ᠢᠷᠠᠭᠤ ᠨᠠᠢᠷᠠᠭ ᠮᠢᠨᠤ
2023-05-31 16:45:46
------ 3ᠰᠠᠷᠠ ᠵᠢᠨ21 ᠳᠡᠯᠡᠬᠡᠢ ᠵᠢᠨ ᠢᠷᠠᠭᠤ ᠨᠠᠶᠢᠷᠠᠭ ᠡᠳᠦᠷ ᠲᠦ ᠵᠤᠷᠢᠭᠤᠯᠪᠠ
ᠪᠣᠷᠣ ᠲᠣᠭᠣᠰᠣ ᠲᠠᠢ ᠨᠤᠲᠤᠭ ᠬᠦᠷᠦᠰᠦᠨ ᠳᠦ
ᠪᠢᠷ ᠦᠵᠦᠭᠦᠷ ᠬᠤᠷᠴᠠᠯᠠᠵᠤ
ᠪᠤᠭᠤᠷᠤᠯ ᠳᠤᠮᠤᠭ ᠲᠦᠮᠡᠨ ᠬᠡᠯᠬᠢᠶᠡ
ᠪᠢᠴᠢᠭᠲᠦ ᠬᠠᠳᠠᠨᠠ ᠴᠢᠯᠠᠭᠤᠵᠢᠭᠤᠯᠳᠠᠭ
ᠪᠣᠭᠳᠠ ᠬᠠᠢᠷᠬᠠᠨ ᠮᠥᠩᠭᠦᠨ ᠰᠠᠷᠢᠳᠠᠭ ᠲᠤ
ᠪᠣᠳᠣᠯ ᠭᠡᠭᠡ ᠰᠤᠪᠤᠷᠠᠭᠣᠯᠵᠣ
ᠪᠤᠮᠠᠨ ᠦᠶᠡ ᠰᠤᠳᠤᠷ ᠬᠠᠭᠤᠳᠠᠰᠤ ᠪᠠᠷ
ᠪᠢᠯᠢᠭ ᠣᠶᠣᠨ ᠢ ᠨᠡᠭᠡᠭᠡᠭᠳᠡᠭᠦᠯᠳᠡᠭ
ᠢᠷᠠᠭᠤ ᠨᠠᠢᠷᠠᠭ ᠮᠢᠨᠤ︕
ᠵᠤᠰᠠᠭᠠᠯ ᠰᠠᠢᠬᠠᠨ ᠴᠦᠷᠭᠦᠯᠡᠭᠡ
ᠵᠡᠭᠦᠳᠦᠨ ᠳᠦ ᠪᠦᠵᠢᠨ ᠬᠣᠨᠣᠭᠰᠢᠵᠤ
ᠵᠢᠷᠤᠭ ᠶᠤᠮᠰᠢᠭ ᠡᠬᠡ ᠣᠷᠣᠨ ᠢ
ᠤᠷᠠᠯᠢᠭ ᠤᠬᠠᠭᠠᠨ ᠰᠣᠯᠤᠩᠭᠠᠷᠠᠭᠤᠯᠳᠠᠭ
ᠵᠤᠨ ᠵᠤᠨ ᠴᠡᠴᠡᠭᠡᠰ ᠢ
ᠵᠠᠭᠤᠨ ᠵᠠᠭᠤᠨ ᠳᠡᠯᠭᠡᠷᠡᠭᠦᠯᠵᠦ
ᠵᠢᠷᠦᠬᠡᠨ ᠠᠮᠠᠷᠠᠭ ᠨᠣᠲ ᠢ
ᠤᠶᠠᠬᠠᠨ ᠡᠭᠡᠰᠢᠭ ᠴᠢᠪᠬᠠᠳᠠᠳᠠᠭ
ᠢᠷᠠᠭᠤ ᠨᠠᠢᠷᠠᠭ ᠮᠢᠨᠤ︕
ᠬᠠᠨᠠᠭᠠᠷ ᠰᠠᠢᠬᠠᠨ ᠲᠠᠯᠠ ᠪᠠᠨ
ᠠᠶᠠᠯᠭᠤ ᠳᠠᠭᠤᠤ ᠲᠠᠢ ᠤᠶᠠᠩᠭᠠᠯᠠᠵᠤ
ᠬᠠᠢᠷᠠ ᠪᠦᠪᠡᠢ ᠲᠠᠢ ᠤᠷᠴᠢᠯᠠᠩ
ᠠᠷᠢᠭᠤᠨ ᠰᠦ ᠪᠡᠷ
ᠬᠠᠰ ᠪᠤᠯᠤᠷ ᠰᠠᠷᠠᠨ ᠢ
ᠰᠢᠯᠦᠭ ᠮᠦᠷ ᠲᠦ ᠲᠡᠷᠭᠡᠯᠰᠢᠭᠦᠯᠵᠦ
ᠬᠠᠩᠭᠠᠢ ᠰᠢᠷᠭᠠᠯ ᠡᠯᠡᠰᠦᠨ ᠳᠦ
ᠰᠢᠭᠦᠳᠡᠷᠢ ᠮᠦᠬᠦᠯᠢᠭ ᠪᠦᠮᠪᠦᠭᠡᠨᠡᠭᠦᠯᠳᠡᠭ
ᠢᠷᠠᠭᠤ ᠨᠠᠢᠷᠠᠭ ᠮᠢᠨᠤ︕
ᠲᠠᠨᠠᠨ ᠴᠠᠭᠠᠨ ᠰᠤᠪᠤᠳ
ᠲᠠᠯᠠ ᠭᠦᠨ ᠳᠤ ᠪᠡᠯᠴᠢᠭᠡᠵᠦ
ᠲᠦᠮᠡᠨ ᠠᠭᠲᠠ ᠲᠦᠪᠡᠷᠭᠡᠨ
ᠳᠡᠯᠡᠬᠡᠢ ᠰᠣᠨᠣᠷ ᠢ ᠪᠠᠶᠠᠰᠬᠠᠳᠠᠭ
ᠲᠠᠩᠰᠤᠭ ᠬᠥᠳᠡᠭᠡ ᠨᠣᠳᠣᠭ ᠲᠤ
ᠲᠠᠪᠤᠨ ᠲᠠᠷᠢᠶᠠ ᠬᠦᠭᠡᠷᠡᠭᠦᠯᠵᠦ
ᠲᠠᠩᠭᠢᠯ ᠴᠡᠪᠡᠷᠬᠡᠨ ᠬᠦᠷᠦᠰᠦᠨ ᠳᠦ
ᠲᠠᠩᠭᠠᠷᠢᠭ ᠪᠠᠲᠤ ᠬᠠᠳᠠᠩᠰᠢᠳᠠᠭ
ᠢᠷᠠᠭᠤ ᠨᠠᠢᠷᠠᠭ ᠮᠢᠨᠤ︕
ᠰᠦᠨ ᠴᠠᠭᠠᠨ ᠪᠡᠯᠭᠡᠳᠡᠯ ᠲᠠᠢ
ᠰᠦᠰᠦᠭᠯᠡᠨ ᠳᠡᠭᠡᠵᠢᠯᠡᠬᠦ ᠢᠷᠦᠭᠡᠯ ᠲᠠᠢ
ᠰᠦᠨᠢ ᠣᠳᠣᠳ ᠬᠦᠭᠵᠢᠮ ᠲᠠᠢ
ᠰᠠᠯᠬᠢᠨ ᠦᠵᠦᠭᠦᠷ ᠰᠡᠩᠭᠢᠨᠡᠭᠡ ᠲᠠᠢ
ᠢᠷᠠᠭᠤ ᠨᠠᠢᠷᠠᠭ ᠮᠢᠨᠤ︕
ᠰᠢᠯᠢ ᠠᠭᠤᠳᠠᠮ ᠨᠣᠲᠤᠭ ᠮᠢᠨᠢ
ᠰᠣᠶᠣᠷᠬᠠᠯ ᠶᠡᠬᠡᠳᠡᠢ ᠬᠦᠷᠲᠡᠭᠡᠯ
ᠰᠠᠨᠠᠭᠰᠠᠨ ᠵᠦᠭ ᠶᠦᠭᠡᠨ ᠵᠠᠮᠨᠠᠬᠤ ᠳᠤ
ᠰᠦᠯᠳᠡ ᠭᠡᠢᠮᠤᠷᠢ ᠪᠠᠳᠠᠷᠠᠭᠤᠯᠳᠠᠭ
ᠢᠷᠠᠭᠤ ᠨᠠᠢᠷᠠᠭ ᠮᠢᠨᠤ︕
