠪᠠᠳᠤᠬᠠᠭᠠᠯᠭ᠎ᠠ ᠪᠠᠯᠭᠠᠰᠤᠨ  ᠠᠷᠠᠳ ᠵᠡᠪᠰᠡᠭᠳᠦ ᠬᠦᠴᠦᠨ ᠬᠡᠯᠳᠡᠰ ᠲᠠᠷᠤᠭ᠎ᠠ ᠠᠬᠰᠠᠨ ᠮᠦᠩᠬᠡᠳᠡᠯᠡᠢ ᠨᠠᠷ ᠬᠡᠳᠦᠨ ᠦᠶ᠎ᠡ ᠬᠦᠮᠦᠰ ᠢ  ᠲᠤᠬᠳᠤᠯᠤᠭᠤᠯᠵᠤ ᠵᠤᠷᠢᠬᠵᠢᠭᠤᠯᠵᠦ ᠢᠷᠡᠯ᠎ᠠ᠃ ᠬᠡᠬᠦ ᠳᠤ ᠤᠯᠠᠩᠬᠢ ᠬᠦᠮᠦᠰ ᠬᠡᠰᠡᠭ ᠬᠤᠭᠤᠴᠠᠭ᠎ᠠ ᠠᠵᠢᠯᠯᠠᠬᠰᠠᠨ ᠲᠠᠷᠠᠭ᠎ᠠ ᠠᠷᠭ᠎ᠠ  ᠪᠦᠬᠦᠨ ᠢ ᠰᠦᠪᠡᠭᠴᠢᠯᠡᠨ ᠬᠤᠳᠠ ᠳᠤ ᠤᠴᠢᠵᠤ ᠠᠵᠢᠯᠯᠠᠳᠠᠬ᠃ ᠫᠠᠨ ᡁᠢ ᠷᠦᠩ ᠳᠤ ᠴᠤ ᠬᠤᠳᠠ ᠳᠤ ᠤᠴᠢᠵᠤ ᠠᠵᠢᠯᠯᠠᠬᠤ  ᠲᠤᠬᠢᠶᠠᠯ ᠤᠯᠠᠨ ᠤᠳᠠᠭ᠎ᠠ ᠲᠤᠬᠢᠶᠠᠯᠳᠤᠵᠤ ᠪᠠᠶᠢᠬᠰᠠᠨ ᠴᠤ ᠪᠠᠶᠢᠴᠠᠭᠠᠬᠤ ᠠᠵᠢᠯ ᠨᠢᠬᠡᠳᠦᠬᠡᠷ ᠹᠠᠷᠤᠨᠲ 30 ᠵᠢᠯ ᠰᠠᠬᠢᠵᠠᠢ᠃  ᠡᠨᠡ ᠬᠤᠭᠤᠷᠤᠨᠳᠤ ᠬᠡᠴᠢᠨᠡᠨ ᠰᠡᠳᠬᠢᠯ ᠢ ᠲᠤᠬᠳᠤᠯᠤᠭᠤᠯᠤᠬᠰᠠᠨ ᠤᠴᠢᠷ ᠭᠠᠷᠴᠤ ᠦᠩᠬᠡᠷᠡᠭᠰᠡᠨ ᠢ ᠪᠦᠦ ᠮᠡᠳᠡ᠃      
    2007 ᠤᠨ 8 ᠰᠠᠷ᠎ᠠ ᠨᠢᠬᠡᠨ ᠡᠳᠦᠷ᠂ ᠪᠠᠳᠤᠬᠠᠭᠠᠯᠭ᠎ᠠ ᠪᠠᠯᠭᠠᠰᠤᠨ ᠪᠦᠬᠡᠮ  ᠬᠤᠳᠠᠯᠳᠤᠬᠤ ᠭᠠᠵᠠᠷ ᠸᠠᠩ  ᠭᠤᠸᠠᠢ ᠲᠡᠯᠬᠡᠬᠦᠷ ᠲᠡᠭᠡᠨ ᠰᠠᠭᠤᠵᠤ ᠪᠠᠶᠢᠳᠠᠯ᠎ᠠ ᠬᠡᠨᠡᠳᠳᠡ ᠨᠢᠬᠡᠨ ᠬᠦᠮᠦᠨ ᠡᠬᠦᠳᠡ ᠢᠰᠬᠦᠯᠦᠨ ᠤᠷᠤᠵᠤ ᠢᠷᠡᠵᠡᠢ᠃ ᠡᠨᠡ ᠬᠦᠮᠦᠨ  ᠨᠢᠬᠡ ᠭᠠᠷ ᠲᠠᠭᠠᠨ ᠤᠷᠳᠤ ᠬᠢᠳᠤᠭ᠎ᠠ ᠪᠠᠷᠢᠵᠤ᠂ ᠬᠤᠶᠠᠷ ᠬᠦᠯ ᠳᠡᠭᠡᠨ ᠤᠬᠤᠷ ᠬᠢᠳᠤᠭ᠎ᠠ ᠤᠶᠠᠭᠠᠳ ᠬᠠᠰᠬᠢᠷᠴᠤ ᠪᠠᠷᠬᠢᠷᠠᠬᠰᠠᠭᠠᠷ  ᠲᠡᠯᠬᠡᠬᠦᠷ ᠲᠤ ᠤᠷᠤᠵᠤ ᠢᠷᠡᠵᠡᠢ᠃ ᠲᠡᠷᠡ ᠤᠷᠳᠤ ᠬᠢᠳᠤᠭ᠎ᠠ ᠪᠠᠨ ᠡᠷᠬᠢᠬᠦᠯᠦᠨ ᠸᠠᠩ ᠭᠤᠸᠠᠢ ᠠᠶᠤᠯᠭᠠᠵᠤ ᠶᠠᠪᠤᠭᠤᠯᠤᠬᠰᠠᠨ  ᠲᠠᠷᠠᠭ᠎ᠠ ᠪᠠᠷᠠᠭ᠎ᠠ ᠵᠢᠶᠠᠰᠠᠨ ᠲᠡᠭᠡᠷᠡᠬᠢ ᠶᠠᠭᠤᠮ᠎ᠠ ᠠᠪᠴᠤ ᠶᠡᠬᠡᠪᠡᠷ ᠢᠳᠡᠵᠦ ᠤᠤᠭᠤᠵᠤ ᠰᠠᠭᠤᠬᠰᠠᠨ ᠪᠠᠶᠢᠯ᠎ᠠ᠃ ᠸᠠᠩ ᠭᠤᠸᠠᠢ  ᠶᠡᠬᠡᠳᠡ ᠠᠶᠤᠨ ᠬᠡᠯᠮᠡᠭᠳᠡᠵᠦ ᠴᠠᠬᠳᠠᠭ᠎ᠠ ᠳᠤ ᠬᠡᠷᠡᠭ ᠮᠡᠳᠡᠬᠦᠯᠵᠦ᠂ ᠲᠤᠳᠤᠭᠠᠳᠤ ᠬᠠᠮᠠᠭᠠᠯᠠᠬᠤ ᠴᠠᠬᠳᠠᠭ᠎ᠠ ᠨᠠᠷ ᠶᠠᠯ᠎ᠠ ᠬᠢᠭᠰᠡᠨ  ᠬᠡᠷᠡᠭ ᠰᠡᠵᠢᠭᠳᠡᠨ ᠯᠢ ᠤᠪᠤᠬᠳᠤ ᠲᠤᠤᠷ᠎ᠠ ᠨᠢ ᠪᠠᠷᠢᠵᠤ ᠠᠪᠴᠠᠢ᠃ ᠬᠡᠷᠡᠴᠢ ᠪᠠᠷᠢᠮᠳᠠ ᠲᠤᠳᠤᠷᠬᠠᠢ ᠪᠤᠯᠬᠤᠷ ᠲᠤᠳᠤᠭᠠᠳᠤ  ᠬᠠᠮᠠᠭᠠᠯᠠᠬᠤ ᠪᠠᠶᠢᠭᠤᠯᠤᠯᠭ᠎ᠠ ᠠᠴᠠ ᠪᠠᠶᠢᠴᠠᠭᠠᠬᠤ ᠬᠤᠷᠢᠶᠠᠨ ᠳᠤ ᠪᠠᠷᠢᠪᠴᠢᠯᠠᠬᠤ ᠵᠦᠪᠰᠢᠶᠡᠷᠡᠬᠦᠯᠬᠦ ᠪᠠᠷ ᠭᠤᠶᠤᠴᠢᠯᠠᠯ ᠲᠡᠪᠰᠢᠬᠦᠯᠵᠡᠢ᠃  ᠲᠤᠬᠠᠢ ᠦᠶ᠎ᠡ ᠳᠤ ᠪᠠᠷᠢᠪᠴᠢᠯᠠᠬᠤ ᠵᠦᠪᠰᠢᠶᠡᠷᠡᠬᠦ ᠰᠠᠯᠠᠭᠠᠨ ᠲᠠᠷᠤᠭ᠎ᠠ ᠪᠠᠷ ᠠᠵᠢᠯᠯᠠᠵᠤ ᠪᠠᠶᠢᠬᠰᠠᠨ ᠫᠠᠨ ᡁᠢ ᠷᠦᠩ  ᠲᠤᠤᠷ᠎ᠠ ᠨᠢ ᠬᠢᠨᠠᠨ ᠪᠠᠶᠢᠴᠠᠭᠠᠯᠳᠠ ᠬᠢᠭᠰᠡᠨ ᠪᠠᠶᠢᠯ᠎ᠠ᠃ ᠬᠡᠳᠡᠯ᠎ᠡ ᠫᠠᠨ ᡁᠢ ᠷᠦᠩ ᠯᠢ ᠤᠪᠤᠬᠳᠤ ᠰᠢᠬᠦᠨ ᠠᠰᠠᠭᠤᠬᠰᠠᠨ ᠲᠠᠷᠠᠭ᠎ᠠ  ᠬᠠᠷᠢᠨ ᠪᠠᠷᠢᠪᠴᠢᠯᠠᠬᠤ ᠵᠦᠪᠰᠢᠶᠡᠷᠡᠬᠦ ᠰᠠᠨᠠᠯ ᠢ ᠵᠦᠪᠰᠢᠶᠡᠷᠡᠭᠰᠡᠨ ᠦᠬᠡᠢ᠂ ᠬᠤᠤᠷ ᠠᠮᠰᠠᠬᠴᠢ ᠪᠤᠯᠤᠨ ᠬᠠᠮᠢᠶ᠎ᠠ ᠪᠦᠬᠦᠢ  ᠬᠡᠷᠡᠴᠢᠯᠡᠭᠴᠢ ᠠᠴᠠ ᠲᠠᠬᠢᠨᠳᠠ ᠯᠠᠪᠯᠠᠨ ᠠᠰᠠᠭᠤᠵᠠᠢ᠃ ᠫᠠᠨ ᡁᠢ ᠷᠦᠩ ᠡᠨᠡᠬᠦ ᠬᠡᠷᠡᠭ ᠲᠤ ᠪᠠᠰᠠ ᠨᠢᠬᠡᠨ ᠰᠡᠵᠢᠭ ᠲᠠᠢ ᠠᠰᠠᠭᠤᠳᠠᠯ  ᠪᠠᠶᠢᠬᠤ ᠶᠠᠷᠢᠵᠠᠢ᠄ ᠪᠦᠬᠡᠮ  ᠬᠤᠳᠠᠯᠳᠤᠬᠤ ᠭᠠᠵᠠᠷ ᠢ ᠲᠤᠨᠤᠵᠤ ᠲᠡᠭᠡᠷᠡᠮᠳᠡᠬᠦ ᠭᠠᠵᠠᠷ  ᠰᠤᠩᠭᠤᠬᠰᠠᠨ ᠠᠳᠠᠯ᠎ᠠ ᠶᠠᠭᠠᠬᠢᠭᠠᠳ  ᠵᠤᠭᠤᠰ ᠮᠦᠩᠬᠦ ᠠᠪᠤᠬᠰᠠᠨ ᠦᠬᠡᠢ ᠬᠠᠷᠢᠨ ᠶᠠᠭᠤᠮ᠎ᠠ ᠢᠳᠡᠭᠰᠡᠨ ᠪᠤᠢ︖ ᠡᠳᠡᠬᠡᠷ ᠨᠢ ᠲᠤᠨᠤᠵᠤ ᠲᠡᠭᠡᠷᠡᠮᠳᠡᠬᠦ ᠬᠡᠪ ᠪᠠᠶᠢᠳᠠᠯ ᠲᠠᠢ  ᠨᠡᠶᠢᠴᠡᠬᠦ ᠦᠬᠡᠢ ᠶᠤᠮ᠃ ᠲᠡᠭᠡᠪᠡᠯ ᠬᠡᠷᠡᠭ ᠰᠡᠵᠢᠭᠳᠡᠨ ᠤᠶᠤᠨ ᠮᠡᠳᠡᠷᠡᠯ ᠡᠪᠡᠳᠴᠢᠨ ᠲᠠᠢ ᠬᠡᠵᠢ ᠦᠦ︖ ᠬᠡᠪᠡᠴᠦ  ᠲᠤᠳᠤᠭᠠᠳᠤ ᠬᠠᠮᠠᠭᠠᠯᠠᠬᠤ ᠪᠠᠶᠢᠭᠤᠯᠤᠯᠭ᠎ᠠ ᠬᠢᠨ ᠫᠠᠨ ᡁᠢ ᠷᠦᠩ ᠦᠵᠡᠯᠳᠡ ᠵᠦᠪᠰᠢᠶᠡᠷᠡᠭᠰᠡᠨ ᠦᠬᠡᠢ᠃ ᠤᠴᠢᠷ ᠨᠢ  ᠴᠠᠬᠳᠠᠭ᠎ᠠ ᠨᠠᠷ ᠶᠠᠯ᠎ᠠ ᠬᠢᠭᠰᠡᠨ ᠬᠡᠷᠡᠭ ᠰᠡᠵᠢᠭᠳᠡᠨ ᠢ ᠪᠠᠷᠢᠪᠴᠢᠯᠠᠬᠤ ᠦᠶᠡᠰ ᠲᠡᠬᠦᠨ ᠤᠶᠤᠨ ᠮᠡᠳᠡᠷᠡᠯ ᠨᠢ ᠵᠦᠬᠡᠷ ᠪᠠᠶᠢᠵᠠᠢ᠃  ᠫᠠᠨ ᡁᠢ ᠷᠦᠩ ᠯᠢ ᠤᠪᠤᠬᠳᠤ ᠦᠷᠬᠦᠯᠵᠢᠯᠡᠨ ᠰᠢᠬᠦᠨ ᠠᠰᠠᠭᠤᠬᠤ ᠳᠤ ᠲᠡᠬᠦᠨ ᠦᠬᠡ ᠨᠢ ᠠᠳᠡ ᠲᠡᠨᠳᠡ ᠲᠤᠰᠴᠤ ᠪᠠᠶᠢᠯ᠎ᠠ᠃  ᠬᠡᠳᠦᠨᠳᠡ ᠰᠢᠬᠦᠨ ᠠᠰᠠᠭᠤᠬᠰᠠᠨ ᠬᠤᠶᠢᠨ᠎ᠠ᠂ ᠫᠠᠨ ᡁᠢ ᠷᠦᠩ ᠯᠢ ᠤᠪᠤᠬᠳᠤ ᠤᠶᠤᠨ ᠮᠡᠳᠡᠷᠡᠯ ᠡᠪᠡᠳᠴᠢᠨ ᠲᠠᠢ  ᠪᠠᠷᠤᠬᠯᠠᠵᠤ ᠮᠡᠳᠡᠯ᠎ᠡ᠃ ᠫᠠᠨ ᡁᠢ ᠷᠦᠩ ᠪᠠᠷᠢᠮᠳᠠᠯᠠᠯ ᠪᠤᠯᠤᠨ ᠰᠠᠨᠠᠭᠤᠯᠭ᠎ᠠ ᠲᠤᠤᠷ᠎ᠠ᠂ ᠲᠤᠳᠤᠭᠠᠳᠤ ᠬᠠᠮᠠᠭᠠᠯᠠᠬᠤ  ᠪᠠᠶᠢᠭᠤᠯᠤᠯᠭ᠎ᠠ ᠬᠠᠮᠤᠬ ᠰᠡᠬᠦᠯ ᠳᠤ ᠶᠠᠯ᠎ᠠ ᠬᠢᠭᠰᠡᠨ ᠬᠡᠷᠡᠭ ᠰᠡᠵᠢᠭᠳᠡᠨ ᠳᠤ ᠤᠶᠤᠨ ᠮᠡᠳᠡᠷᠡᠯ ᠡᠪᠡᠳᠴᠢᠨ ᠰᠢᠯᠭᠠᠨ  ᠲᠤᠬᠳᠠᠭᠠᠯᠳᠠ ᠬᠢᠵᠦ᠂ ᠲᠡᠬᠦᠨ ᠤᠶᠤᠨ ᠮᠡᠳᠡᠷᠡᠯ ᠡᠪᠡᠳᠴᠢᠨ ᠲᠠᠢ ᠪᠠᠶᠢᠬᠤ ᠲᠤᠳᠤᠯᠠᠵᠠᠢ᠃ ᠯᠢ ᠤᠪᠤᠬᠳᠤ ᠤᠶᠤᠨ  ᠮᠡᠳᠡᠷᠡᠯ ᠨᠢ ᠬᠦᠭᠰᠡᠬᠦᠦ ᠪᠠᠶᠢᠬᠤ ᠦᠶ᠎ᠡ ᠳᠡᠭᠡᠨ ᠬᠡᠷᠡᠭ ᠬᠢᠭᠰᠡᠨ ᠠᠴᠠ ᠢᠯᠭᠠᠨ ᠲᠠᠨᠢᠬᠤ ᠪᠤᠯᠤᠨ ᠡᠵᠡᠮᠳᠡᠬᠦ ᠴᠢᠳᠠᠪᠤᠷᠢ ᠠᠯᠳᠠᠬᠳᠠᠵᠤ᠂  ᠡᠷᠡᠬᠦᠦ ᠬᠡᠷᠡᠭ ᠲᠤ ᠬᠠᠷᠢᠭᠤᠴᠠᠬᠤ ᠴᠢᠳᠠᠪᠤᠷᠢ ᠦᠬᠡᠢ᠃ ᠬᠢᠨᠠᠨ ᠪᠠᠶᠢᠴᠠᠭᠠᠵᠤ ᠪᠠᠷᠠᠬᠰᠠᠨ ᠬᠤᠶᠢᠨ᠎ᠠ᠂ ᠫᠠᠨ ᡁᠢ ᠷᠦᠩ ᠬᠦᠨ  ᠨᠢᠬᠡ ᠠᠮᠢᠰᠬᠤᠵᠤ᠂ ᠪᠠᠷᠢᠪᠴᠢᠯᠠᠬᠤ ᠦᠯᠦ ᠵᠦᠪᠰᠢᠶᠡᠷᠡᠬᠦ ᠰᠢᠢᠳᠪᠦᠷᠢ ᠪᠢᠴᠢᠭ ᠢ ᠲᠤᠤᠷ᠎ᠠ ᠨᠢ ᠲᠤᠳᠤᠭᠠᠳᠤ ᠬᠠᠮᠠᠭᠠᠯᠠᠬᠤ  ᠪᠠᠶᠢᠭᠤᠯᠤᠯᠭ᠎ᠠ ᠳᠤ ᠬᠦᠷᠬᠡᠵᠦ ᠦᠭᠬᠦᠭᠰᠡᠨ ᠪᠠᠶᠢᠯ᠎ᠠ᠃

    2015 ᠤᠨ 8 ᠰᠠᠷ᠎ᠠ ᠳᠤ᠂ ᠫᠠᠨ ᡁᠢ ᠷᠦᠩ ᠰᠤᠷᠪᠤᠯᠵᠢᠯᠠᠨ ᠪᠠᠶᠢᠴᠠᠭᠠᠬᠤ ᠲᠤᠮᠳᠠ ᠪᠠᠨ ᠨᠠᠷᠠᠨᠪᠤᠯᠠᠬ ᠭᠠᠴᠠᠭᠠᠨ  ᠮᠠᠯᠴᠢᠳ ︽ᠭᠠᠴᠠᠭᠠᠨ ᠱᠦᠵᠢ ᠲᠤᠷ᠎ᠠ ᠪᠠᠷ ᠤᠯᠠᠨ ᠨᠡᠶᠢᠳᠡ ᠪᠡᠯᠴᠢᠬᠡᠷ ᠢ ᠦᠪᠡᠷ ᠬᠦᠦ ᠨᠡᠷ᠎ᠡ  ᠲᠡᠭᠡᠷ᠎ᠡ ᠰᠢᠯᠵᠢᠬᠦᠯᠦᠨ᠂ ᠤᠯᠤᠰ ᠪᠡᠯᠴᠢᠬᠡᠷᠯᠡᠬᠦᠯᠬᠦ ᠵᠤᠬᠰᠤᠭᠠᠬᠤ ᠨᠦᠬᠦᠪᠦᠷᠢ ᠠᠪᠤᠬᠰᠠᠨ︾ ᠬᠡᠬᠦ ᠵᠠᠭᠠᠯᠳᠤᠯᠭ᠎ᠠ  ᠲᠤᠰᠴᠠᠢ᠃ ᠭᠠᠴᠠᠭᠠᠨ ᠱᠦᠵᠢ ᠪᠠᠰᠠ ᠲᠤᠬᠠᠢ ᠭᠠᠵᠠᠷ ᠠᠮᠢᠨ ᠲᠡᠵᠢᠬᠡᠯ ᠪᠤᠯᠤᠬᠰᠠᠨ ᠤᠰᠤᠨ ᠰᠤᠷᠪᠤᠯᠵᠢ  ᠪᠡᠯᠴᠢᠬᠡᠷ ᠲᠡᠭᠡᠨ ᠬᠦᠷᠢᠶᠡᠯᠡᠵᠦ ᠠᠪᠤᠭᠠᠳ ᠮᠠᠯᠴᠢᠳ ᠮᠠᠯ ᠤᠰᠤᠯᠠᠬᠤ ᠠᠷᠭ᠎ᠠ ᠦᠬᠡᠢ ᠪᠤᠯᠤᠬᠰᠠᠨ ᠪᠠᠶᠢᠯ᠎ᠠ᠃ ᠮᠠᠯᠴᠢᠳ  ᠤᠯᠠᠨᠳᠠ ᠬᠠᠮᠢᠶ᠎ᠠ ᠪᠦᠬᠦᠢ ᠰᠠᠯᠠᠭ᠎ᠠ ᠮᠦᠴᠢᠷ ᠲᠤ ᠲᠤᠰᠬᠠᠬᠰᠠᠨ ᠪᠤᠯᠪᠠᠴᠤ ᠰᠢᠢᠳᠪᠦᠷᠢᠯᠡᠵᠦ ᠲᠡᠶᠢᠯᠦᠭᠰᠡᠨ ᠦᠬᠡᠢ᠃ ᠲᠤᠬᠠᠢ  ᠦᠶ᠎ᠡ ᠳᠤ ᠮᠠᠯᠴᠢᠳ ᠶᠡᠬᠡᠪᠡᠷ ᠬᠢᠯᠢᠩᠨᠡᠨ ᠲᠡᠭᠡᠭᠰᠢ ᠵᠠᠭᠠᠯᠳᠤᠬᠤ ᠪᠠᠷ ᠪᠤᠯᠵᠠᠢ᠃ ᠫᠠᠨ ᡁᠢ ᠷᠦᠩ ᠡᠨᠡ ᠤᠴᠢᠷ ᠢ ᠮᠡᠳᠡᠬᠡᠳ ᠲᠡᠭᠡᠷ᠎ᠡ  ᠱᠠᠳᠤᠨ ᠳᠤ ᠡᠷᠡᠮᠡᠯᠵᠡᠯᠡᠨ ᠲᠤᠰᠬᠠᠢ ᠬᠡᠷᠡᠭ ᠲᠤᠭᠤᠢᠢᠯᠠᠩ ᠪᠠᠶᠢᠭᠤᠯᠤᠨ ᠠᠩᠬᠠᠨ ᠪᠠᠶᠢᠴᠠᠭᠠᠯᠳᠠ ᠪᠠᠨ ᠡᠬᠢᠯᠡᠬᠦᠯᠦᠯ᠎ᠡ᠃ ᠲᠡᠷᠡ  ᠲᠠᠪᠤᠨ ᠡᠳᠦᠷ ᠲᠤᠳᠤᠷ᠎ᠠ 20 ᠭᠠᠷᠤᠢ ᠮᠠᠯᠴᠢᠨ ᠡᠷᠦᠬᠡ ᠪᠠᠷ ᠤᠷᠤᠵᠤ ᠬᠡᠷᠡᠴᠢ ᠠᠪᠴᠠᠢ᠃ ᠮᠠᠯᠵᠢᠬᠤ ᠤᠷᠤᠨ ᠠᠶᠢᠯ  ᠡᠷᠦᠬᠡ ᠨᠦᠭᠦᠳ ᠲᠠᠷᠠᠬᠠᠢ ᠪᠤᠳᠠᠷᠬᠠᠢ ᠰᠠᠭᠤᠷᠢᠰᠢᠵᠤ ᠪᠠᠶᠢᠳᠠᠭ ᠪᠤᠯᠬᠤᠷ᠂ ᠫᠠᠨ ᡁᠢ ᠷᠦᠩ ᠡᠷᠳᠡᠯᠡᠵᠦ ᠤᠷᠦ᠋ᠢᠯᠠᠨ ᠬᠤᠳᠤᠭᠤᠳᠤᠨ  ᠡᠪᠡᠳᠴᠢᠨ ᠡᠪᠡᠷᠰᠢᠶᠡᠯ ᠲᠡᠰᠪᠦᠷᠢᠯᠡᠨ ᠪᠠᠶᠢᠴᠠᠭᠠᠵᠠᠢ᠃ ᠬᠠᠳᠠᠭᠤᠵᠢᠯᠳᠠᠢ ᠬᠡᠷᠡᠴᠢ ᠠᠪᠬᠤ ᠪᠠᠷ ᠲᠠᠮᠵᠢᠭᠠᠳ᠂ ᠭᠠᠴᠠᠭᠠᠨ  ᠱᠦᠵᠢ 1800 ᠭᠠᠷᠤᠢ ᠮᠦ ᠪᠡᠯᠴᠢᠬᠡᠷ ᠬᠦᠦ ᠨᠡᠷ᠎ᠡ ᠲᠡᠭᠡᠷ᠎ᠡ ᠭᠠᠷᠭᠠᠵᠤ᠂ ᠤᠯᠤᠰ ᠪᠡᠯᠴᠢᠬᠡᠷᠯᠡᠬᠦᠯᠬᠦ  ᠵᠤᠬᠰᠤᠭᠠᠬᠤ ᠨᠦᠬᠦᠪᠦᠷᠢ 4 ᠲᠦᠮᠡᠨ ᠲᠦᠬᠦᠷᠢᠭ ᠢ ᠠᠪᠤᠬᠰᠠᠨ ᠢ ᠮᠡᠳᠡᠵᠡᠢ᠃ ᠭᠠᠴᠠᠭᠠᠨ ᠱᠦᠵᠢ ᠠᠵᠢᠯᠯᠠᠭ᠎ᠠ ᠨᠢ ᠨᠢᠬᠡᠨᠳᠡ  ᠬᠠᠤᠯᠢ ᠵᠦᠷᠢᠴᠡᠨ᠂ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠤᠭᠠᠳᠤ ᠬᠤᠰᠢᠭᠤᠨ ᠠᠷᠠᠳ ᠪᠠᠶᠢᠴᠠᠭᠠᠬᠤ ᠬᠤᠷᠢᠶ᠎ᠠ ᠬᠡᠷᠡᠭ ᠪᠤᠯᠭᠠᠨ  ᠲᠠᠩᠰᠠᠯᠠᠵᠤ ᠲᠠᠩᠨᠠᠬᠰᠠᠨ ᠪᠦᠬᠡᠳ ᠲᠡᠬᠦᠨ ᠢ ᠡᠷᠡᠬᠦᠦ ᠬᠡᠷᠡᠭ  ᠲᠦᠷ ᠬᠤᠷᠢᠪᠠ᠃ ᠡᠨᠡᠬᠦ ᠴᠢᠮᠡᠭᠡ ᠰᠤᠨᠤᠰᠤᠬᠰᠠᠨ  ᠨᠠᠷᠠᠨᠪᠤᠯᠠᠬ ᠭᠠᠴᠠᠭᠠᠨ ᠮᠠᠯᠴᠢᠳ ᠶᠡᠬᠡᠪᠡᠷ ᠪᠠᠶᠠᠷᠯᠠᠨ ᠨᠢᠬᠡᠨ ᠮᠠᠯᠴᠢᠨ ᠫᠠᠨ ᡁᠢ ᠷᠦᠩ ᠭᠠᠷ ᠢ ᠠᠳᠬᠤᠵᠤ᠄ ︽ᠲᠠᠨᠠᠷ ᠪᠤᠯ  ᠮᠠᠨ ᠮᠠᠯᠴᠢᠳ ᠲᠦᠰᠢᠭ ᠰᠢᠦ᠂ ᠪᠢᠳᠡ ᠬᠠᠤᠯᠢ ᠴᠠᠭᠠᠵᠠ ᠢᠳᠡᠬᠡᠨ᠎ᠡ᠂ ᠪᠢᠳᠡ ᠬᠠᠤᠯᠢ ᠴᠠᠭᠠᠵᠠ ᠲᠦᠪ ᠭᠤᠤᠯᠴᠢ  ᠬᠡᠳᠡᠭ ᠢ ᠢᠳᠡᠬᠡᠨ᠎ᠡ︾ ᠬᠡᠰᠡᠨ ᠪᠠᠶᠢᠯ᠎ᠠ᠃      
    2004 ᠤᠨ ᠳᠤ᠂ ᠫᠠᠨ ᡁᠢ ᠷᠦᠩ ᠬᠦᠦ ᠡᠮᠦᠨ᠎ᠡ ᠠᠴᠠ ᠵᠠᠬᠢᠳᠠᠯ ᠰᠤᠷᠪᠤᠯᠵᠢᠯᠠᠭ᠎ᠠ ᠬᠢᠵᠦ ᠶᠠᠪᠤᠬᠰᠠᠨ ᠡᠵᠢ  ᠲᠤᠰᠴᠤ ᠠᠪᠤᠬᠰᠠᠨ ᠪᠠᠶᠢᠯ᠎ᠠ᠃ ᠲᠡᠷᠡ ᠡᠵᠢ᠄ ︽ᠬᠦᠦ ᠮᠢᠨᠢ ᠶᠠᠭᠤᠮ᠎ᠠ ᠬᠤᠯᠠᠭᠠᠢᠢᠯᠠᠭᠠᠳ ᠪᠠᠷᠢᠬᠳᠠᠵᠤ ᠤᠳᠤ ᠡᠷᠡᠬᠦᠦ ᠪᠠᠷ ᠰᠢᠳᠬᠡᠬᠦ  ᠬᠡᠵᠦ ᠪᠤᠢ᠂ ᠬᠦᠦ ᠮᠢᠨᠢ 16 ᠪᠠᠰᠠ ᠬᠦᠷᠦᠬᠡᠳᠦᠢ᠂ ᠲᠤᠳᠤᠭᠠᠳᠤ ᠬᠠᠮᠠᠭᠠᠯᠠᠬᠤ ᠲᠤᠪᠴᠢᠶᠠᠨ ᠬᠦᠮᠦᠰ ᠠᠳᠡᠬᠦᠷᠡᠭᠰᠡᠨ︾ ᠬᠡᠵᠦ  ᠤᠬᠢᠯᠠᠨ ᠬᠠᠶᠢᠯᠠᠨ ᠶᠠᠷᠢᠵᠠᠢ᠃ ᠫᠠᠨ ᡁᠢ ᠷᠦᠩ ᠨᠠᠷᠢᠯᠢᠬ ᠤᠢᠢᠯᠠᠭᠠᠬᠤ ᠪᠠᠷ ᠲᠠᠮᠵᠢᠨ ᠬᠡᠷᠡᠭ ᠤᠴᠢᠷ ᠪᠦᠬᠦ᠋ᠢᠯᠡ ᠦᠩᠬᠡᠷᠡᠯᠳᠡ  ᠮᠡᠳᠡᠯ᠎ᠡ᠃ ᠤᠤᠯ ᠨᠢ ᠡᠨᠡ ᠡᠵᠢ ᠬᠦᠦ ᠨᠢ ᠶᠠᠭᠤᠮ᠎ᠠ ᠬᠤᠯᠠᠭᠠᠢᠢᠯᠠᠭᠠᠳ ᠲᠤᠳᠤᠭᠠᠳᠤ ᠬᠠᠮᠠᠭᠠᠯᠠᠬᠤ ᠪᠠᠶᠢᠭᠤᠯᠤᠯᠭ᠎ᠠ ᠠᠴᠠ  ᠬᠡᠷᠡᠭ ᠪᠤᠯᠭᠠᠨ ᠲᠠᠩᠰᠠᠯᠠᠵᠤ ᠲᠠᠩᠨᠠᠨ ᠪᠠᠶᠢᠴᠠᠭᠠᠭᠠᠳ᠂ ᠡᠷᠦᠬᠡ ᠠᠮᠠ ᠬᠡᠷᠡᠴᠢ ᠲᠡᠭᠡᠷ᠎ᠡ ᠨᠢ ᠬᠡᠦᠬᠡᠳ ᠨᠢᠬᠡᠨᠳᠡ 16 ᠪᠦᠬᠦᠯᠢ  ᠨᠠᠰᠤ ᠬᠦᠷᠦᠭᠰᠡᠨ ᠬᠡᠵᠦ ᠪᠠᠶᠢᠵᠡᠢ᠃ ᠲᠡᠷᠡ ᠡᠳᠦᠷ ᠫᠠᠨ ᡁᠢ ᠷᠦᠩ ᠬᠠᠮᠳᠤ ᠠᠵᠢᠯᠯᠠᠬᠴᠢ ᠲᠠᠢ ᠪᠠᠨ ᠪᠠᠶᠢᠴᠠᠭᠠᠯᠳᠠ ᠬᠢᠵᠦ᠂  ᠵᠡᠷᠬᠡᠯᠡᠳᠡᠭᠡ ᠠᠶᠢᠯ᠂ ᠰᠤᠷᠭᠠᠭᠤᠯᠢ ᠪᠠᠭᠰᠢ᠂ ᠡᠷᠦᠬᠡ ᠠᠮᠠ ᠲᠠᠩᠰᠠ ᠪᠠᠶᠢᠭ᠎ᠠ ᠭᠠᠵᠠᠷ ᠶᠡᠭᠡ ᠠᠩᠬᠢ ᠠᠴᠠ ᠨᠠᠷᠢᠨ  ᠬᠢᠨᠠᠮᠠᠭᠠᠢ ᠠᠰᠠᠭᠤᠵᠤ ᠪᠠᠶᠢᠴᠠᠭᠠᠭᠠᠳ᠂ ᠤᠤᠯ ᠡᠷᠦᠬᠡ ᠠᠮᠠ ᠲᠠᠩᠰᠠ ᠨᠢ ᠠᠪᠴᠤ ᠦᠵᠡᠨ᠂ ᠲᠤᠬᠠᠢ ᠵᠢᠯ  ᠬᠡᠦᠬᠡᠳ ᠲᠤ ᠡᠷᠦᠬᠡ ᠠᠮᠠ ᠤᠷᠤᠭᠤᠯᠬᠤ ᠦᠶ᠎ᠡ ᠳᠤ ᠠᠵᠢᠯᠳᠠᠳ ᠠᠴᠠ ᠪᠤᠷᠤᠭᠤ ᠲᠠᠬᠯᠠᠬᠰᠠᠨ ᠠᠴᠠ ᠰᠠᠶ᠋ᠢ ᠨᠢᠬᠡ ᠨᠠᠰᠤ ᠶᠡᠭᠡ  ᠪᠤᠯᠤᠬᠰᠠᠨ ᠢ ᠤᠢᠢᠯᠠᠭᠠᠵᠠᠢ᠃ ᠬᠠᠮᠤᠬ ᠰᠡᠬᠦᠯ ᠳᠤᠨᠢ ᠡᠨᠡ ᠬᠡᠷᠡᠭ ᠢ ᠪᠤᠴᠠᠭᠠᠬᠤ ᠪᠠᠷ ᠰᠢᠢᠳᠪᠦᠷᠢᠯᠡᠵᠡᠢ᠃ ᠫᠠᠨ ᡁᠢ ᠷᠦᠩ ᠡᠨᠡ  ᠬᠡᠷᠡᠭ ᠲᠠᠭᠤᠰᠤᠬᠰᠠᠨ ᠲᠠᠷᠠᠭ᠎ᠠ ᠪᠠᠰᠠ ᠡᠨᠡ ᠬᠡᠷ ᠬᠢᠨ ᠲᠠᠢ ᠬᠠᠷᠢᠯᠴᠠᠨ᠂ ᠲᠡᠷᠡ ᠬᠦᠦ ᠵᠦᠪ ᠵᠠᠮ  ᠶᠠᠪᠤᠬᠰᠠᠨ ᠢ  ᠮᠡᠳᠡᠬᠡᠳ ᠰᠠᠶ᠋ᠢ ᠰᠡᠳᠬᠢᠯ ᠨᠢ ᠠᠮᠠᠷᠠᠬᠰᠠᠨ ᠬᠡᠳᠡᠭ᠃

    ᠫᠠᠨ ᡁᠢ ᠷᠦᠩ ᠪᠤᠯ ᠡᠬᠡ ᠤᠯᠤᠰ ᠲᠦᠮᠡ ᠮᠢᠩᠭᠠᠨ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ ᠲᠤᠳᠤᠷᠠᠬᠢ ᠡᠩ ᠨᠢᠬᠡᠨ  ᠬᠡᠰᠢᠬᠦᠨ᠃ ᠲᠡᠷᠡ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠲᠠᠯ᠎ᠠ ᠳᠤ ᠦᠨᠳᠦᠰᠦ ᠬᠠᠳᠬᠤᠨ᠂ ᠲᠡᠨᠳᠡ ᠠᠴᠠ ᠡᠷᠴᠢ ᠬᠦᠴᠦ ᠠᠪᠴᠤ ᠤᠳᠤ  ᠬᠦᠷᠴᠡᠢ᠃ ᠫᠠᠨ ᡁᠢ ᠷᠦᠩ᠄ ︽ᠪᠢ ᠨᠢᠬᠡ ᠡᠳᠦᠷ ᠠᠵᠢᠯ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠦ᠂ ᠨᠢᠬᠡ ᠡᠳᠦᠷ ᠠᠷᠢᠭᠤᠨ ᠲᠠᠷᠬᠠᠨ  ᠪᠠᠶᠢᠴᠠᠭᠠᠬᠤ ᠰᠦᠯᠳᠡ ᠪᠠᠨ ᠵᠡᠬᠦᠵᠦ ᠪᠠᠶᠢᠬᠤ ᠳᠤ ᠯᠡ ᠬᠦᠷᠪᠡᠯ᠂ ᠮᠠᠯᠴᠢᠨ ᠲᠦᠮᠡᠨ ᠳᠡᠭᠡᠨ ᠬᠠᠷᠠᠮ ᠦᠬᠡᠢ ᠦᠢᠯᠡᠴᠢᠯᠡᠨ᠎ᠡ︾ ᠬᠡᠵᠦ  ᠵᠤᠷᠢᠬ ᠢᠯᠡᠳᠬᠡᠵᠦ ᠪᠠᠶᠢᠯ᠎ᠠ᠃ ᠫᠠᠨ ᡁᠢ ᠷᠦᠩ ᠰᠠᠨᠠᠬᠰᠠᠨ ᠬᠦᠰᠡᠯ ᠵᠤᠷᠢᠭᠰᠠᠨ ᠦᠢᠯᠡᠰ ᠲᠦᠯᠦᠭᠡ ᠵᠢᠳᠬᠦᠨ  ᠲᠡᠮᠡᠤᠯᠦᠭᠰᠡᠭᠡᠷ ᠁       

    ᠫᠠᠨ ᡁᠢ ᠷᠦᠩ ᠲᠤᠪᠴᠢ ᠨᠠᠮᠳᠠᠷ       
    ᠫᠠᠨ ᡁᠢ ᠷᠦᠩ᠂ 1962 ᠤᠨ 5 ᠰᠠᠷ᠎ᠠ ᠳᠤ ᠤᠯᠠᠭᠠᠨᠴᠠᠪ ᠬᠤᠳᠠ ᠴᠠᠬᠠᠷ ᠪᠠᠷᠠᠭᠤᠨ ᠭᠠᠷᠤᠨ ᠲᠤᠮᠳᠠᠳᠤ  ᠬᠤᠰᠢᠭᠤᠨ ᠳᠤ ᠲᠦᠷᠦᠵᠡᠢ᠃ 1986 ᠤᠨ ᠳᠤ᠂ ᠪᠤᠭᠤᠳᠤ ᠬᠤᠳᠠ ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠤᠭᠠᠳᠤ ᠬᠤᠰᠢᠭᠤᠨ  ᠪᠠᠶᠢᠴᠠᠭᠠᠬᠤ ᠬᠤᠷᠢᠶᠠᠨ ᠳᠤ ᠰᠢᠯᠵᠢᠨ ᠠᠵᠢᠯᠯᠠᠵᠤ᠂ ᠤᠷᠢᠳ ᠬᠤᠵᠢᠳ ᠨᠠᠷᠢᠨ ᠪᠢᠴᠢᠬᠡᠴᠢ᠂ ᠲᠤᠰᠠᠯᠠᠬᠴᠢ ᠪᠠᠶᠢᠴᠠᠭᠠᠬᠴᠢ᠂  ᠪᠠᠶᠢᠴᠠᠭᠠᠬᠴᠢ᠂ ᠪᠠᠷᠢᠪᠴᠢᠯᠠᠬᠤ ᠵᠦᠪᠰᠢᠶᠡᠷᠡᠬᠦ ᠰᠠᠯᠠᠭᠠᠨ ᠲᠠᠷᠤᠭ᠎ᠠ᠂ ᠬᠤᠷᠢᠭᠤᠯ ᠭᠠᠵᠠᠷ ᠰᠠᠯᠠᠭᠠᠨ ᠲᠠᠷᠤᠭ᠎ᠠ᠂  ᠲᠤᠰᠢᠶᠠᠯ ᠭᠤᠳᠤᠭᠠᠨ ᠡᠷᠬᠡ ᠳᠤ ᠬᠠᠯᠳᠠᠬᠤ ᠡᠰᠡᠷᠬᠦᠴᠡᠬᠦ ᠲᠤᠪᠴᠢᠶᠠᠨ ᠲᠤᠪᠴᠢᠶᠠᠨ ᠲᠠᠷᠤᠭ᠎ᠠ ᠪᠠᠷ ᠠᠵᠢᠯᠯᠠᠨ᠂ ᠤᠳᠤ  ᠲᠠᠷᠬᠠᠨ ᠮᠤᠤᠮᠢᠩᠭᠠᠨ ᠬᠤᠯᠪᠤᠭᠠᠳᠤ ᠬᠤᠰᠢᠭᠤᠨ ᠪᠠᠶᠢᠴᠠᠭᠠᠬᠤ ᠬᠤᠷᠢᠶ᠎ᠠ ᠪᠠᠶᠢᠴᠠᠭᠠᠬᠤ ᠵᠦᠪᠯᠡᠯ ᠲᠤᠰᠬᠠᠢ ᠬᠡᠰᠢᠬᠦᠨ᠂  ᠮᠠᠨᠳᠤᠯ ᠪᠤᠭᠤᠮᠳᠠ ᠳᠤ ᠰᠠᠭᠤᠭ᠎ᠠ ᠪᠠᠶᠢᠴᠠᠭᠠᠬᠤ ᠲᠠᠰᠤᠬ ᠡᠷᠬᠢᠯᠡᠭᠴᠢ ᠪᠦᠬᠡᠳ ᠰᠢᠷᠠᠮᠦ᠋ᠷᠡᠨ ᠪᠠᠶᠢᠴᠠᠭᠠᠬᠤ ᠲᠠᠰᠤᠬ ᠡᠷᠬᠢᠯᠡᠭᠴᠢ  ᠂ ᠨᠢᠬᠡᠳᠦᠬᠡᠷ ᠲᠡᠰ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ  ᠠᠵᠢᠯᠯᠠᠵᠤ ᠪᠤᠢ᠃      
    ᠫᠠᠨ ᡁᠢ ᠷᠦᠩ ᠤᠷᠢᠳ ᠬᠤᠵᠢᠳ ︽ᠠᠵᠢᠯ ᠦᠢᠯᠡᠰ ᠲᠡᠭᠡᠳᠦᠯᠡᠨ ᠠᠵᠢᠯ ᠪᠠᠶᠢᠷᠢ ᠪᠠᠨ ᠬᠠᠶᠢᠷᠠᠯᠠᠬᠰᠠᠠ ᠤᠳᠤᠨ︾  ᠂ ︽ᠰᠢᠨ᠎ᠡ ᠡᠬᠦᠳᠦᠨ ᠰᠢᠯᠢᠳᠡᠭ ᠪᠤᠯᠬᠤ ᠪᠠᠷ ᠴᠢᠷᠮᠠᠶᠢᠬᠰᠠᠨ ᠤᠳᠤᠨ︾᠂ ︽ᠪᠤᠭᠤᠳᠤ ᠬᠤᠳᠠ ᠬᠦᠳᠡᠯᠮᠦᠷᠢ ᠵᠢᠱᠢᠶᠡᠴᠢ︾ ᠂ ︽ᠪᠤᠭᠤᠳᠦ ᠬᠤᠳᠠ ᠰᠢᠯᠢᠳᠡᠭ ᠡᠪ ᠬᠠᠮᠳᠤ ᠨᠠᠮ ᠬᠡᠰᠢᠬᠦᠨ︾᠎  ᠴᠤᠯᠠᠯᠠᠬᠳᠠᠨ᠂ ᠤᠷᠢᠳ ᠬᠤᠵᠢᠳ ᠬᠤᠶᠠᠳᠤᠭᠠᠷ  ᠲᠡᠰ ᠭᠠᠪᠢᠶ᠎ᠠ 3 ᠤᠳᠠᠭ᠎ᠠ᠂ ᠭᠤᠷᠪᠠᠳᠤᠭᠠᠷ ᠲᠡᠰ ᠭᠠᠪᠢᠶ᠎ᠠ 2 ᠤᠳᠠᠭ᠎ᠠ ᠲᠡᠮᠳᠡᠭᠯᠡᠬᠦᠯᠦᠨ᠂ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨ  ᠨᠠᠮ ᠬᠤᠷᠢᠶ᠎ᠠ᠂ ᠵᠠᠰᠠᠬ ᠤᠷᠳᠤᠨ ᠠᠴᠠ ᠲᠡᠬᠦᠨ ᠳᠤ ︽ᠦᠪᠦᠷ ᠮᠤᠩᠭᠤᠯ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨ ᠲᠡᠷᠢᠬᠦᠨ  ᠠᠵᠢᠯᠳᠠᠨ︾᠎ ᠢᠷᠠᠭᠤ ᠠᠯᠳᠠᠷ ᠴᠤᠯᠠ ᠤᠯᠭᠤᠵᠡᠢ᠃ 2016 ᠤᠨ ᠡᠬᠢ ᠪᠠᠷ᠂ ᠦᠪᠡᠷᠳᠡᠬᠡᠨ ᠵᠠᠰᠠᠬᠤ ᠤᠷᠤᠨ ᠨᠠᠮ  ᠬᠤᠷᠢᠶ᠎ᠠ ᠤᠬᠠᠭᠤᠯᠬᠤ ᠬᠡᠯᠳᠡᠰ᠂ ᠤᠯᠤᠰ ᠲᠦᠷᠦ ᠬᠠᠤᠯᠢ ᠴᠠᠭᠠᠵᠠ ᠬᠤᠷᠢᠶ᠎ᠠ ᠬᠠᠮᠳᠤᠷᠠᠨ ︽ᠫᠠᠨ ᡁᠢ ᠷᠦᠩ ᠨᠦᠬᠦᠷ ᠠᠴᠠ  ᠰᠤᠷᠤᠯᠴᠠᠬᠤ ᠠᠵᠢᠯᠯᠠᠭ᠎ᠠ ᠦᠷᠨᠢᠬᠦᠯᠬᠦ ᠲᠤᠬᠠᠢ ᠮᠡᠳᠡᠭᠳᠡᠯ︾ ᠪᠠᠭᠤᠯᠭᠠᠨ᠂ ᠤᠷᠢᠳ ᠬᠤᠵᠢᠳ ᠫᠠᠨ ᡁᠢ ᠷᠦᠩ ᠨᠦᠬᠦᠷ  ᠲᠡᠷᠢᠬᠦᠨ ᠦᠢᠯᠡ ᠠᠵᠢᠯᠯᠠᠭ᠎ᠠ ᠮᠡᠳᠡᠬᠦᠯᠦᠯᠳᠡ ᠬᠤᠷᠠᠯ᠂ ᠨᠡᠶᠢᠳᠡᠯᠡᠬᠦ ᠬᠤᠷᠠᠯ ᠢ ᠡᠷᠬᠢᠯᠡᠨ ᠶᠠᠪᠤᠬᠳᠠᠭᠤᠯᠵᠤ᠂ ᠫᠠᠨ ᡁᠢ  ᠷᠦᠩ ᠢ ︽ᠤᠮᠠᠷᠠᠳᠤ ᠬᠢᠯᠢ ᠵᠢᠱᠢᠶᠡᠴᠢ︾᠎ ᠪᠠᠷ ᠴᠤᠯᠠᠯᠠᠵᠠᠢ᠃ ᠲᠦᠷᠦᠬᠦᠬᠡᠨ ᠫᠠᠨ ᡁᠢ ᠷᠦᠩ ᠪᠠᠰᠠ ︽ᠪᠦᠬᠦ ᠤᠯᠤᠰ  ᠵᠢᠱᠢᠶᠡᠴᠢ ᠪᠠᠶᠢᠴᠠᠭᠠᠬᠤ ᠲᠤᠰᠢᠶᠠᠯᠳᠠᠨ︾᠎ ᠢᠷᠠᠭᠤ ᠠᠯᠳᠠᠷ ᠢ ᠬᠦᠷᠳᠡᠭᠰᠡᠨ ᠪᠠᠶᠢᠨ᠎ᠠ᠃

ᠵᠣᠬᠢᠶᠠᠭᠴᠢ :