ᠠ᠊ ᠳᠠᠷᠤᠭᠠ ᠶᠢᠨ ᠤᠳᠬᠤᠨ ᠬᠦᠦ ᠶᠢᠨ ᠬᠤᠷᠢᠮ
︵ᠣᠬᠤᠷ ᠦᠬᠦᠯᠡᠯᠭᠡ︶
ᠠ᠊ ᠳᠠᠷᠤᠭᠠ ᠬᠤᠰᠢᠭᠤᠨ ᠤ ᠪᠠᠨ ᠤᠯᠤᠰ ᠲᠥᠷᠦ ᠶᠢᠨ ᠵᠦᠪᠯᠡᠯᠭᠡᠨ ᠳᠤ ᠠᠵᠢᠯ ᠰᠢᠯᠵᠢᠵᠦ ᠢᠷᠡᠭᠡᠳ ᠶᠠᠭ ᠪᠦᠲᠦᠨ ᠭᠤᠷᠪᠠᠨ ᠵᠢᠯ ᠪᠤᠯᠴᠢᠬᠠᠯᠠ᠃ ᠦᠵᠡᠵᠦ ᠪᠠᠶᠢᠳᠠᠯᠠ ᠵᠢᠷᠠ ᠶᠢ ᠰᠢᠬᠠᠵᠤ ᠵᠠᠵᠢᠨ ᠦᠰᠦ ᠨᠢ ᠴᠠᠶᠢᠪᠠ᠃
ᠠᠷᠪᠠᠨ ᠬᠡᠳᠦᠨ ᠵᠢᠯ ᠳᠠᠷᠤᠭᠠ ᠶᠢᠨ ᠲᠤᠰᠢᠶᠠᠯ ᠳᠤ ᠶᠠᠪᠤᠵᠦ ᠣᠳᠤ ᠨᠠᠰᠤᠨ ᠤ ᠠᠮᠠᠷᠠᠯᠲᠠ ᠪᠠᠨ ᠠᠪᠬᠤ ᠠᠴᠠ ᠡᠮᠦᠨᠡ ᠤᠳᠬᠤᠨ ᠬᠦᠦ ᠶᠢᠨ ᠢᠶᠠᠨ ᠬᠤᠷᠢᠮ ᠢ ᠶᠠᠭᠠᠬᠢᠭᠰᠠᠨ ᠴᠦ ᠪᠣᠰᠤᠳ ᠬᠡᠤᠬᠡᠳ ᠠᠴᠠ ᠪᠠᠨ ᠪᠠᠭᠤᠷᠠᠢ ᠬᠢᠵᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠠ᠊ ᠳᠠᠷᠤᠭᠠ ᠶᠢᠨ ᠡᠬᠡᠨᠡᠷ ᠡᠬᠡᠮᠦᠭᠲᠦ ᠬᠦᠭᠰᠢᠨ ᠡᠳᠦᠷᠵᠢᠨ ᠶᠠᠷᠢᠵᠤ ᠶᠠᠩᠰᠢᠭᠠᠳ ᠯᠠ ᠪᠠᠶᠢᠬᠤ ᠳᠤ ᠰᠤᠨᠤᠰᠬᠤ ᠦᠭᠡᠢ ᠭᠡᠵᠦ ᠪᠠᠶᠢᠨᠤ ᠳ᠋ᠠ᠃ ᠠ᠊ ᠳᠠᠷᠤᠭᠠ S ᠪᠠᠯᠭᠠᠰᠤᠨ ᠤ ᠪᠠᠨ ᠬᠠᠮᠤᠭ ᠦᠨᠳᠦᠷ ᠳᠡᠰ ᠤᠨ ᠢᠳᠡᠵᠦ ᠳᠠᠳᠴᠤ ᠤᠤᠭᠤᠵᠤ ᠵᠠᠩᠰᠢᠭᠰᠠᠨ ᠬᠤᠭᠤᠯᠠᠨ ᠭᠡᠷ ᠤᠨ ᠵᠢᠩᠯᠢ ᠳᠡᠭᠡᠨ ᠤᠲᠠᠰᠤ ᠶᠠᠪᠤᠭᠤᠯᠵᠤ᠂ ᠰᠠᠷᠠ ᠶᠢᠨ ᠡᠬᠢᠨ ᠤ ᠭᠠᠷᠠᠭ ᠤᠨ ᠡᠳᠤᠷ ᠢ ᠤᠳᠬᠤᠨ ᠬᠦᠦ ᠶᠢᠨ ᠢᠶᠠᠨ ᠬᠤᠷᠢᠮ ᠤᠨ ᠡᠳᠦᠷ ᠢᠶᠠᠷ ᠪᠤᠯᠵᠤᠨ ᠲᠤᠭᠲᠠᠵᠤ ᠰᠢᠷᠡᠭᠡ ᠪᠤᠳᠠᠭᠠ᠂ ᠠᠷᠢᠬᠢ ᠳᠠᠷᠠᠰᠤ ᠶᠢ ᠡᠷᠲᠡ ᠪᠡᠯᠡᠳᠭᠡᠬᠦ ᠪᠠᠷ ᠵᠠᠯᠠᠯᠭᠠ ᠶᠢᠨ ᠪᠢᠴᠢᠭ ᠢ ᠣᠪᠤᠭᠠ ᠠᠷᠪᠢᠨ ᠳᠠᠷᠤᠮᠠᠯᠯᠠᠵᠤ ᠦᠪᠡᠷ ᠤᠨ ᠪᠡᠶᠡ ᠪᠠᠷ ᠲᠠᠷᠬᠠᠭᠠᠵᠤ ᠶᠠᠪᠤᠪᠠ᠃
ᠠᠷᠪᠠᠨ ᠵᠢᠯ ᠤᠨ ᠡᠮᠤᠨᠡ ᠠ᠊ ᠳᠠᠷᠤᠭᠠ ᠶᠢᠨ ᠬᠡᠢ ᠮᠣᠷᠢ ᠨᠢ ᠮᠠᠨᠳᠤᠵᠤ ᠬᠡᠰᠢᠭ ᠪᠣᠶᠠᠨ ᠨᠢ ᠳᠡᠭᠳᠡᠯᠡ᠃ ᠲᠡᠷᠡ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠨᠠᠷᠢᠨ ᠪᠢᠴᠢᠭᠡᠴᠢ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠨᠢᠭᠡ ᠯᠠ ᠳᠣᠣᠷᠠ ᠬᠤᠰᠢᠭᠤᠨ ᠳᠡᠳ᠋ ᠳᠠᠷᠤᠭᠠ ᠶᠢᠨ ᠲᠤᠰᠢᠶᠠᠯ ᠳᠤ ᠳᠠᠪᠰᠢᠨ ᠭᠠᠷᠴᠦ᠂ ᠤᠳᠠᠭᠰᠠᠨ ᠴᠦ ᠦᠭᠡᠢ ᠳᠠᠷᠠᠭᠠ ᠵᠢᠯ ᠨᠢ ᠦᠭᠡᠯᠡᠢ ᠬᠦᠦ ᠳᠡᠭᠡᠨ ᠬᠤᠷᠢᠮ ᠬᠢᠭᠰᠡᠨ ᠴᠢᠨᠢ ᠦᠨᠡᠭᠡᠷ ᠰᠠᠨᠠᠭᠰᠠᠨ ᠠᠴᠠ ᠭᠠᠳᠠᠭᠤᠷ ᠬᠤᠷᠢᠮ ᠳᠤ ᠰᠠᠭᠠᠳᠠᠭᠰᠠᠳ ᠤᠨ ᠬᠦᠮᠦᠨ ᠤ ᠲᠤᠭᠠ ᠨᠢ ᠵᠠᠯᠠᠯᠭᠠ ᠶᠢᠨ ᠪᠢᠴᠢᠭ ᠤᠨ ᠬᠠᠭᠤᠳᠠᠰᠤ ᠶᠢᠨ ᠨᠢᠭᠤᠷ ᠠᠴᠠ ᠬᠤᠯᠠ ᠬᠡᠲᠤᠷᠡᠵᠦ᠂ ᠨᠢᠭᠡ ᠡᠳᠥᠷ ᠢᠶᠠᠷ ᠲᠦᠰᠦᠪᠯᠡᠵᠦ ᠪᠠᠶᠢᠭᠰᠠᠨ ᠬᠤᠷᠢᠮ ᠤᠨ ᠶᠠᠪᠤᠳᠠᠯ ᠳᠤ ᠬᠤᠶᠠᠷ ᠡᠳᠥᠷ ᠪᠦᠭᠰᠡ ᠰᠠᠭᠤᠳᠠᠯ ᠦᠭᠡᠢ ᠮᠣᠩᠬᠢᠨᠠᠨ ᠵᠦᠳᠡᠭᠰᠡᠨ ᠠ᠊ ᠳᠠᠷᠤᠭᠠ᠂ ᠡᠬᠡᠮᠦᠭᠳᠦ ᠬᠦᠭᠰᠢᠨ ᠬᠤᠶᠠᠭᠤᠯᠠ ᠣᠷᠤᠢ ᠨᠢ ᠬᠤᠨᠤᠭ ᠤᠨ ᠦᠷᠦᠭᠡᠨ ᠳᠡᠭᠡᠨ ᠬᠠᠷᠮᠠᠨ ᠳᠦᠭᠦᠷᠡᠩ ᠵᠠᠭᠤᠳᠦ ᠶᠢᠨ ᠵᠣᠭᠤᠰ ᠢᠶᠠᠨ ᠠᠭᠤᠳᠠᠯᠠᠨ ᠭᠠᠷᠭᠠᠵᠤ ᠲᠣᠭᠠᠯᠠᠨ ᠲᠣᠭᠠᠯᠠᠨ ᠪᠠᠭᠯᠠᠵᠤ᠂ ᠬᠠᠷᠠᠨ ᠬᠠᠷᠠᠨ ᠪᠠᠶᠠᠰᠴᠤ ᠭᠠᠷᠤᠭᠰᠠᠨ ᠪᠢᠯᠡ ᠂᠂᠂᠂᠂᠂
ᠡᠳᠦᠷ ᠬᠤᠨᠤᠭ ᠦᠩᠭᠡᠷᠡᠭᠰᠡᠭᠡᠷ ᠤᠳᠠᠭᠰᠠᠨ ᠴᠦ ᠦᠭᠡᠢ ᠰᠠᠷᠠ ᠶᠢᠨ ᠡᠬᠢᠨ ᠤ ᠭᠠᠷᠠᠭ ᠤᠨ ᠡᠳᠤᠷ ᠪᠣᠯᠵᠤ᠂ ᠠ᠊ ᠳᠠᠷᠤᠭᠠ ᠶᠢᠨ ᠣᠳᠬᠤᠨ ᠬᠦᠦ ᠶᠢᠨ ᠬᠢᠨᠢ ᠬᠤᠷᠢᠮ ᠤᠨ ᠡᠳᠦᠷ ᠬᠦᠷᠴᠦ ᠢᠷᠡᠯᠡ᠃ ᠲᠡᠭᠡᠭᠡᠳ ᠲᠡᠷᠡ ᠬᠦᠭᠰᠢᠨ ᠡᠬᠡᠮᠦᠭᠳᠦ ᠲᠠᠢ ᠪᠠᠨ ᠬᠤᠶᠠᠭᠤᠯᠠ ᠠᠯᠢ ᠡᠷᠲᠡ ᠠᠴᠠ ᠪᠣᠯᠵᠤᠵᠤ ᠲᠣᠭᠲᠠᠭᠰᠠᠨ ᠦᠨᠳᠦᠷ ᠳᠡᠰ ᠤᠨ ᠬᠤᠭᠤᠯᠠᠨ ᠭᠡᠷ ᠲᠡᠭᠡᠨ ᠵᠠᠪᠳᠤᠨ ᠢᠷᠡᠵᠦ᠂ ᠤᠳᠬᠤᠨ ᠬᠦᠦ ᠶᠢᠨ ᠬᠢᠨᠢ ᠬᠤᠷᠢᠮ ᠨᠠᠶᠢᠷ ᠲᠤ ᠮᠣᠷᠢᠯᠠᠨ ᠰᠠᠭᠠᠲᠠᠬᠤ ᠬᠦᠮᠦᠰ ᠢ ᠲᠣᠰᠤᠨ ᠠᠪᠴᠦ ᠤᠭᠲᠤᠬᠤ ᠪᠠᠷ ᠡᠭᠦᠳᠡ ᠰᠠᠬᠢᠨ ᠵᠣᠭᠰᠤᠪᠠ᠃ ᠤᠳᠠᠭᠰᠠᠨ ᠴᠦ ᠦᠭᠡᠢ ᠬᠤᠭᠤᠯᠠᠨ ᠭᠡᠷ ᠤᠨ ᠦᠢᠯᠡᠴᠢᠯᠡᠭᠴᠢ ᠠᠪᠠᠭ᠋ᠠᠢ ᠨᠠᠷ ᠬᠡᠳᠤᠨ ᠠᠷᠪᠠᠨ ᠰᠢᠷᠡᠭᠡ ᠶᠢ ᠭᠢᠯᠪᠠᠶᠢᠲᠠᠯᠠ ᠠᠷᠴᠢᠵᠤ᠂ ᠪᠦᠬᠦᠯᠢ ᠲᠠᠬᠢᠶᠠ᠂ ᠪᠦᠳᠦᠭᠦᠨ ᠵᠢᠭᠠᠰᠤ᠂ ᠠᠭᠤᠷ ᠰᠠᠪᠰᠠᠯᠠᠭᠰᠠᠨ ᠠᠮᠲᠠᠲᠤ ᠨᠤᠭᠤᠭᠠ ᠶᠢ ᠰᠢᠷᠡᠭᠡ ᠳᠦᠭᠦᠷᠲᠡᠯᠡ ᠭᠠᠷᠭᠠᠵᠤ ᠡᠬᠢᠯᠡᠪᠠ᠃ ᠨᠠᠢᠮᠠᠨ ᠴᠠᠭ᠂᠂᠂᠂ ᠂᠂᠂᠂ ᠶᠢᠰᠤᠨ ᠴᠠᠭ ᠂᠂᠂᠂ ᠂᠂᠂᠂ ᠠᠷᠪᠠᠨ ᠴᠠᠭ ᠤᠶᠢᠷᠠᠳᠤᠪᠠ᠃ ᠠ᠊ ᠳᠠᠷᠤᠭᠠ᠂ ᠡᠬᠡᠮᠦᠭᠲᠦ ᠬᠦᠭᠰᠢᠨ ᠬᠤᠶᠠᠭᠤᠯᠠ ᠡᠭᠦᠳᠡᠨ ᠭᠠᠳᠠᠨᠠ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠬᠤᠷᠢᠮ ᠳᠤ ᠮᠣᠷᠢᠯᠠᠬᠤ ᠬᠦᠮᠦᠰ ᠢ ᠬᠠᠷᠠᠵᠤ ᠵᠣᠭᠰᠤᠨᠠ᠃ ᠤᠤᠯ ᠤᠨ ᠲᠤᠭᠲᠠᠭᠰᠠᠨ ᠦᠷᠯᠦᠭᠡ ᠶᠢᠨ ᠨᠠᠢᠮᠠᠨ ᠴᠠᠭ ᠲᠤ ᠬᠤᠷᠢᠮ ᠨᠠᠶᠢᠷ ᠡᠬᠢᠯᠡᠬᠦ ᠭᠡᠰᠡᠨ ᠴᠢᠨᠢ ᠣᠳᠤ ᠪᠤᠯᠲᠠᠯᠠ ᠲᠠᠪᠤᠨ ᠰᠢᠷᠡᠭᠡ ᠵᠣᠴᠢᠨ ᠴᠦ ᠠᠷᠡᠢ ᠬᠦᠷᠬᠦ ᠦᠭᠡᠢ᠃ ᠭᠡᠬᠦ ᠳᠡᠭᠡᠨ ᠲᠡᠳᠡᠨᠡᠷ ᠤᠨ ᠵᠣᠩᠭᠢᠯᠠᠬᠤ ᠤᠯᠠᠨ ᠨᠢ ᠴᠦᠮ ᠠ᠊ ᠳᠠᠷᠤᠭᠠ ᠶᠢᠨ ᠰᠠᠲᠤᠨ ᠲᠦᠷᠦᠯ᠂ ᠨᠠᠶᠢᠵᠠ ᠨᠠᠷ ᠨᠢ ᠪᠠᠶᠢᠬᠤ ᠠᠴᠠ ᠪᠢᠰᠢ ᠬᠠᠷᠢᠨ ᠬᠤᠰᠢᠭᠤᠨ ᠤ ᠪᠠᠶᠢᠭᠤᠯᠭᠠ ᠨᠢᠭᠡᠴᠡ᠂ ᠰᠠᠯᠠᠭᠠ ᠲᠤᠪᠴᠢᠶᠠᠨ ᠤ ᠺᠠᠳ᠋ᠷ ᠠᠵᠢᠯᠲᠠᠨ ᠨᠠᠷ ᠲᠤᠩ ᠴᠦᠭᠡᠨ ᠬᠠᠷᠠᠭᠲᠠᠨᠠ᠃ ᠦᠳᠡ ᠦᠩᠭᠡᠷᠡᠵᠦ ᠠ᠊ ᠳᠠᠷᠤᠭᠠ ᠶᠢᠨ ᠤᠳᠬᠤᠨ ᠬᠦᠦ ᠶᠢᠨ ᠬᠤᠷᠢᠮ ᠨᠠᠶᠢᠷ ᠲᠤ ᠮᠣᠷᠢᠯᠠᠨ ᠢᠷᠡᠭᠰᠡᠨ ᠬᠦᠮᠦᠰ ᠬᠦᠵᠦᠭᠦᠦ ᠠᠮᠠ ᠪᠠᠨ ᠤᠯᠠᠶᠢᠯᠭᠠᠨ ᠬᠦᠯᠴᠦᠭᠦᠷᠡᠲᠡᠯᠡ ᠤᠤᠭᠤᠵᠠᠭᠠᠵᠤ ᠠᠷᠢᠬᠢᠨ ᠰᠢᠷᠡᠭᠡᠨ ᠠᠴᠠ ᠪᠠᠭᠤᠪᠠ ᠃ ᠦᠯᠡᠳᠡᠭᠡᠳ ᠪᠠᠶᠢᠭᠰᠠᠨ ᠲᠡᠷᠡ ᠬᠡᠳᠦᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠮᠦᠨ ᠰᠠᠭᠤᠭᠰᠠᠨ ᠬᠦᠮᠦᠨ ᠠᠯᠠᠭᠠ ᠬᠤᠭᠤᠰᠤᠨ ᠢᠶᠠᠷ ᠢᠶᠠᠨ ᠪᠠᠶᠢᠭᠰᠠᠭᠠᠷ᠃ ᠦᠷᠦᠵᠦ ᠲᠠᠯᠪᠢᠭᠰᠠᠨ ᠨᠤᠭᠤᠭᠠ ᠴᠠᠭᠠ ᠨᠢ ᠠᠯᠢ ᠬᠡᠳᠤᠶᠢᠨ ᠬᠦᠷᠦᠵᠦ ᠬᠦᠢᠲᠡᠨ ᠪᠣᠯᠪᠠ᠃
ᠠ᠊ ᠳᠠᠷᠤᠭᠠ᠂ ᠡᠬᠡᠮᠦᠭᠲᠦ ᠬᠦᠭᠰᠢᠨ ᠵᠠᠯᠭᠠᠭᠠᠳ ᠮᠦᠨ ᠡᠭᠦᠳᠡᠨ ᠭᠠᠳᠠᠨᠠ ᠬᠠᠷᠠᠵᠤ ᠵᠣᠭᠰᠤᠪᠠ᠃ ᠨᠠᠷᠠᠨ ᠰᠢᠩᠭᠡᠵᠦ ᠣᠷᠤᠢ ᠪᠣᠯᠤᠯᠠ᠃ ᠬᠤᠷᠢᠮ ᠳᠤ ᠮᠣᠷᠢᠯᠠᠨ ᠢᠷᠡᠭᠰᠡᠨ ᠬᠦᠮᠦᠨ ᠥᠭᠡᠷᠡ ᠨᠡᠮᠡᠭᠳᠡᠭᠰᠡᠨ ᠢᠶᠠᠷ ᠦᠭᠡᠢ᠃
ᠳᠠᠷᠠᠭᠠ ᠡᠳᠤᠷ ᠨᠢ ᠠ᠊ ᠳᠠᠷᠤᠭᠠ ᠪᠠᠶᠢᠭᠤᠯᠭᠠ ᠳᠠᠭᠠᠨ ᠬᠦᠷᠴᠦ ᠠᠵᠢᠯᠯᠠᠬᠤ ᠭᠡᠷ ᠲᠡᠭᠡᠨ ᠠᠯᠬᠤᠨ ᠣᠷᠤᠲᠠᠯᠠ ᠨᠠᠷᠢᠨ ᠪᠢᠴᠢᠭᠡᠴᠢ ᠨᠢ ᠰᠠᠮᠫᠢᠯ ᠭᠤᠸᠠᠢ ᠨᠢᠭᠡ ᠭᠠᠷᠠᠭ ᠤᠨ ᠡᠮᠦᠨᠡ ᠨᠢᠭᠡᠨᠲᠡ ᠳᠡᠭᠡᠲᠦ ᠱᠠᠲᠤᠨ ᠤ ᠵᠣᠬᠢᠶᠠᠨ ᠪᠠᠶᠢᠭᠤᠯᠬᠤ ᠭᠡᠯᠳᠡᠰ ᠠᠴᠠ ᠠ᠊ ᠳᠠᠷᠤᠭᠠ ᠶᠢᠨ ᠠᠵᠢᠯ ᠠᠴᠠ ᠪᠠᠨ ᠠᠮᠠᠷᠠᠬᠤ ᠮᠡᠳᠡᠭᠳᠡᠯ ᠤᠨ ᠪᠢᠴᠢᠭ ᠢ ᠲᠡᠭᠦᠨ ᠳᠤ ᠭᠠᠷᠲᠠᠭᠤᠯᠪᠠ᠃