ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ  ᠮᠡᠬᠡᠯᠡᠭᠰᠡᠨ ᠶᠠᠯᠠᠳᠣ ᠬᠡᠷᠡᠭ  ᠲᠤᠬᠠᠢ ᠲᠤᠪᠴᠢ ᠦᠭᠦᠯᠡᠬᠦᠢ    

         ᠨᠢᠳᠤᠨᠤᠨ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠠᠷᠠᠳ ᠪᠠᠶᠢᠴᠠᠭᠠᠬᠤ ᠬᠤᠷᠢᠶ᠎ᠠ ᠨᠢ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ  ᠪᠤᠰᠣᠳ ᠢ ᠮᠡᠬᠡᠯᠡᠭᠰᠡᠨ ᠬᠡᠷᠡᠭ ᠢ ᠤᠷᠢᠳ ᠬᠤᠵᠢᠳ ᠬᠡᠳᠦᠨᠳᠡ ᠲᠤᠰᠴᠤ᠂ ᠬᠡᠷᠡᠭᠳᠡᠨ ᠪᠡᠶᠡᠴᠢ ᠵᠤᠷᠢᠯᠭ᠎ᠠ᠂ ᠬᠡᠷᠡᠭ ᠰᠢᠨᠵᠢ ᠴᠢᠨᠠᠷ᠂ ᠨᠡᠶᠢᠬᠡᠮ ᠬᠤᠤᠷ ᠬᠦᠨᠦᠬᠡᠯᠳᠦ ᠴᠢᠨᠠᠷ ᠵᠡᠷᠬᠡ ᠤᠯᠠᠨ ᠲᠠᠯ᠎ᠠ ᠬᠢᠨᠠᠨ ᠪᠠᠶᠢᠴᠠᠭᠠᠭᠰᠠᠨ ᠰᠠᠭᠤᠷᠢᠨ ᠲᠡᠭᠡᠷ᠎ᠡ ᠬᠠᠤᠯᠢ ᠶᠤᠰᠣᠭᠠᠷ ᠠᠯᠪᠠᠨ ᠵᠠᠭᠠᠯᠳᠣᠯᠭ᠎ᠠ ᠭᠠᠷᠭᠠᠭᠰᠠᠨ ᠪᠠᠶᠢᠨ᠎ᠠ᠃ ᠡᠳᠦᠬᠡ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠠᠷᠠᠳ ᠰᠢᠬᠦᠬᠦ ᠬᠤᠷᠢᠶ᠎ᠠ ᠨᠢ ᠡᠳᠡᠬᠡᠷ ᠬᠡᠷᠡᠭᠳᠡᠳ ᠢ ᠴᠦᠮ ᠮᠡᠬᠡᠯᠡᠭᠰᠡᠨ ᠶᠠᠯ᠎ᠠ ᠵᠦᠷᠢᠴᠡᠭᠰᠡᠨ  ᠨᠤᠳᠠᠯᠠᠨ ᠲᠤᠭᠳᠠᠭᠠᠵᠦ ᠡᠷᠡᠬᠦᠦ ᠬᠡᠷᠡᠭ ᠰᠢᠬᠦᠨ ᠲᠠᠰᠣᠯᠣᠯᠳᠠ ᠭᠠᠷᠭᠠᠪᠠ᠃
      ᠠᠳᠡ ᠡᠳᠡᠬᠡᠷ ᠬᠡᠷᠡᠭ ᠪᠤᠳᠠᠳᠣ ᠶᠠᠪᠤᠳᠠᠯ  ᠦᠯᠢᠬᠡᠷᠯᠡᠨ ᠡᠶᠢᠮᠦᠷᠬᠦ ᠲᠦᠷᠦᠯ ᠮᠡᠬᠡᠯᠡᠯ ᠬᠡᠷᠡᠭ ᠨᠡᠶᠢᠳᠡᠯᠢᠭ ᠲᠠᠯ᠎ᠠ ᠳᠤ ᠳᠥᠭᠦᠮ ᠵᠠᠳᠠᠯᠤᠯᠳᠠ ᠬᠢᠰᠦᠬᠡᠢ᠃
       ᠨᠢᠬᠡ ᠳᠤ᠂ ᠪᠡᠶᠡᠴᠢ ᠵᠤᠷᠢᠯᠭ᠎ᠠ ᠬᠤᠪᠢ ᠳᠤ᠂ ᠡᠳᠡᠬᠡᠷ ᠬᠡᠷᠡᠭᠳᠡᠨ ᠴᠦᠮ ᠤᠷᠢᠳᠠᠪᠠᠷ ᠨᠡᠷ᠎ᠡ ᠮᠡᠳᠡᠬᠦᠯᠬᠦ ᠵᠤᠭᠤᠰ ᠠᠪᠴᠤ᠂ ᠲᠠᠷᠠᠭ᠎ᠠ ᠨᠢ ᠰᠢᠯᠭᠠᠯᠳᠠ ᠲᠠᠯᠠᠪᠠᠢ ᠰᠦᠢᠳᠬᠡᠯ᠂ ᠰᠢᠯᠭᠠᠯᠳᠠ ᠴᠠᠭ ᠲᠠᠭᠤᠰᠬᠠᠬᠤ ᠵᠤᠭᠤᠰ᠂ ᠦᠨᠡᠮᠯᠡᠯ ᠵᠤᠭᠤᠰ ᠬᠡᠬᠦ ᠮᠡᠳᠦ ᠪᠠᠷ ᠢᠳᠡᠭ ᠠᠯᠬᠤᠮ  ᠯᠠᠪᠰᠢᠷᠠᠭᠤᠯᠤᠨ ᠵᠤᠭᠤᠰ ᠠᠪᠤᠭᠠᠳ ᠮᠡᠬᠡᠯᠡᠵᠦ ᠠᠪᠴᠢᠷᠠᠭᠰᠠᠨ ᠵᠤᠭᠤᠰ ᠢᠳᠡᠵᠦ ᠤᠤᠭᠤᠵᠦ ᠨᠠᠭᠠᠳᠴᠤ ᠴᠡᠩᠬᠡᠵᠦ ᠪᠦᠷᠢᠯᠭᠡᠳᠡᠭ᠃ ᠬᠤᠤᠷ ᠠᠮᠰᠠᠭᠴᠢᠳ ᠦᠨᠡᠮᠯᠡᠯ ᠠᠰᠠᠭᠤᠪᠠᠯ ᠡᠯᠳᠡᠪ ᠵᠦᠢᠯ ᠰᠢᠯᠳᠠᠭ ᠵᠤᠬᠢᠶᠠᠵᠦ ᠬᠤᠶᠢᠰᠢᠯᠠᠭᠤᠯᠬᠤ᠂ ᠴᠢᠨᠠᠭᠰᠢᠯᠠᠪᠠᠯ ᠪᠤᠰᠣᠳ ᠬᠦᠮᠦᠨ ᠳᠤ ᠮᠡᠬᠡᠯᠡᠭᠳᠡᠴᠢᠬᠡᠵᠡᠢ ᠬᠡᠵᠦ ᠦᠪᠡᠷ ᠠᠴᠠ ᠪᠠᠨ ᠵᠠᠶᠢᠯᠠᠭᠤᠯᠬᠤ ᠪᠤᠶᠤ ᠤᠳᠠᠰᠣ ᠳ᠋ᠣᠭᠠᠷ ᠬᠠᠯᠠᠵᠦ ᠵᠠᠶᠢᠯᠠᠨ ᠲᠤᠳᠠᠭᠠᠳᠠᠭ᠃ ᠬᠡᠷᠡᠭᠳᠡᠨ ᠲᠦ᠋ ︵ᠪᠤᠷᠤᠭᠤᠯᠠᠭᠰᠠᠨ ᠨᠡᠷ᠎ᠡ︶ ᠮᠡᠬᠡᠯᠡᠭᠰᠡᠨ ᠬᠡᠷᠡᠭ ᠲᠤ ᠬᠡᠷᠡᠭᠳᠡᠨ ᠭᠤᠴᠢ ᠭᠠᠷᠤᠢ ᠬᠤᠤᠷ ᠠᠮᠰᠠᠴᠢᠳ ᠨᠡᠷ᠎ᠡ ᠮᠡᠳᠡᠬᠦᠯᠬᠦ ᠰᠦᠢᠳᠬᠡᠯ ᠢ ᠬᠤᠷᠢᠶᠠᠵᠦ ᠠᠪᠤᠭᠠᠳ ᠨᠡᠷ᠎ᠡ ᠦᠯᠦ ᠮᠡᠳᠡᠬᠦᠯᠦᠭᠰᠡᠨ ᠮᠦᠷᠳᠡᠬᠡᠨ ᠲᠠᠬᠢᠨ ᠲᠠᠪᠳᠠᠨ ᠡᠯᠳᠡᠪ ᠰᠢᠯᠳᠠᠭ ᠲᠤᠷᠠᠳᠴᠤ ᠵᠤᠭᠤᠰ ᠠᠪᠤᠭᠠᠳ᠂ ᠮᠡᠬᠡᠯᠡᠭᠰᠡᠨ ᠵᠤᠭᠤᠰ ᠴᠦᠮ ᠢ ᠰᠦᠯᠵᠢᠶᠡᠨ ᠲᠤᠭᠯᠠᠭᠠᠮ ᠳᠤ ᠦᠷᠡᠭᠡᠭᠰᠡᠨ ᠪᠤᠶᠤ ᠦᠷᠢ ᠰᠢᠷᠢ ᠪᠠᠨ ᠲᠦᠯᠦᠵᠦ ᠪᠦᠷᠢᠯᠬᠡᠪᠡ᠃ ᠬᠡᠷᠡᠭᠳᠡᠨ ᠪᠠ ︵ᠪᠤᠷᠤᠭᠤᠯᠠᠭᠰᠠᠨ ᠨᠡᠷ᠎ᠡ︶ ᠮᠡᠬᠡᠯᠡᠭᠰᠡᠨ ᠬᠡᠷᠡᠭ ᠲᠤ ᠮᠦᠨ ᠠᠳᠠᠯᠢᠬᠠᠨ ᠬᠡᠯᠪᠷᠢ ᠪᠠᠷ ᠬᠤᠷᠢ ᠰᠢᠬᠠᠮ ᠬᠤᠤᠷ ᠠᠮᠰᠠᠭᠴᠢᠳ ᠮᠦᠩᠬᠦ ᠮᠡᠬᠡᠯᠡᠵᠦ ᠠᠪᠤᠭᠠᠳ ᠱᠧᠨᠵᠧᠨ᠂ ᠬᠠᠶᠢᠨᠠᠨ  ᠵᠤᠭᠠᠯᠠᠵᠦ ᠪᠦᠬᠦᠨ ᠢ ᠪᠦᠷᠢᠯᠬᠡᠵᠦ ᠦᠷᠡᠭᠰᠡᠨ ᠪᠠᠶᠢᠨ᠎ᠠ᠃ ᠪᠤᠰᠣᠳ ᠢ ᠬᠠᠪᠰᠣᠷᠴᠤ ᠤᠴᠢᠷ ᠪᠦᠲᠦᠬᠡᠵᠦ ᠦᠭᠬᠦ ᠬᠡᠯᠪᠡᠷᠢ ᠮᠡᠬᠡᠯᠡᠯ ᠬᠡᠷᠡᠭ ᠲᠤ ᠬᠡᠷᠡᠭ ᠰᠡᠵᠢᠭᠳᠡᠨ ᠪᠡᠶᠡᠴᠢ ᠵᠤᠷᠢᠯᠭ᠎ᠠ ᠮᠠᠭᠠᠳᠯᠠᠬᠤ ᠳᠠᠭᠠᠨ ᠬᠡᠷᠡᠭᠳᠡᠨ ᠪᠤᠰᠣᠳ ᠵᠤᠭᠤᠰ ᠢ ᠠᠪᠬᠤ ᠦᠶᠡᠰ ᠠᠮᠠᠯᠠᠭᠰᠠᠨ ᠤᠴᠢᠷ ᠲᠠᠭᠠᠨ ᠪᠤᠳᠠᠳᠣ ᠴᠢᠷᠮᠠᠶᠢᠯᠭ᠎ᠠ ᠭᠠᠷᠭᠠᠭᠰᠠᠨ ᠡᠰᠡᠬᠦ ᠰᠠᠶᠢᠳᠣᠷ ᠬᠢᠨᠠᠨ ᠬᠠᠷᠭᠤᠭᠤᠯᠬᠤ ᠴᠢᠬᠤᠯᠠᠳᠠᠢ᠃ ᠵᠢᠱᠢᠶᠡᠯᠡᠪᠡᠯ᠂ ᠲᠡᠬᠡᠷᠡᠬᠢ ᠬᠤᠶᠠᠷ ᠬᠡᠷᠡᠭ ᠲᠤ ᠬᠤᠶᠠᠷ ᠬᠡᠷᠡᠭᠳᠡᠨ ᠠᠴᠠ ᠪᠤᠰᠣᠳ ᠲᠤ ᠬᠠᠪᠰᠣᠷᠴᠦ ᠵᠢᠯᠤᠭᠤᠴᠢ ᠦᠨᠡᠮᠯᠡᠯ ᠤᠯᠵᠦ ᠦᠭᠬᠦᠨ᠎ᠡ ᠬᠡᠵᠦ ᠵᠤᠭᠤᠰ ᠠᠪᠤᠭᠠᠳ ᠠᠳᠠᠭ ᠨᠢ ᠨᠡᠷ᠎ᠡ ᠨᠢ ᠴᠦ ᠮᠡᠳᠡᠬᠦᠯᠵᠦ ᠦᠭᠬᠦᠭᠰᠡᠨ ᠦᠬᠡᠢ᠂ ᠪᠦᠬᠦᠨ ᠢ ᠪᠦᠷᠢᠯᠬᠡᠵᠦ ᠦᠷᠡᠬᠡᠭᠰᠡᠨ ᠪᠠᠶᠢᠨ᠎ᠠ᠃
      ᠶᠠᠯ᠎ᠠ ᠪᠤᠰᠣᠳᠴᠢ ᠲᠠᠯ᠎ᠠ ᠬᠤᠪᠢ ᠳᠤ᠂ ᠡᠳᠡᠬᠡᠷ ᠬᠡᠷᠡᠭᠳᠡᠨ ᠴᠦᠮ ︽ᠵᠤᠭᠤᠰ ᠲᠤᠰᠢᠶᠠᠭᠰᠠᠭᠠᠷ ᠵᠢᠯᠤᠭᠤᠴᠢ ᠦᠨᠡᠮᠯᠡᠯ ᠢ ᠪᠠᠳᠣᠯᠠᠭ᠎ᠠ ᠲᠠᠢ ᠤᠯᠵᠦ ᠦᠭᠴᠦ ᠴᠢᠳᠠᠨ᠎ᠠ᠂ ᠪᠡᠶ᠎ᠡ ᠪᠠᠷ ᠰᠢᠯᠭᠠᠬᠤ ᠴᠢᠬᠤᠯᠠ ᠦᠬᠡᠢ᠂ ᠲᠦᠴᠢᠨ ᠲᠠᠪᠤᠨ ᠡᠳᠦᠷ ᠲᠤ ᠪᠠᠳᠣᠯᠠᠭ᠎ᠠ ᠲᠠᠢ ᠪᠠᠭᠤᠨ᠎ᠠ᠂ ᠪᠠᠭᠤᠵᠦ ᠢᠷᠡᠬᠦ ᠦᠬᠡᠢ ᠪᠤᠯ ᠵᠤᠭᠤᠰ ᠢ ᠴᠢᠨᠢ ᠪᠤᠴᠠᠭᠠᠨ᠎ᠠ︾ ᠬᠡᠬᠦ ᠮᠡᠳᠦ ᠬᠡᠶᠢᠰᠪᠦᠷᠢᠯᠡᠨ ᠵᠤᠬᠢᠶᠠᠭᠰᠠᠨ ᠵᠠᠷ ᠬᠤᠷᠳᠣᠨ ᠭᠠᠷ᠂ ᠸᠢᠴᠠᠲ ᠬᠤᠯᠪᠤᠭ᠎ᠠ᠂ ᠨᠠᠶᠢᠵᠠ ᠴᠤᠮᠤᠷᠯᠢᠭ  ᠲᠦᠬᠡᠬᠡᠵᠦ᠂ ᠪᠢᠴᠢᠭ ᠰᠤᠶᠤᠯ ᠦᠵᠡᠭᠰᠡᠨ ᠦᠬᠡᠢ᠂ ᠦᠵᠡᠵᠦ ᠰᠣᠨᠣᠰᠣᠭᠰᠠᠨ  ᠪᠠᠭ᠎ᠠ᠂ ᠠᠮᠠᠷᠬᠠᠨ ᠢᠳᠡᠮᠡᠬᠡᠳᠡᠢ ᠪᠠᠶᠢᠳᠠᠭ ᠦᠨᠳᠦᠰᠦᠨ ᠱᠠᠳᠣᠨ ᠠᠰᠪᠤᠷ ᠴᠠᠭᠠᠪᠤᠷ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠢ ᠬᠢᠯᠪᠠᠷᠬᠠᠨ  ᠲᠠᠨᠢᠯᠳᠠ ᠠᠳᠡᠬᠦᠷᠡᠯ ᠳᠤ ᠤᠷᠤᠭᠤᠯᠤᠨ ᠲᠡᠳᠡᠨ ᠵᠤᠭᠤᠰ ᠢ ᠮᠡᠬᠡᠯᠡᠵᠦ ᠠᠪᠳᠠᠭ᠃ ᠢᠯᠠᠩᠭᠤᠶ᠎ᠠ ᠵᠠᠷᠢᠮ ᠬᠡᠷᠡᠭᠳᠡᠨ ᠨᠢ ᠵᠤᠭᠤᠰ ᠵᠠᠷᠤᠴᠠᠭᠤᠯᠵᠦ ᠪᠠᠶᠢᠭᠠᠳ ᠰᠦᠯᠵᠢᠶᠡᠨ ᠲᠡᠭᠡᠷ᠎ᠡ ᠮᠡᠷᠭᠡᠵᠢᠯ ᠠᠷᠭ᠎ᠠ ᠪᠠᠷ ᠬᠠᠭᠤᠷᠮᠠᠭ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠵᠤᠬᠢᠶᠠᠵᠦ᠂ ᠸᠢᠴᠠᠲ ᠬᠤᠯᠪᠤᠭᠠᠨ ᠳᠤ ᠵᠢᠷᠤᠭ ᠢ ᠨᠢ ᠲᠦᠬᠡᠬᠡᠳ᠂ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠴᠢᠨᠢ ᠪᠠᠭᠤᠭᠠᠳ ᠢᠷᠡᠴᠢᠭᠡᠵᠡᠢ ᠬᠡᠵᠦ ᠪᠤᠰᠣᠳ ᠢ ᠬᠠᠭᠤᠷᠤᠨ ᠠᠷᠭᠠᠯᠠᠬᠤ ᠪᠤᠶᠤ ᠵᠤᠭᠤᠰ ᠨᠡᠮᠡᠵᠦ ᠠᠪᠳᠠᠭ᠃
        ᠮᠡᠬᠡᠯᠡᠭᠴᠢᠳ ᠬᠤᠪᠢ ᠳᠤ᠂ ᠲᠤᠰ ᠬᠡᠳᠦᠨ ᠬᠡᠷᠡᠭ ᠬᠤᠤᠷ ᠠᠮᠰᠠᠭᠴᠢᠳ ᠨᠢ ᠴᠦᠮ ᠬᠦᠳᠡᠭᠡ ᠲᠤᠰᠬᠤᠨ ᠦᠨᠳᠦᠰᠦᠨ ᠱᠠᠳᠤᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠪᠠᠶᠢᠪᠠ᠃
       ︽ᠵᠠᠮ ᠬᠠᠷᠢᠯᠴᠠᠭᠠᠨ ᠠᠮᠤᠷ ᠲᠦᠪᠰᠢᠨ ᠬᠠᠤᠯᠢ︾ ᠠᠷᠪᠠ ᠶᠢᠰᠦᠳᠦᠬᠡᠷ ᠵᠤᠷᠪᠤᠰ ᠲᠤᠭᠳᠠᠭᠠᠯ ᠢ ᠦᠨᠳᠦᠰᠦᠯᠡᠪᠡᠯ᠂ ︽ᠮᠠᠰᠢᠨ ᠲᠡᠷᠬᠡ ᠵᠢᠯᠤᠭᠤᠳᠬᠤ ᠤᠷᠢᠳᠠᠯ ᠨᠢ ᠬᠠᠤᠯᠢ ᠶᠤᠰᠣᠭᠠᠷ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠡᠷᠡᠮᠡᠯᠵᠡᠨ ᠠᠪᠤᠭᠰᠠᠨ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠡᠷᠡᠮᠡᠯᠵᠡᠬᠦ ᠳᠤ ᠵᠠᠪᠠᠯ ᠲᠦᠷᠦ ᠶᠠᠪᠤᠳᠠᠯ ᠬᠤᠷᠢᠶ᠎ᠠ ᠲᠤᠳᠣᠭᠠᠳᠣ ᠬᠠᠮᠠᠭᠠᠯᠠᠬᠤ ᠬᠡᠯᠳᠡᠰ ᠠᠴᠠ ᠲᠤᠭᠳᠠᠭᠠᠭᠰᠠᠨ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠵᠦᠪᠰᠢᠶᠡᠷᠡᠯ ᠨᠦᠬᠦᠴᠡᠯ ᠢ ᠬᠠᠩᠭᠠᠭᠰᠠᠨ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠰᠢᠯᠭᠠᠭᠠᠳ ᠬᠢᠷᠢ ᠲᠡᠩᠴᠡᠪᠡᠯ᠂ ᠲᠤᠳᠣᠭᠠᠳᠣ ᠬᠠᠮᠠᠭᠠᠯᠠᠬᠤ ᠪᠠᠶᠢᠭᠤᠯᠭ᠎ᠠ ᠵᠠᠮ ᠬᠠᠷᠢᠯᠴᠠᠭᠠᠨ ᠬᠠᠮᠢᠶᠠᠷᠤᠯᠳᠠ ᠬᠡᠯᠳᠡᠰ ᠠᠴᠠ ᠬᠠᠷᠠᠭᠠᠯᠵᠠᠭᠰᠠᠨ ᠮᠠᠰᠢᠨ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠢ ᠪᠠᠭᠤᠯᠭᠠᠳᠠᠭ︾ ᠬᠡᠵᠡᠢ᠃ ᠶᠠᠮᠠᠷ ᠨᠢᠬᠡᠨ ᠬᠤᠪᠢ ᠬᠦᠮᠦᠨ ᠪᠤᠶᠤ ᠪᠠᠶᠢᠭᠤᠯᠭ᠎ᠠ ᠨᠢᠬᠡᠴᠢ ᠬᠦᠷᠢᠮᠳᠡᠵᠦ ᠲᠤᠮᠳᠠ ᠠᠴᠠ ᠨᠢ ᠠᠰᠢᠭ ᠭᠤᠷᠢᠯᠠᠬᠤ ᠨᠢ ᠬᠠᠤᠯᠢ ᠳᠤ ᠬᠠᠷᠰᠢ ᠲᠠᠢ ᠬᠢᠳᠡᠯ ᠪᠤᠯᠬᠤᠷ ᠵᠠᠪᠠᠯ ᠴᠢᠩᠭ᠎ᠠ ᠪᠠᠷ ᠵᠠᠯᠬᠠᠭᠠᠨ ᠴᠡᠬᠡᠷᠯᠡᠬᠦᠯᠪᠡᠯ ᠵᠤᠬᠢᠨ᠎ᠠ᠃
       ᠤᠷᠴᠢᠮ ᠬᠡᠳᠦᠨ ᠵᠢᠯ ᠠᠷᠤ ᠡᠬᠦᠳᠡ ᠬᠦᠬᠡᠬᠡᠵᠦ᠂ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠬᠠᠪᠰᠣᠷᠴᠤ ᠤᠯᠵᠦ ᠦᠭᠬᠦ ᠨᠡᠷ᠎ᠡ ᠪᠠᠷ ᠪᠤᠰᠣᠳ ᠢ ᠮᠡᠬᠡᠯᠡᠭᠰᠡᠨ ᠶᠠᠯᠠᠳᠣ ᠬᠡᠷᠡᠭ ᠪᠠᠶᠢᠨ ᠲᠠᠬᠢᠨ ᠡᠬᠦᠰᠴᠦ᠂ ᠠᠷᠠᠳ ᠲᠦᠮᠡᠨ ᠠᠮᠢ ᠠᠮᠢᠵᠢᠷᠠᠯ ᠳᠤ ᠶᠡᠬᠡᠬᠡᠨ ᠬᠤᠬᠢᠷᠠᠯ ᠠᠪᠴᠢᠷᠠᠵᠦ ᠪᠤᠢ᠃ ᠢᠯᠠᠩᠭᠤᠶ᠎ᠠ ᠮᠠᠯᠵᠢᠬᠤ ᠤᠷᠤᠨ  ᠡᠨᠡ ᠪᠠᠶᠢᠳᠠᠯ ᠨᠡᠩ ᠬᠦᠨᠳᠦ ᠪᠠᠶᠢᠵᠦ᠂ ᠬᠡᠷᠡᠭᠳᠡᠨ ᠠᠴᠠ ᠮᠠᠯᠴᠢᠨ ᠲᠦᠮᠡᠨ ᠰᠤᠶᠤᠯ ᠮᠡᠳᠡᠯᠬᠡ ᠲᠤᠤᠷ᠎ᠠ᠂ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠨᠢᠬᠡᠳᠦᠬᠡᠷ ᠲᠦᠷᠦᠯ᠂ ᠲᠦᠷᠪᠡᠳᠦᠬᠡᠷ ᠲᠦᠷᠦᠯ ᠰᠣᠶᠣᠯ ᠰᠢᠯᠭᠠᠯᠳᠠ ᠳᠤ ᠪᠡᠷᠬᠡᠳᠡᠳᠡᠭ ᠲᠤᠯᠢᠮᠠᠭ ᠲᠠᠯ᠎ᠠ ᠬᠢᠷᠠᠬᠠᠢ ᠪᠠᠷ ᠲᠠᠯᠢᠮᠳᠠᠨ᠂ ᠠᠷᠤ ᠡᠬᠦᠳᠡ ᠬᠦᠬᠡᠬᠡᠵᠦ ᠠᠳᠬᠤᠨ ᠳᠤ ᠨᠢ ᠵᠤᠭᠤᠰ ᠠᠳᠬᠤᠭᠤᠯᠴᠢᠬᠠᠪᠠᠯ ᠠᠮᠠᠷᠬᠠᠨ ᠰᠠᠭᠤᠵᠦ ᠪᠠᠶᠢᠳᠠᠯ᠎ᠠ ᠠᠶ᠎ᠠ ᠪᠠᠷ ᠪᠠᠭᠤᠭᠠᠳ ᠢᠷᠡᠴᠢᠬᠡᠬᠦ ᠮᠡᠳᠦ ᠬᠤᠳᠠᠯ ᠦᠬᠡ ᠪᠠᠷ ᠲᠡᠳᠡᠨ ᠨᠢᠳᠦ ᠪᠦᠭᠯᠡᠨ ᠴᠢᠬᠢ ᠨᠢ ᠬᠠᠭᠤᠷᠤᠨ ᠪᠠᠶᠢᠵᠦ ᠵᠤᠭᠤᠰ ᠮᠦᠩᠬᠦ ᠨᠢ ᠬᠢᠯᠪᠠᠷᠬᠠᠨ  ᠮᠡᠬᠡᠯᠡᠨ ᠠᠪᠴᠦ ᠪᠠᠶᠢᠨ᠎ᠠ᠃ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠪᠤᠯ ᠮᠠᠰᠢᠨ ᠪᠠᠷᠢᠬᠤ ᠵᠦᠪᠰᠢᠶᠡᠷᠡᠯ ᠲᠡᠮᠳᠡᠭ ᠮᠦᠨ᠂ ᠬᠠᠷᠢᠨ ᠵᠠᠬ᠎ᠠ ᠳᠤ ᠬᠤᠳᠠᠯᠳᠣᠳᠠᠭ ᠶᠠᠮᠠᠷ ᠨᠢᠬᠡᠨ ᠪᠠᠷᠠᠭ᠎ᠠ ᠪᠢᠰᠢ᠃ ᠵᠢᠯᠣᠭᠣᠴᠢ ᠵᠢᠨ ᠦᠨᠡᠮᠯᠡᠯ ᠢ ᠬᠤᠳᠠᠯᠳᠣᠨ ᠠᠪᠬᠤ ᠤᠷᠤᠯᠳᠣᠬᠤ ᠨᠢ ᠦᠨᠡᠨ ᠳᠡᠭᠡᠨ ᠪᠤᠳᠠ ᠪᠡᠶ᠎ᠡ ᠪᠠᠷ ᠬᠠᠤᠯᠢ ᠳᠤ ᠬᠠᠷᠰᠢ ᠲᠠᠢ ᠬᠢᠳᠡᠯ ᠪᠠᠶᠢᠵᠦ᠂ ᠬᠠᠤᠯᠢ ᠪᠤᠰᠣ ᠡᠳᠡᠬᠡᠳ ᠬᠡᠮᠳᠦ ᠦᠢᠯᠡ ᠲᠠᠮ  ᠲᠡᠮᠵᠢᠭᠰᠡᠨ ᠤᠴᠢᠷ ᠪᠤᠯᠵᠦ ᠴᠤ ᠪᠠᠶᠢᠭ᠎ᠠ ᠶᠤᠮ᠃ ᠡᠶᠢᠮᠦ ᠠᠴᠠ ᠡᠶᠢᠮᠦᠷᠬᠦ ᠲᠦᠷᠦᠯ ᠮᠡᠬᠡᠯᠡᠭᠰᠡᠨ ᠬᠡᠷᠡᠭ ᠢ ᠡᠷᠳᠡ ᠠᠴᠠ ᠬᠤᠷᠢᠭᠯᠠᠨ ᠵᠤᠭᠰᠣᠭᠠᠶ᠎ᠠ ᠬᠡᠪᠡᠯ᠂ ᠬᠠᠮᠢᠶ᠎ᠠ ᠪᠦᠬᠦᠢ ᠪᠠᠶᠢᠭᠤᠯᠭ᠎ᠠ ᠨᠢᠭᠡᠴᠢ ᠬᠢᠨ ᠲᠤᠤᠷ ᠰᠦᠯᠵᠢᠶ᠎ᠡ ᠬᠠᠮᠢᠶᠠᠷᠤᠯᠳᠠ ᠪᠤᠶᠤ ᠪᠤᠰᠣᠳ ᠲᠠᠯ᠎ᠠ ᠬᠠᠮᠢᠶᠠᠷᠤᠯᠳᠠ ᠪᠠᠨ ᠴᠢᠩᠭᠠᠷᠠᠭᠤᠯᠬᠤ ᠲᠠᠭᠠᠤ ᠳᠤ ᠬᠠᠤᠯᠢ ᠰᠤᠷᠳᠠᠯᠴᠢᠯᠠᠭ᠎ᠠ ᠰᠠᠶᠢᠳᠣᠷ ᠦᠷᠨᠢᠬᠦᠯᠵᠦ ᠠᠷᠠᠳ ᠢᠷᠬᠡᠳ ᠬᠠᠤᠯᠢ ᠤᠬᠠᠮᠰᠠᠷ ᠢ ᠲᠡᠭᠡᠭᠰᠢᠯᠡᠬᠦᠯᠬᠦ ᠳᠤ ᠠᠩᠬᠠᠷᠤᠯ ᠲᠠᠯᠪᠢᠬᠤ ᠴᠢᠬᠤᠯᠠᠳᠠᠢ᠃ ᠨᠦᠬᠦᠬᠡ ᠲᠠᠯ᠎ᠠ ᠪᠠᠷ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠠᠷᠤ ᠡᠬᠦᠳᠡ ᠬᠦᠶᠦᠵᠦ ᠬᠠᠷᠢᠴᠠᠭ᠎ᠠ ᠰᠦᠯᠪᠡᠭᠡ ᠲᠠᠳᠠᠪᠠᠯ ᠡᠰᠡ ᠪᠦᠲᠦᠵᠦ ᠪᠡᠶᠡᠯᠡᠬᠦ ᠣᠴᠢᠷ ᠦᠬᠡᠢ ᠬᠡᠮᠡᠬᠦ ᠬᠠᠭᠤᠴᠢᠷᠠᠭᠰᠠᠨ ᠦᠵᠡᠯ ᠲᠠᠨᠢᠯᠳᠠ ᠪᠠᠨ ᠵᠠᠰᠠᠨ ᠰᠢᠨᠡᠳᠬᠡᠨ᠂ ᠬᠠᠤᠯᠢ ᠤᠬᠠᠮᠰᠠᠷ  ᠠᠰᠠᠭᠤᠳᠠᠯ ᠳᠤ ᠬᠠᠨᠳᠣᠵᠦ ᠰᠣᠷᠬᠤ ᠬᠡᠷᠡᠭᠳᠡᠢ᠃ ᠪᠤᠰᠣᠳ ᠦᠬᠡ ᠠᠮᠠᠷᠬᠠᠨ ᠢᠳᠡᠬᠡᠬᠦ ᠠᠴᠠ ᠪᠠᠨ ᠢᠯᠡᠬᠦᠦ ᠳᠡᠭᠡᠨ ᠬᠢᠵᠦ ᠵᠤᠷᠢᠵᠦ ᠪᠠᠶᠢᠭ᠎ᠠ ᠵᠦᠢᠯ ᠨᠢ ᠬᠠᠤᠯᠢ ᠴᠠᠭᠠᠵᠠ᠂ ᠶᠤᠰᠣ ᠰᠣᠷᠳᠠᠬᠤᠨ ᠳᠤ ᠬᠠᠷᠰᠢ ᠲᠠᠢ ᠡᠰᠡᠬᠦ ᠤᠶᠤᠨ ᠲᠠᠷᠢᠬᠢᠨ ᠳᠠᠭᠠᠨ ᠢᠯᠡᠬᠦᠬᠡᠨ ᠲᠤᠩᠭᠠᠵᠦ ᠪᠤᠳᠣᠭᠰᠠᠨ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃ ᠦᠪᠡᠷ ᠦᠨᠡᠨᠴᠢ ᠬᠦᠳᠡᠯᠮᠦᠷᠢ᠂ ᠤᠢ ᠤᠬᠠᠭᠠᠨ  ᠤᠯᠵᠦ ᠠᠪᠴᠢᠷᠠᠭᠰᠠᠨ ᠵᠦᠢᠯ ᠪᠤᠯ ᠰᠠᠶ᠋ᠢ ᠦᠪᠡᠷ ᠶᠠᠭᠤᠮ᠎ᠠ ᠪᠤᠯᠵᠦ ᠰᠢᠩᠬᠡᠵᠦ ᠴᠢᠳᠠᠨ᠎ᠠ ᠬᠡᠰᠡᠨ ᠵᠦᠪ ᠦᠷᠳᠡᠭ ᠦᠵᠡᠯᠳᠡ᠂ ᠠᠮᠢᠳᠣᠷᠠᠬᠤᠢ ᠦᠵᠡᠯᠳᠡ ᠲᠠᠢ ᠪᠤᠯᠵᠦ ᠠᠮᠢᠳᠣᠷᠠᠬᠤ ᠬᠡᠷᠡᠭᠳᠡᠢ ᠬᠡᠳᠡᠭ ᠢ ᠲᠠᠨᠢᠵᠦ ᠤᠯᠤᠭᠰᠠᠨ ᠪᠠᠶᠢᠬᠤ ᠬᠡᠷᠡᠭᠳᠡᠢ᠃
    
               
              

ᠵᠣᠬᠢᠶᠠᠭᠴᠢ : ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠠᠷᠠᠳ ᠪᠠᠶᠢᠴᠠᠭᠠᠬᠤ ᠬᠤᠷᠢᠶ᠎ᠠ