ᠬᠦᠳᠡᠭᠡ ᠲᠤᠰᠬᠤᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠲᠤᠮᠳᠠ ᠲᠡᠯᠬᠡᠷᠡᠵᠦ ᠪᠤᠢ ᠮᠡᠬᠡᠯᠡᠯ ᠬᠡᠷᠡᠭ ᠢ ᠲᠦᠬᠦᠮ ᠵᠠᠳᠠᠯᠬᠤ ᠨᠢ
2024-03-01 14:24:09
ᠤᠶᠢᠷᠠ ᠵᠢᠯ ᠳᠤ᠂ ᠨᠡᠶᠢᠬᠡᠮ ᠠᠵᠤ ᠠᠬᠤᠢ ᠬᠦᠭᠵᠢᠯᠳᠡ᠂ ᠮᠡᠳᠡᠭᠡ ᠵᠠᠩᠬᠢ ᠲᠤᠤᠷ ᠰᠦᠯᠵᠢᠶᠡᠨ ᠲᠡᠬᠦᠯᠳᠡᠷᠵᠢᠯᠳᠡ ᠲᠠᠭᠠᠯᠳᠣᠨ ᠬᠦᠳᠡᠭᠡ ᠲᠤᠰᠬᠤᠨ ᠮᠠᠯᠵᠢᠬᠤ ᠤᠷᠤᠨ ᠡᠯᠳᠡᠪ ᠬᠠᠴᠢᠨ ᠮᠡᠬᠡᠯᠡᠯ ᠬᠡᠷᠡᠭ ᠶᠡᠭᠡᠪᠡᠷ ᠲᠡᠯᠬᠡᠷᠡᠵᠦ᠂ ᠠᠷᠠᠳ ᠢᠷᠭᠡᠳ ᠡᠳ᠋ ᠬᠦᠷᠦᠩᠬᠡ ᠠᠮᠤᠷ ᠲᠦᠪᠰᠢᠨ ᠳᠤ ᠬᠦᠨᠳᠦ ᠶᠡᠭᠡ ᠬᠤᠬᠢᠷᠠᠯ ᠰᠦᠢᠳᠦᠯ ᠠᠪᠴᠢᠷᠠᠵᠦ ᠪᠠᠶᠢᠨᠠ᠃ ᠠᠳᠡ ᠤᠷᠴᠢᠮ ᠬᠡᠳᠦᠨ ᠵᠢᠯ ᠠᠷᠤ ᠬᠤᠷᠴᠢᠨ ᠬᠤᠰᠢᠭᠤᠨ ᠬᠦᠳᠡᠭᠡ ᠲᠤᠰᠬᠤᠨ ᠮᠠᠯᠵᠢᠬᠤ ᠤᠷᠤᠨ ᠡᠬᠦᠰᠦᠭᠰᠡᠨ ᠮᠡᠬᠡᠯᠡᠯ ᠬᠡᠷᠡᠭ ᠨᠦᠭᠦᠳ ᠢ ᠮᠡᠬᠡᠯᠡᠭᠰᠡᠨ ᠠᠷᠭᠠ ᠪᠠᠷᠢᠯ ᠨᠢ ᠨᠠᠷᠢᠰᠬᠠᠨ ᠲᠦᠷᠦᠯᠵᠢᠬᠦᠯᠵᠦ᠂ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠲᠠᠭᠠᠨ ᠮᠡᠬᠡᠯᠡᠯ ᠬᠡᠷᠡᠭ ᠲᠤᠬᠠᠢ ᠲᠦᠬᠦᠮ ᠠᠪᠰᠠᠷᠬᠠᠨ ᠲᠠᠶᠢᠯᠪᠤᠷᠢ ᠪᠤᠯᠭᠠᠶᠠ᠃
ᠨᠢᠬᠡ᠂ ᠰᠢᠨᠡ ᠮᠠᠶ᠋ᠢᠭ ᠮᠡᠬᠡᠯᠡᠯ
︵ᠨᠢᠬᠡ︶ ᠴᠠᠬᠢᠯᠭᠠᠨ ᠬᠤᠯᠪᠤᠭᠠᠨ ᠮᠡᠬᠡᠯᠡᠯ ᠪᠤᠯ ᠥᠢᠷᠠ ᠬᠡᠳᠦᠨ ᠵᠢᠯ ᠲᠤᠤᠷ ᠰᠦᠯᠵᠢᠶᠡ ᠮᠡᠳᠡᠭᠡ ᠵᠠᠩᠬᠢ ᠬᠦᠭᠵᠢᠯᠳᠡ ᠲᠠᠭᠠᠯᠳᠣᠨ ᠶᠡᠬᠡᠪᠡᠷ ᠲᠡᠪᠡᠷᠡᠨ ᠲᠡᠯᠬᠡᠷᠡᠵᠦ ᠪᠤᠢ ᠰᠢᠨᠡ ᠬᠡᠯᠪᠡᠷᠢ ᠮᠡᠬᠡᠯᠡᠯ ᠶᠠᠯᠠᠳᠣ ᠠᠵᠢᠯᠯᠠᠭᠠ ᠪᠤᠯᠬᠤ ᠶᠤᠮ᠃ ᠠᠳᠡ ᠶᠠᠷᠢᠵᠦ ᠪᠠᠶᠢᠭᠠ ᠴᠠᠬᠢᠯᠭᠠᠨ ᠬᠤᠯᠪᠤᠭᠠ ᠪᠠᠷ ᠮᠡᠬᠡᠯᠡᠬᠦ ᠬᠡᠳᠡᠭ ᠨᠢ ᠬᠤᠬᠢᠷᠠᠯ ᠠᠮᠰᠠᠭᠴᠢ ᠲᠠᠢ ᠲᠠᠮ ᠬᠠᠷᠢᠯᠴᠠᠬᠤ ᠬᠡᠯᠪᠡᠷᠢ ᠪᠠᠷ ᠤᠳᠠᠰᠣ᠂ ᠰᠦᠯᠵᠢᠶᠡ ᠪᠤᠶᠤ ᠤᠬᠤᠷ ᠴᠢᠮᠡᠬᠡᠨ ᠠᠷᠭᠠ ᠮᠠᠶ᠋ᠢᠭ ᠠᠰᠢᠭᠯᠠᠨ ᠬᠤᠳᠠᠯ ᠬᠠᠭᠤᠷᠮᠠᠭ ᠮᠡᠳᠡᠭᠡ ᠵᠠᠩᠬᠢ ᠵᠤᠬᠢᠶᠠᠵᠦ᠂ ᠬᠤᠬᠢᠷᠠᠯ ᠠᠮᠰᠠᠭᠴᠢ ᠤᠨᠠᠭᠤᠯᠢ ᠳᠤ ᠤᠨᠠᠭᠠᠭᠠᠳ᠂ ᠲᠡᠳᠡᠨ ᠢ ᠦᠳᠦᠬᠡᠨ ᠬᠠᠭᠤᠷᠴᠤ ᠵᠤᠭᠤᠰ ᠰᠢᠯᠵᠢᠬᠦᠯᠬᠦ ᠪᠤᠶᠤ ᠲᠠᠩᠰᠠ ᠰᠢᠯᠵᠢᠬᠦᠯᠬᠦ ᠶᠠᠯᠠᠳᠣ ᠠᠵᠢᠯᠯᠠᠭᠠ ᠵᠢᠭᠠᠵᠦ ᠪᠤᠢ᠃ ᠡᠶᠢᠮᠦᠷᠬᠦ ᠲᠦᠷᠦᠯ ᠮᠡᠬᠡᠯᠡᠯ ᠬᠡᠷᠡᠭ ᠨᠢ ᠶᠠᠯᠠ ᠬᠢᠬᠦ ᠠᠷᠭᠠ ᠬᠡᠯᠪᠡᠷᠢ ᠬᠤᠪᠢ ᠳᠤ ᠮᠡᠳᠡᠭᠡ ᠵᠠᠩᠬᠢᠵᠢᠭᠰᠠᠨ᠂ ᠪᠦᠯᠦᠭᠯᠡᠨ ᠶᠠᠯᠠ ᠬᠢᠬᠦ ᠪᠠᠷ ᠭᠤᠤᠯ ᠬᠡᠯᠪᠡᠷᠢ ᠪᠤᠯᠭᠠᠭᠰᠠᠨ᠂ ᠬᠠᠮᠤᠷᠤᠭᠰᠠᠨ ᠬᠦᠷᠢᠶᠡ ᠬᠡᠪᠴᠢᠶᠡ ᠪᠠᠷ ᠶᠡᠭᠡ᠂ ᠪᠤᠵᠠᠷ ᠵᠤᠭᠤᠰ ᠬᠦᠢᠯᠬᠡᠬᠡ ᠨᠢ ᠬᠤᠷᠳᠣᠨ᠂ ᠨᠡᠶᠢᠬᠡᠮ ᠬᠤᠤᠷ ᠬᠦᠨᠦᠬᠡᠯᠳᠦ ᠴᠢᠨᠠᠷ ᠲᠤᠶᠢᠯ ᠶᠡᠭᠡ᠂ ᠲᠤᠷᠰᠢᠨ ᠪᠠᠶᠢᠴᠠᠭᠠᠵᠦ ᠬᠡᠷᠡᠴᠢ ᠴᠤᠭᠯᠠᠭᠤᠯᠬᠤ ᠳᠤ ᠲᠤᠶᠢᠯ ᠲᠦᠪᠡᠭᠳᠡᠢ ᠪᠠᠶᠢᠳᠠᠭ ᠤᠨᠴᠠᠯᠢᠭ ᠲᠠᠢ᠃ ᠡᠶᠢᠮᠦ ᠠᠴᠠ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠴᠠᠭ ᠢᠮᠠᠭᠳᠠ ᠰᠤᠨᠤᠷ ᠰᠡᠷᠡᠮᠵᠢ ᠪᠠᠨ ᠴᠢᠩᠭᠠᠷᠠᠭᠤᠯᠤᠨ᠂ ᠡᠶᠢᠮᠦᠷᠬᠦ ᠲᠦᠷᠦᠯ ᠮᠡᠬᠡᠯᠡᠯ ᠳᠤ ᠦᠷᠳᠦᠬᠦ ᠴᠢᠩᠭᠠ ᠬᠢᠴᠢᠶᠡᠵᠦ᠂᠂ ᠦᠪᠡᠷ ᠡᠳ᠋ ᠬᠦᠷᠦᠩᠬᠡ ᠡᠷᠬᠡ ᠠᠰᠢᠭ ᠰᠠᠶᠢᠳᠣᠷ ᠬᠠᠮᠠᠭᠠᠯᠠᠵᠦ ᠰᠤᠷᠬᠤ ᠬᠡᠷᠡᠭᠳᠡᠢ᠃
︵ᠬᠤᠶᠠᠷ︶ ᠲᠤᠤᠷ ᠰᠦᠯᠵᠢᠶᠡ ᠪᠠᠷ ᠢᠨᠠᠭᠯᠠᠵᠦ ᠵᠤᠭᠤᠰ ᠵᠠᠪᠰᠢᠬᠤ ᠬᠡᠯᠪᠡᠷᠢ ᠮᠡᠬᠡᠯᠡᠯ
ᠶᠠᠭᠤᠮᠠ ᠪᠦᠬᠦᠨ ᠬᠤᠶᠠᠷ ᠲᠠᠯᠠ ᠲᠠᠢ ᠪᠠᠶᠢᠳᠠᠭ᠃ ᠮᠡᠳᠡᠭᠡ ᠵᠠᠩᠬᠢ ᠲᠤᠤᠷ ᠰᠦᠯᠵᠢᠶᠡᠨ ᠲᠡᠬᠦᠯᠳᠡᠷᠵᠢᠯᠳᠡ ᠨᠢ ᠬᠦᠮᠦᠰ ᠬᠠᠷᠢᠯᠴᠠᠭᠠ ᠬᠤᠯᠪᠤᠭᠠᠨ ᠳᠤ ᠶᠡᠬᠡᠬᠡᠨ ᠲᠦᠬᠦᠮ ᠦᠵᠡᠬᠦᠯᠦᠭᠰᠡᠨ ᠪᠤᠯᠪᠠᠴᠤ ᠨᠦᠬᠦᠬᠡ ᠲᠠᠯᠠ ᠪᠠᠷ ᠵᠠᠷᠢᠮ ᠰᠦᠷᠬᠦ ᠦᠢᠯᠡᠳᠦᠯ ᠠᠪᠴᠢᠷᠠᠭᠰᠠᠨ ᠢ ᠴᠦ ᠪᠢᠳᠡ ᠬᠦᠯᠢᠶᠡᠨ ᠵᠦᠪᠰᠢᠶᠡᠷᠡᠬᠦ ᠬᠡᠷᠡᠭᠳᠡᠢ ᠶᠤᠮ᠃ ᠦᠨᠦᠳᠦᠷ ᠨᠢᠬᠡ ᠪᠦᠯᠦᠭ ᠬᠦᠮᠦᠰ ᠲᠤᠤᠷ ᠰᠦᠯᠵᠢᠶᠡ ᠪᠤᠷᠤᠭᠤ ᠪᠠᠷ ᠠᠰᠢᠭᠯᠠᠨ ᠶᠤᠰᠣᠳᠠᠢ ︽ᠪᠤᠷᠤᠭᠤ ᠵᠠᠮ ᠪᠤᠳᠠᠭᠠ ᠲᠡᠭᠡᠭᠡᠪᠡᠯ ᠪᠤᠴᠠᠬᠤ ᠵᠠᠮ ᠳᠠᠭᠠᠨ ᠰᠢᠷᠤᠢ ᠲᠡᠭᠡᠭᠡᠭᠰᠡᠨ︾ ᠤᠴᠢᠷ ᠪᠤᠯᠵᠦ ᠪᠤᠢ᠃ ᠲᠡᠳᠡ ᠲᠤᠤᠷ ᠰᠦᠯᠵᠢᠶᠡᠨ ᠲᠦᠬᠦᠮ ᠢ ᠠᠰᠢᠭᠯᠠᠨ ᠤᠯᠠᠨ ᠤᠨᠳᠣᠣ ᠬᠦᠢᠰᠦᠳᠡᠨ ᠲᠠᠢ ᠵᠡᠷᠬᠡ ᠪᠠᠷ ᠢᠨᠠᠭ ᠠᠮᠠᠷᠠᠭ ᠬᠠᠷᠢᠴᠠᠭᠠ ᠲᠤᠭᠳᠠᠭᠠᠨ ᠡᠬᠦᠨ ᠤᠯᠠᠮ ᠲᠡᠳᠡᠨ ᠵᠤᠭᠤᠰ ᠢ ᠮᠡᠬᠡᠯᠡᠨ ᠠᠪᠴᠣ ᠪᠦᠷᠢᠯᠬᠡᠵᠦ ᠪᠠᠶᠢᠨᠠ᠃ ᠵᠠᠷᠢᠮ ᠨᠢ ᠤᠯᠠᠭᠠᠨ ᠨᠢᠭᠤᠷ ᠤᠴᠠᠷᠠᠭᠠ ᠴᠤ ᠦᠬᠡᠢ ᠪᠠᠶᠢᠭᠠᠳ ᠡᠯᠳᠡᠪ ᠤᠯᠠᠨ ᠠᠷᠭᠠ ᠮᠡᠭᠡ ᠬᠡᠷᠡᠭᠯᠡᠵᠦ ᠪᠠᠶᠢᠭᠠᠳ ᠲᠤᠤᠷ ᠰᠦᠯᠵᠢᠶᠡ ᠪᠠᠷ ᠨᠦᠬᠦᠬᠡ ᠡᠳᠡᠬᠡᠳ ᠠᠴᠠ ᠪᠠᠨ ᠵᠤᠭᠤᠰ ᠲᠤᠶ᠋ᠢᠵᠦ ᠠᠪᠴᠢᠬᠠᠭᠰᠠᠨ ᠵᠠᠶᠢᠯᠠᠵᠦ ᠲᠤᠳᠠᠭᠠᠵᠦ ᠪᠠᠶᠢᠳᠠᠭ᠃ ᠲᠤᠤᠷ ᠰᠦᠯᠵᠢᠶᠡ ᠨᠢ ᠨᠢᠬᠡ ᠪᠦᠯᠦᠭ ᠬᠠᠤᠯᠢ ᠪᠤᠰᠣ ᠡᠳᠡᠬᠡᠳ ᠲᠤ ᠮᠠᠭᠤ ᠬᠡᠷᠡᠭ ᠦᠢᠯᠡᠳᠦᠭᠰᠡᠨ ᠴᠤ ᠮᠦᠷᠳᠡᠵᠦ ᠤᠯᠳᠠᠭ ᠦᠬᠡᠢ ᠪᠡᠶᠡ ᠲᠠᠯᠳᠠᠯᠠᠨ ᠤᠷᠤᠩᠨᠠᠬᠤ ᠲᠣᠬᠢᠳᠠᠢ ᠤᠷᠤᠨ ᠰᠢᠭ᠋ ᠬᠠᠷᠠᠭᠳᠠᠭᠰᠠᠨ ᠴᠤ ᠲᠤᠤᠷ ᠰᠦᠯᠵᠢᠶᠡ ᠨᠢ ᠬᠠᠤᠯᠢ ᠭᠠᠳᠠᠭᠤᠷ ᠪᠠᠶᠢᠭᠠ ᠬᠦᠨᠳᠡᠢ ᠤᠷᠤᠨ ᠵᠠᠢ ᠤᠭᠳᠣ ᠪᠢᠰᠢ ᠶᠤᠮ᠃ ᠮᠤᠩᠭᠤᠯ ᠠᠷᠠᠳ ᠦᠬᠡᠨ ᠳᠤ ︽ᠨᠢᠭᠤᠪᠠᠴᠣ ᠨᠢᠷᠤᠭᠤ ᠨᠢ ᠢᠯᠡ᠂ ᠲᠠᠯᠳᠠᠯᠠᠪᠠᠴᠤ ᠲᠠᠯᠠ ᠨᠢ ᠢᠯᠡ︾ ᠬᠡᠳᠡᠭᠴᠢᠯᠡᠨ ᠲᠤᠤᠷ ᠰᠦᠯᠵᠢᠶᠡ ᠪᠠᠷ ᠦᠢᠯᠡᠳᠦᠭᠰᠡᠨ ᠪᠦᠬᠦ ᠦᠢᠯᠡ ᠤᠷᠤᠮ ᠮᠦᠷ ᠨᠢ ᠲᠤᠳᠣ ᠠᠴᠠ ᠲᠤᠳᠣ ᠦᠯᠡᠳᠡᠳᠡᠭ ᠪᠤᠯᠬᠤᠷ ᠬᠠᠤᠯᠢ ᠰᠠᠪᠠᠷ ᠠᠴᠠ ᠮᠤᠯᠳᠣᠷᠠᠨᠠ ᠭᠡᠭᠴᠢ ᠦᠨᠡᠬᠡᠷ ᠪᠦᠲᠦᠰᠢ ᠦᠬᠡᠢ ᠤᠴᠢᠷ ᠶᠤᠮ᠃ ᠡᠶᠢᠮᠦ ᠠᠴᠠ ᠦᠷᠬᠡᠨ ᠤᠯᠠᠨ ᠰᠦᠯᠵᠢᠶᠡᠨ ᠠᠰᠢᠭᠯᠠᠭᠴᠢᠳ ᠲᠤᠤᠷ ᠰᠦᠯᠵᠢᠶᠡ ᠵᠦᠪ ᠠᠰᠢᠭᠯᠠᠵᠦ ᠠᠮᠢᠳᠣᠷᠠᠯ ᠦᠢᠯᠡᠰ ᠲᠡᠭᠡᠨ ᠵᠦᠪ ᠦᠢᠯᠡᠴᠢᠯᠡᠬᠦᠯᠵᠦ ᠰᠤᠷᠬᠤ ᠨᠢ ᠰᠢᠨᠡ ᠴᠠᠭ ᠦᠶᠡ ᠪᠤᠯᠪᠠᠰᠣᠨ ᠠᠷᠠᠳ ᠪᠤᠯᠬᠤ ᠲᠡᠷᠢᠬᠦᠨ ᠠᠯᠬᠤᠮ ᠪᠤᠯᠬᠤ ᠠᠵᠢ᠃
ᠬᠤᠶᠠᠷ᠂ ᠤᠯᠠᠮᠵᠢᠯᠠᠯᠳᠣ ᠮᠠᠶ᠋ᠢᠭ ᠮᠡᠬᠡᠯᠡᠯ
︵ᠨᠢᠬᠡ︶ ᠪᠤᠰᠣᠳ ᠲᠤ ᠬᠠᠪᠰᠣᠷᠴᠤ ᠵᠢᠯᠤᠭᠤᠴᠢ ᠦᠨᠡᠮᠯᠡᠯ ᠤᠯᠵᠦ ᠦᠭᠬᠦ ᠬᠡᠯᠪᠡᠷᠢ ᠮᠡᠬᠡᠯᠡᠯ
ᠵᠢᠯᠤᠭᠤᠴᠢ ᠦᠨᠡᠮᠯᠡᠯ ᠤᠯᠵᠦ ᠦᠭᠬᠦ ᠬᠡᠯᠪᠡᠷᠢ ᠮᠡᠬᠡᠯᠡᠯ ᠪᠤᠯ ᠤᠷᠴᠢᠮ ᠬᠡᠳᠦᠨ ᠵᠢᠯ ᠤᠳᠠᠭᠠ ᠲᠠᠷᠠᠭᠠᠯᠠᠨ ᠡᠬᠦᠰᠦᠭᠰᠡᠨ᠂ ᠨᠡᠶᠢᠬᠡᠮ ᠨᠡᠶᠢᠳᠡ ᠡᠮᠬᠢ ᠲᠢᠭᠯᠢᠮ ᠢ ᠨᠤᠴᠢᠳᠠᠢ ᠡᠪᠳᠡᠨ᠂ ᠬᠠᠤᠯᠢ ᠴᠠᠭᠠᠵᠠ ᠡᠷᠬᠡ ᠰᠦᠷ ᠢ ᠬᠦᠴᠦᠳᠡᠢ ᠭᠤᠳᠣᠭᠠᠭᠰᠠᠨ᠂ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠲᠤ ᠬᠦᠨᠳᠦ ᠶᠡᠭᠡ ᠬᠤᠬᠢᠷᠠᠯ ᠰᠦᠢᠳᠦᠯ ᠠᠪᠴᠢᠷᠠᠵᠦ ᠪᠤᠢ ᠨᠡᠶᠢᠬᠡᠮ ᠬᠤᠤᠷ ᠬᠦᠨᠦᠬᠡᠯ ᠮᠠᠰᠢ ᠶᠡᠭᠡ ᠮᠡᠬᠡᠯᠡᠯ ᠬᠡᠯᠪᠡᠷᠢ ᠪᠤᠯᠬᠤ ᠶᠤᠮ᠃ ᠵᠢᠯᠤᠭᠤᠴᠢ ᠦᠨᠡᠮᠯᠡᠯ ᠨᠢ ᠵᠠᠮ ᠬᠠᠷᠢᠯᠴᠠᠭᠠᠨ ᠬᠡᠯᠳᠡᠰ ᠨᠢᠬᠡᠳᠦᠯᠳᠡᠢ ᠲᠤᠬᠢᠷᠠᠭᠤᠯᠤᠭᠰᠠᠨ ᠠᠯᠪᠠᠨ ᠰᠢᠯᠭᠠᠯᠳᠠ ᠲᠠᠮᠵᠢᠭᠰᠠᠨ ᠰᠢᠯᠭᠠᠭᠤᠯᠤᠭᠴᠢ ᠳᠤ ᠯᠡ ᠬᠠᠤᠯᠢ ᠶᠤᠰᠣᠭᠠᠷ ᠤᠯᠭᠤᠳᠠᠭ ᠵᠦᠪᠰᠢᠶᠡᠷᠡᠯ ᠲᠡᠮᠳᠡᠭ ᠶᠤᠮ᠃ ᠬᠠᠷᠢᠨ ᠶᠠᠮᠠᠷ ᠨᠢᠬᠡᠨ ᠬᠤᠪᠢ ᠬᠦᠮᠦᠨ ᠤᠷᠤᠯᠴᠠᠭᠠ ᠠᠴᠠ ᠰᠢᠢᠳᠦᠯ ᠲᠠᠢ ᠵᠦᠢᠯ ᠪᠤᠶᠤ ᠠᠷᠤ ᠡᠬᠦᠳᠡ ᠬᠦᠬᠡᠬᠡᠵᠦ ᠠᠷᠠᠯᠵᠢᠵᠦ ᠮᠠᠶᠢᠮᠠᠯᠠᠳᠠᠭ ᠲᠠᠸᠠᠷ ᠤᠭᠳᠣ ᠪᠢᠰᠢ ᠶᠤᠮ᠃ ᠡᠶᠢᠮᠦ ᠠᠴᠠ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠡᠶᠢᠮᠦᠷᠬᠦ ᠬᠠᠤᠯᠢ ᠪᠤᠰᠣ ᠬᠡᠯᠪᠡᠷᠢ ᠪᠠᠷ ᠵᠢᠯᠤᠭᠤᠴᠢ ᠦᠨᠡᠮᠯᠡᠯ ᠤᠯᠵᠦ ᠠᠪᠴᠢᠷᠠᠬᠤ ᠪᠤᠳᠣᠯ ᠰᠠᠨᠠᠭᠠ ᠪᠠᠨ ᠤᠷᠪᠤᠩ ᠨᠢ ᠦᠬᠡᠷᠡᠴᠢᠯᠡᠵᠦ᠂ ᠡᠶᠢᠮᠦᠷᠬᠦ ᠬᠡᠯᠪᠡᠷᠢ ᠪᠠᠷ ᠪᠤᠰᠣᠳ ᠵᠤᠭᠤᠰ ᠵᠤᠭᠠ ᠮᠡᠬᠡᠯᠵᠦ ᠪᠤᠢ ᠰᠡᠵᠢᠭᠳᠡᠨ ᠢ ᠰᠡᠷᠡᠮᠡᠭᠴᠡ ᠪᠠᠷᠢᠨ ᠲᠤᠤᠷᠠ ᠨᠢ ᠬᠠᠮᠢᠶᠠ ᠪᠦᠬᠦᠢ ᠬᠠᠤᠯᠢ ᠪᠠᠶᠢᠭᠤᠯᠭᠠ ᠳᠤ ᠢᠯᠡᠴᠢᠯᠡᠨ ᠮᠡᠳᠡᠬᠦᠯᠵᠦ ᠡᠷᠳᠡ ᠠᠴᠠ ᠲᠠᠰᠣᠯᠣᠨ ᠵᠤᠭᠰᠣᠭᠠᠯᠭᠠᠬᠤ ᠬᠡᠷᠡᠭᠳᠡᠢ᠃
︵ᠬᠤᠶᠠᠷ︶ ᠭᠠᠵᠠᠷ ᠲᠠᠷᠢᠶᠠ ᠰᠢᠯᠵᠢᠬᠦᠯᠥᠨ ᠦᠭᠬᠦ ᠬᠡᠯᠪᠡᠷᠢ ᠮᠡᠬᠡᠯᠡᠯ
ᠤᠶᠢᠷᠠ ᠬᠡᠳᠦᠨ ᠵᠢᠯ ᠲᠠᠷᠢᠶᠠ ᠮᠤᠳᠣ ᠦᠨᠡ ᠤᠷᠤᠬᠤ ᠲᠠᠭᠠᠯᠳᠣᠨ ᠤᠯᠠᠩᠬᠢ ᠬᠦᠮᠦᠰ ᠭᠠᠵᠠᠷ ᠲᠠᠷᠢᠶᠠᠨ ᠦᠨᠡ ᠦᠷᠳᠡᠭ ᠢ ᠤᠯᠠᠮ ᠤᠬᠠᠨ ᠲᠠᠨᠢᠵᠦ ᠡᠬᠢᠯᠡᠭᠰᠡᠨ ᠶᠤᠮ᠃ ᠡᠨᠡ ᠨᠢ ᠨᠢᠬᠡ ᠪᠦᠯᠦᠭ ᠭᠠᠵᠠᠷ ᠲᠠᠷᠢᠶᠠᠨ ᠮᠠᠶᠢᠮᠠᠶᠢᠴᠢᠳ ᠲᠦᠷᠦᠨ ᠭᠠᠷᠬᠤ ᠲᠤᠬᠢᠳᠠᠢ ᠨᠦᠬᠦᠴᠡᠯ ᠪᠤᠯᠵᠦ ᠦᠭᠪᠡ᠃ ᠲᠡᠳᠡ ᠮᠦᠩᠬᠦ ᠵᠤᠭᠤᠰᠣᠨ ᠤᠯᠠᠶᠢᠷᠠᠯ ᠠᠴᠠ ᠪᠤᠯᠤᠭᠠᠳ ᠪᠤᠰᠣᠳ ᠲᠤ ᠨᠢᠬᠡᠨᠳᠡ ᠰᠢᠯᠵᠢᠬᠦᠯᠥᠨ ᠦᠭᠬᠦᠭᠰᠡᠨ ᠭᠠᠵᠠᠷ ᠲᠠᠷᠢᠶᠠ ᠪᠠᠨ ᠤᠯᠠᠨ ᠬᠦᠮᠦᠰ ᠲᠤ ᠲᠠᠬᠢᠨ ᠲᠠᠪᠳᠠᠨ ᠰᠢᠯᠵᠢᠬᠦᠯᠥᠨ ᠦᠭᠬᠦᠭᠡᠳ ᠲᠦᠷᠢᠶᠡᠰᠦᠨ ᠮᠦᠩᠬᠦ ᠮᠡᠬᠡᠯᠡᠨ ᠠᠪᠴᠦ ᠪᠦᠷᠢᠯᠭᠡᠬᠦ ᠪᠤᠯᠪᠠ᠃ ᠵᠠᠷᠢᠮᠠᠳ ᠨᠢ ᠲᠠᠪᠠᠭᠤᠷᠠᠬᠤ ᠳᠠᠭᠠᠨ ᠦᠷᠦᠬᠡᠯ ᠭᠠᠵᠠᠷ ᠲᠠᠷᠢᠶᠠ ᠡᠵᠡᠨ ᠬᠢᠨᠢ ᠲᠠᠯᠳᠠᠭᠤᠷ ᠰᠢᠭᠤᠳ ᠡᠵᠡᠨ ᠮᠡᠳᠡᠵᠦ ᠪᠤᠰᠣᠳ ᠲᠤ ᠰᠢᠯᠵᠢᠬᠦᠯᠥᠨ ᠦᠭᠴᠢᠬᠡᠳ ᠲᠦᠷᠢᠶᠡᠰᠦᠨ ᠮᠦᠩᠬᠦ ᠨᠢ ᠰᠦᠯᠵᠢᠶᠡᠨ ᠮᠦᠷᠦᠢ ᠲᠠᠢ ᠲᠤᠭᠯᠠᠭᠠᠮ ᠳᠤ ᠦᠷᠡᠬᠡᠵᠦ ᠪᠠᠶᠢᠨᠠ᠃ ᠡᠶᠢᠮᠦ ᠠᠴᠠ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠭᠠᠵᠠᠷ ᠲᠠᠷᠢᠶᠠ ᠪᠠᠨ ᠭᠠᠳᠠᠭᠰᠢ ᠲᠦᠷᠢᠶᠡᠰᠦᠯᠡᠨ ᠦᠭᠬᠦ ᠳᠡᠭᠡᠨ ᠵᠠᠪᠰᠢᠭᠴᠢ ᠮᠠᠶᠢᠮᠠᠶᠢᠴᠢᠳ ᠠᠴᠠ ᠰᠡᠷᠬᠡᠶᠢᠯᠡᠵᠦ᠂ ᠦᠪᠡᠷ ᠡᠳ᠋ ᠬᠦᠷᠦᠩᠭᠡ ᠭᠠᠵᠠᠷ ᠲᠠᠷᠢᠶᠠ ᠪᠠᠨ ᠬᠠᠮᠠᠭᠠᠯᠠᠬᠤ ᠬᠡᠷᠡᠭᠳᠡᠢ᠃
︵ᠭᠤᠷᠪᠠ︶ ᠠᠷᠤ ᠡᠬᠦᠳᠡ ᠡᠷᠢᠵᠦ ᠤᠴᠢᠷ ᠪᠦᠲᠦᠬᠡᠵᠦ ᠦᠭᠬᠦ ᠬᠡᠯᠪᠡᠷᠢ ᠮᠡᠬᠡᠯᠡᠯ
ᠬᠠᠤᠯᠢ ᠪᠠᠶᠢᠭᠤᠯᠭᠠ ᠳᠤ ᠬᠦᠮᠦᠨ ᠡᠷᠢᠵᠦ᠂ ᠡᠷᠡᠬᠦᠦ ᠰᠢᠢᠳᠬᠡᠯ ᠠᠴᠠ ᠬᠡᠯᠳᠦᠷᠢᠬᠦᠯᠵᠦ ᠦᠭᠬᠦ ᠬᠡᠵᠦ ᠪᠤᠰᠣᠳ ᠠᠴᠠ ᠵᠤᠭᠤᠰ ᠠᠪᠬᠤ᠂ ᠤᠢ ᠮᠤᠳᠣ ᠤᠭᠳᠣᠯᠬᠤ ᠵᠦᠪᠰᠢᠶᠡᠷᠡᠯ ᠪᠢᠴᠢᠭ ᠢ ᠢᠯᠭᠤᠮ ᠤᠯᠵᠦ ᠦᠭᠬᠦ ᠭᠡᠵᠦ ᠪᠤᠰᠣᠳ ᠠᠴᠠ ᠵᠤᠭᠤᠰ ᠮᠡᠬᠡᠯᠡᠨ ᠠᠪᠬᠤ᠂ ᠬᠦᠮᠦᠨ ᠡᠷᠢᠵᠦ ᠨᠡᠶᠢᠬᠡᠮ ᠪᠠᠳᠣᠯᠠᠭᠠ ᠲᠠᠩᠰᠠ ᠨᠢ ᠨᠦᠬᠦᠵᠦ ᠦᠭᠬᠦᠨᠡ ᠬᠡᠵᠦ ᠪᠤᠰᠣᠳ ᠠᠴᠠ ᠵᠤᠭᠤᠰ ᠮᠡᠬᠡᠯᠡᠨ ᠠᠪᠬᠤ ᠪᠤᠯ ᠤᠷᠴᠢᠮ ᠵᠢᠯᠳ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠲᠤᠮᠳᠠ ᠲᠦᠬᠡᠮᠡᠯ ᠡᠬᠦᠰᠴᠦ ᠪᠤᠢ ᠮᠡᠬᠡᠯᠡᠯ ᠬᠡᠷᠡᠭ ᠨᠢᠬᠡᠨ ᠲᠦᠷᠦᠯ ᠪᠤᠯᠬᠤ ᠶᠤᠮ᠃ ᠡᠶᠢᠮᠦᠷᠬᠦ ᠲᠦᠷᠦᠯ ᠮᠡᠬᠡᠯᠡᠯ ᠬᠡᠷᠡᠭ ᠰᠡᠵᠢᠭᠳᠡᠨ ᠨᠢ ᠦᠪᠡᠷ ᠢ ᠪᠠᠨ ᠠᠯᠢ ᠲᠠᠷᠤᠭᠠ ᠲᠠᠢ ᠨᠢ ᠬᠠᠷᠢᠴᠠᠭᠠ ᠰᠦᠯᠪᠡᠭᠡ ᠲᠠᠢ ᠪᠤᠶᠤ ᠠᠯᠢ ᠪᠠᠶᠢᠭᠤᠯᠭᠠ ᠳᠤ ᠨᠢ ᠬᠦᠮᠦᠨ ᠲᠠᠢ ᠬᠡᠬᠦ ᠮᠡᠳᠦ ᠪᠠᠷ ᠶᠡᠬᠡᠪᠡᠷ ᠦᠯᠢᠶᠡᠨ ᠬᠦᠬᠡᠷᠬᠡᠳᠡᠵᠦ ᠪᠠᠶᠢᠭᠠᠳ ᠪᠤᠰᠣᠳ ᠢᠳᠡᠬᠡᠯ ᠢ ᠤᠯᠵᠦ᠂ ᠡᠬᠦᠨ ᠤᠯᠠᠮ ᠲᠡᠳᠡᠨ ᠵᠤᠭᠤᠰ ᠢ ᠬᠢᠯᠪᠠᠷᠬᠠᠨ ᠭᠠᠷ ᠲᠠᠭᠠᠨ ᠤᠷᠤᠭᠤᠯᠵᠦ ᠠᠪᠳᠠᠭ᠃ ᠬᠡᠪᠡᠴᠦ ᠦᠨᠡᠨ ᠲᠡᠭᠡᠷᠡ ᠪᠠᠨ ᠲᠡᠳᠡᠨ ᠳᠤ ᠪᠤᠰᠣᠳ ᠢ ᠬᠠᠪᠰᠣᠷᠴᠦ ᠤᠴᠢᠷ ᠪᠦᠲᠦᠬᠡᠬᠦ ᠪᠤᠰᠣᠳᠴᠢ ᠨᠦᠬᠦᠴᠡᠯ ᠪᠤᠶᠤ ᠴᠢᠳᠠᠯ ᠲᠡᠩᠬᠡᠬᠡ ᠦᠬᠡᠢ ᠤᠴᠢᠷ ᠠᠴᠠ ᠠᠮᠠᠯᠠᠭᠰᠠᠨ ᠵᠦᠢᠯ ᠬᠠᠶᠠᠭᠠᠨ ᠳᠤ ᠨᠢ ᠤᠷᠬᠢᠭᠠᠳ ᠠᠪᠤᠭᠰᠠᠨ ᠵᠤᠭᠤᠰ ᠭᠱᠠᠨ ᠵᠠᠭᠤᠷᠠ ᠨᠠᠭᠠᠳᠴᠤ ᠴᠡᠩᠬᠡᠵᠦ ᠪᠦᠷᠢᠯᠬᠡᠵᠦ ᠲᠠᠭᠤᠰᠬᠠᠳᠠᠭ᠃ ᠮᠡᠬᠡᠯᠡᠭᠳᠡᠴᠢ ᠨᠢ ᠤᠴᠢᠷ ᠨᠡᠬᠡᠵᠦ ᠬᠦᠬᠡᠬᠡᠴᠡᠯᠳᠦᠪᠡᠯ ᠲᠡᠳᠡ ᠪᠤᠰᠣᠳ ᠲᠤ ᠲᠦᠯᠬᠢᠬᠦ ᠪᠤᠶᠤ ᠡᠯᠳᠡᠪ ᠵᠦᠢᠯ ᠰᠢᠯᠳᠠᠭ ᠵᠢᠭᠠᠵᠦ ᠪᠡᠶᠡᠨ ᠠᠴᠠ ᠪᠠᠨ ᠵᠠᠶᠢᠯᠠᠭᠤᠯᠬᠤ ᠪᠤᠶᠤ ᠵᠠᠶᠢᠯᠠᠵᠦ ᠲᠤᠳᠠᠭᠠᠳᠠᠭ᠃ ᠡᠶᠢᠮᠦ ᠠᠴᠠ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠮᠠᠨᠢ ᠠᠷᠤ ᠡᠬᠦᠳᠡ ᠡᠷᠢᠵᠦ ᠤᠴᠢᠷ ᠶᠠᠪᠤᠳᠠᠯ ᠪᠦᠲᠦᠬᠡᠯᠬᠡᠬᠦ ᠬᠡᠵᠦ ᠪᠤᠰᠣᠳ ᠢ ᠭᠤᠶᠤᠵᠦ ᠭᠤᠩᠰᠢᠬᠤ ᠤᠷᠤᠨ ᠳᠤ ᠬᠠᠮᠢᠶᠠᠳᠠᠢ ᠪᠠᠶᠢᠭᠤᠯᠭᠠ ᠨᠢᠭᠡᠴᠡ ᠳᠤ ᠨᠢ ᠬᠦᠷᠴᠦ ᠬᠠᠮᠢᠶᠠᠳᠠᠢ ᠬᠦᠮᠦᠰ ᠠᠴᠠ ᠨᠢ ᠶᠠᠮᠠᠷ ᠭᠠᠷ ᠬᠦᠢᠴᠡᠳᠬᠡᠯ ᠬᠢᠬᠦ᠂ ᠬᠡᠷᠬᠢᠵᠦ ᠪᠦᠲᠦᠬᠡᠬᠦ ᠠᠷᠭᠠ ᠤᠬᠠᠭᠠᠨ ᠢ ᠨᠢ ᠯᠠᠪᠯᠠᠨ ᠠᠰᠠᠭᠤᠬᠤ ᠨᠢ ᠶᠠᠭᠤᠨ ᠠᠴᠠ ᠴᠤ ᠴᠢᠬᠤᠯᠠᠳᠠᠢ ᠬᠡᠳᠡᠭ ᠢ ᠰᠠᠨᠠᠯ ᠪᠤᠯᠭᠠᠶᠠ᠃
︵ᠲᠦᠷᠪᠡ︶ ᠡᠪᠡᠰᠦ ᠪᠤᠷᠳᠤᠭᠠ ᠮᠠᠶᠢᠮᠠᠯᠠᠬᠤ ᠬᠡᠯᠪᠡᠷᠢ ᠮᠡᠬᠡᠯᠡᠯ
ᠡᠮᠥᠨᠡ ᠬᠡᠳᠦᠨ ᠵᠢᠯ ᠮᠠᠯ ᠤᠨᠤᠭᠠᠨ ᠦᠨᠡ ᠬᠠᠩᠰᠢ ᠶᠡᠬᠡᠪᠡᠷ ᠦᠰᠦᠭᠰᠡᠨ ᠠᠴᠠ ᠪᠤᠯᠤᠭᠠᠳ ᠤᠯᠠᠨ ᠬᠦᠮᠦᠰ ᠬᠤᠨᠢ ᠦᠬᠡᠷ ᠲᠡᠵᠢᠬᠡᠨ ᠦᠷᠡᠵᠢᠬᠦᠯᠬᠦ ᠠᠵᠤ ᠦᠢᠯᠡᠰ ᠡᠷᠬᠢᠯᠡᠭᠰᠡᠨ ᠶᠤᠮ᠃ ᠡᠨᠡ ᠨᠢ ᠨᠦᠬᠦᠬᠡ ᠲᠠᠯᠠ ᠪᠠᠷ ᠡᠪᠡᠰᠦ ᠪᠤᠷᠳᠣᠭᠠᠨ ᠠᠷᠠᠯᠵᠢᠶᠠ ᠮᠠᠶᠢᠮᠠᠢ ᠶᠡᠬᠡᠬᠡᠨ ᠬᠦᠭᠵᠢᠶᠡᠨ ᠲᠠᠢ ᠪᠤᠯᠭᠠᠭᠰᠠᠨ ᠠᠴᠠ ᠨᠢᠬᠡ ᠪᠦᠯᠦᠭ ᠬᠠᠤᠯᠢ ᠪᠤᠰᠣ ᠡᠳᠡᠬᠡᠳ ᠡᠨᠡᠬᠦ ᠵᠠᠪᠰᠢᠶᠠᠨ ᠢ ᠲᠠᠯᠢᠮᠳᠠᠭᠤᠯᠤᠨ ᠡᠪᠡᠰᠦ ᠪᠤᠷᠳᠤᠭᠠ ᠮᠠᠶᠢᠮᠠᠯᠠᠬᠤ ᠬᠡᠯᠪᠡᠷᠢ ᠪᠠᠷ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠭᠠᠷ ᠲᠠᠬᠢ ᠵᠤᠭᠤᠰ ᠮᠦᠩᠬᠦ ᠮᠡᠬᠡᠯᠡᠨ ᠠᠪᠴᠤ᠂ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠲᠤ ᠬᠦᠨᠳᠦ ᠶᠡᠭᠡ ᠬᠤᠬᠢᠷᠠᠯ ᠰᠦᠢᠳᠦᠯ ᠠᠪᠴᠢᠷᠠᠵᠦ ᠪᠠᠶᠢᠨᠠ᠃ ᠡᠶᠢᠮᠦ ᠠᠴᠠ ᠦᠷᠬᠡᠨ ᠤᠯᠠᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠲᠠᠨᠢᠵᠦ ᠮᠡᠳᠡᠬᠦ ᠦᠬᠡᠢ ᠬᠦᠮᠦᠰ ᠲᠠᠢ ᠠᠷᠠᠯᠵᠢᠶᠠ ᠮᠠᠶᠢᠮᠠᠢ ᠬᠢᠬᠦ ᠳᠡᠭᠡᠨ ᠶᠠᠭᠠᠷᠠᠵᠦ ᠰᠠᠨᠳᠣᠷᠣᠯ ᠦᠬᠡᠢ ᠪᠠᠷ ᠯᠠᠪᠳᠠᠭᠤᠨ ᠤᠷᠤᠬᠤ ᠬᠢᠴᠢᠶᠡᠬᠦ ᠬᠡᠷᠡᠭᠳᠡᠢ᠃
ᠪᠤᠳᠠᠳᠣ ᠬᠦᠮᠦᠨ ᠤᠰᠣᠨ ᠨᠢᠳᠦ ᠮᠢᠬᠠᠨ ᠵᠢᠷᠦᠬᠡ ᠲᠠᠢ ᠴᠤ ᠬᠠᠤᠯᠢ ᠴᠠᠭᠠᠵᠠ ᠪᠤᠯ ᠲᠡᠮᠦᠷ ᠨᠢᠭᠤᠷ ᠲᠠᠢ ᠪᠠᠶᠢᠳᠠᠭ᠃ ᠬᠡᠨ ᠨᠢᠬᠡᠨ ᠬᠦᠮᠦᠨ ᠬᠠᠤᠯᠢ ᠤᠯᠠᠨ ᠳᠠᠭᠠᠨ ᠬᠢᠰᠬᠢᠵᠦ ᠬᠢᠷᠢ ᠠᠴᠠ ᠪᠠᠨ ᠲᠠᠪᠠᠭᠤᠷᠠᠵᠦ ᠠᠭᠠᠰᠢᠯᠠᠪᠠᠯ ᠬᠠᠤᠯᠢ ᠬᠠᠳᠠᠭᠤ ᠨᠢᠳᠣᠷᠭᠠᠨ ᠳᠤ ᠬᠠᠶᠢᠷᠠ ᠨᠠᠶᠢᠷ ᠦᠬᠡᠢ ᠦᠷᠳᠦᠬᠦ ᠯᠡ ᠪᠤᠯᠤᠨᠠ᠃ ᠡᠶᠢᠮᠦ ᠠᠴᠠ ᠪᠢᠳᠡ ᠬᠠᠤᠯᠢ ᠲᠡᠭᠡᠳᠦᠯᠡᠨ᠂ ᠬᠠᠤᠯᠢ ᠰᠠᠬᠢᠵᠦ᠂ ᠬᠠᠤᠯᠢ ᠤᠬᠠᠮᠰᠠᠷ ᠤᠴᠢᠷ ᠶᠠᠪᠤᠳᠠᠯ ᠳᠤ ᠵᠦᠪ ᠬᠠᠨᠳᠣᠵᠦ ᠰᠣᠷᠴᠠᠭᠠᠶᠠ᠃
